សារព័ត៌មាន នគរវត្ត តែងតែនាំមុខគេជានិច្ច
ខេត្តត្បូងឃ្មុំ ៖ ពាក្យចាស់ថា ឈាមស្រែកស្បែកហៅ ពោលគឺ១៧ម៉ោងក្រោយពីឃាតកដេញកាប់សម្លាប់ប្រពន្ធខ្លួនឯងស្លាប់យ៉ាងអាណោចអាធ័មក្នុងថ្លុកឈាម នៅមុនវេលាទៀបភ្លឺឈានចូលថ្ងៃទី១៥ ខែមិថុនា ឆ្នាំ២០១៩ ត្រូវបានកម្លាំងនគរបាលស្រាវជ្រាវចាប់ខ្លួនបានហើយ ខណៈជននេះបម្រុងរកមធ្យោបាយជិះបន្តការគេចខ្លួន ។
ជនសង្ស័យ ជាប្តី ឈ្មោះ ព្រាប ម៉ាយ ភេទប្រុស អាយុ២៣ឆ្នាំ និង ប្រពន្ធឈ្មោះ ជុំ ធារី អាយុ១៧ឆ្នាំ ។
នគរបាលឲ្យដឹងថា ឃាតកដែលកាប់សម្លាប់ប្រពន្ធឯងកាលពីរសៀលថ្ងៃ១៤ម្សឹលមិញត្រូវចាប់ខ្លួនបាននៅវេលាម៉ោងប្រហែល៦ភ្លឺព្រឹកថ្ងៃទី១៥មិថុនា ក្នុងខណៈជនល្មើសរូបនេះឡើងមកលើដងផ្លូវកំពុងហៅឡានឈ្នួលជិះបំរុងគេចខ្លួនចេញពីមូលដ្ឋានដែលមានចម្ងាយប្រមាណជាង៧គម ពីកន្លែងកើតហេតុ ។
កិច្ចសហការតាមរកជនល្មើសដៃដល់កាប់សម្លាប់ប្រពន្ធខ្លួនឯង ដឹកនាំដោយលោកវរៈសេនីយ៍ឯក សួស ស៑ាងលី និងសហការីដ៏ជំនាញរបស់គាត់ចាប់បានផ្ទាល់និងមានការ ចូលរួមជា ពិសេសប្រជាការពារក្នុងស្រុកត្បូងឃ្មុំ កម្លាំងនគរបាលព្រហ្មទណ្ឌខេត្ត កម្លាំងយោធាកងពល២១កម្លាំងគាំទ្រយោធភូមិភាគ២ និង ពលរដ្ឋល្អដែលបានខឹតខំសហការតាមរុករកនិងឃ្លាំមើលអស់រយៈពេល១៧ម៉ោងកន្លងមក រហូតសម្រេចលទ្ធផលល្អបែបនេះ ។
បច្ចុប្បន្នឃាតករត្រូវបញ្ជូនខ្លួនមកអធិការដ្ឋានស្រុកត្បូងឃ្មុំដើម្បីកសាងសំណុំរឿងបញ្ជូនទៅតុលាការ ។
គួររំលឹកថា ហេតុការណ៍នេះបានបង្កការភ្ញាក់ផ្អើលអំឡុងម៉ោងប្រមាណ១និង៣០នាទី ថ្ងៃទី១៤ ខែមិថុនា ឆ្នាំ២០១៩ នៅចំណុចមុខស្នាក់ការគណបក្សស្រុកត្បូងឃ្មុំ ភូមិទួលវិហារ ឃុំជីរោទ៍ទី២ ស្រុកត្បូងឃ្មុំ ៕ វណ្ណៈ
