សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់ជាមន្ត្រីជាប់កិច្ចសន្យានៅក្នុងក្រសួងអប់រំយុវជន និងកីឡាដេកលង់លក់ ត្រូវជនសង្ស័យលួចយកទូរស័ព្ទដៃមួយគ្រឿងបានសម្រេច តែត្រូវម្ចាស់ឃើញទាន់ស្រែកចោរៗ បង្កការភ្ញាក់ផ្អើលដល់ប្រជាពលរដ្ឋដេញចាប់បានប្រគល់ឲ្យសមត្ថកិច្ចប៉ុស្តិ៍ជ័យជំនះយកទៅសួរនាំ ។
ហេតុការណ៍នេះ បានកើតឡើងកាលពីម៉ោង៥ និង៣០នាទីព្រឹក ថ្ងៃទី១១ ខែមិថុនា ឆ្នាំ២០១៩ តាមបណ្តោយផ្លូវព្រះនរោត្តម កែងផ្លូវ២១៤ ចំណុចក្រសួងអប់រំយុវជន និងកីឡា ស្ថិតនៅក្នុងសង្កាត់ជ័យជំនះ ខណ្ឌដូនពេញ ។
សមត្ថកិច្ចប៉ុស្តិ៍ជ័យជំនះបានឲ្យដឹងថា ជនសង្ស័យមានឈ្មោះ សុខ ពៅ អាយុ១៨ឆ្នាំ មុខរបរមិនពិតប្រាកដ ស្នាក់នៅសង្កាត់អូរឫស្សី១ ខណ្ឌ៧មករា ។
តាមប្រភពព័ត៌មានពីជនរងគ្រោះឈ្មោះនី សារត្ន័ ភេទប្រុស អាយុ២១ឆ្នាំ មុខរបរជាមន្ត្រីជាប់កិច្ចសន្យានៅក្រសួងអប់រំយុវជន និងកីឡា ស្នាក់នៅផ្ទះលេខ៨០ ភូមិ១០ ផ្លូវព្រះនរោត្តម សង្កាត់ជ័យជំនះ ខណ្ឌដូនពេញ បានឲ្យដឹងថា មុនពេលកើតហេតុ គាត់កំពុងតែដេកយាមក្នុងកន្លែងធ្វើការនៅក្រសួងអប់រំ លុះពេលដល់ម៉ោងកើតហេតុ ស្រាប់តែមានជនសង្ស័យម្នាក់ មិនដឹងថា ចូលមកតាមណានោះទេ បានធ្វើសកម្មភាពលួចយកទូរស័ព្ទដៃរបស់គាត់ដែលដាក់នៅលើក្បាលដំណេក ។
តាមប្រភពដដែលបានបន្តថា បន្ទាប់ពីលួចទូរស័ព្ទបានសម្រេចហើយ ជនសង្ស័យរត់គេចខ្លួនរហូតដល់ផ្លូវព្រះនរោត្តមកែងផ្លូវ១៨៤ ស្ថិតក្នុងសង្កាត់ផ្សារថ្មីទី៣ ហើយគាត់បានរត់តាមពីក្រោយ និងស្រែកថា «ចោរៗ» ទើបបង្កការភ្ញាក់ផ្អើលដល់ប្រជាពលរដ្ឋចាប់បាននាំគ្នាព្រួតវាយម្នាក់មួយដៃម្នាក់ មួយជើង បណ្តាលឲ្យជនសង្ស័យរងរបួសទ្រោមខ្លួន រួចត្រូវបានសមត្ថកិច្ចយកទៅសួរនាំនៅប៉ុស្តិ៍ជ័យជំនះ ។
ពេលសមត្ថកិច្ចសួរនាំ ជនសង្ស័យបានឆ្លើយសារភាពថា ខ្លួនពិតជាបានធ្វើសកម្មភាពលួចទូរស័ព្ទដៃរបស់ជនរងគ្រោះប្រាកដមែន ដោយផ្លោះតាមទ្វារខាងក្រោយ រួចបំរុងនឹងទូរស័ព្ទហៅគ្នាមកដឹកយកចេញទៅដែរ តែត្រូវប៉ូលិសឃាត់ខ្លួនតែម្តង ។
បន្ទាប់ពីកើតហេតុ ជនរងគ្រោះបានទៅដាក់ពាក្យបណ្តឹងនៅប៉ុស្តិ៍ជ័យជំនះដើម្បីឲ្យសមត្ថកិច្ចកសាងសំណុំរឿងបញ្ជូនជនសង្ស័យទៅកាន់អធិការដ្ឋានខណ្ឌដូនពេញចាត់ការបន្តតាមនីតិវិធី ៕ ជ្រោយពេជ្រ
