សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ឆ្នាំង ៖ សាលាមត្តេយ្យសិក្សា និង បឋមសិក្សាចំនួន៣ខ្នង ត្រូវអគ្គិភ័យឆេះបំផ្លាញទាំងស្រុង កាលពីវេលាម៉ោង១០ និង ៣០នាទី ថ្ងៃទី៩ ខែមិថុនា ឆ្នាំ២០១៩ ស្ថិតនៅចំណុចយុគន្ធរ ស្ថិតក្នុងភូមិឆ្នុកទ្រូ ឃុំឆ្នុកទ្រូ ស្រុកបរិបូរណ៍ ខេត្តកំពង់ឆ្នាំង ។
សមត្ថកិច្ចបានឲ្យដឹងថា អគ្គិភ័យនេះបានឆេះអគារសិក្សាចំនួន៣ខ្នង ក្នុងនសាលាមត្តេយ្យចំនួន១ខ្នង មាន១បន្ទប់ដែលមានទំហំ១២ម៉ែត្រ ទទឹង៧ម៉ែត្រ ធ្វើពីឈើប្រក់ស័ង្គសី ។ សាលាបឋមសិក្សាមានចំនួន២ខ្នង ៦បន្ទប់ ធ្វើពីឈើដំបូលប្រក់ស័ង្គសី ។
អគ្គិភ័យនេះ បានបំផ្លាញនូវសម្ភារ និងផ្ទាំងសូឡា៨ផ្ទាំង អាគុយ៧គ្រឿង កង្ហារចំនួន១៣គ្រឿង តុគ្រូ៣ តុសិស្សចំនួន១១៣ និងសម្ភារសិក្សាមួយចំនួន ។
ប្រភពពីប្រជាពលរដ្ឋដែលស្ថិតនៅក្បែរកន្លែងកើតហេតុបានឲ្យដឹងថា គាត់មិនដឹងភ្លើងនេះ ឆេះពីមូលហេតុអ្វីពិតប្រាកដនោះទេ ប៉ុន្តែនៅមុនពេលកើតហេតុ គេឃើញមានផ្សែងខ្មួលខ្មាញ់ចេញពីអគារសាលា ហើយក៏បានឆេះយ៉ាងសន្ធោសន្ធៅតែម្តង ដែលមិនអាចជួយបានទាន់ពេលវេលានោះទេ ។
បើតាមការសន្និដ្ឋានរបស់ប្រជាពលរដ្ឋនៅទីនោះ មូលហេតុដែលបណ្តាលឲ្យឆេះអគារសាលានេះគឺអាចបណ្តាលមកពី ឆ្លងចរន្តបន្ទះសូឡា ។ នៅពេលនេះ សមត្ថកិច្ចកំពុងស្រាវជ្រាវដើម្បីដឹងពីមូលហេតុពិតដែលបណ្តាលឲ្យឆេះសាលានេះ ៕ ចន្ថា
