សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសជនជាតិសិង្ហបុរីម្នាក់ បានគាំងបេះដូងស្លាប់ នៅលើសាឡុងក្នុងខុនដូជាន់ទី១២ នៅបុរីខាំកូស៊ីធី ខណ:កំពុងអង្គុយជុំគ្រួសារមើលទូរទស្សន៍ ហេតុការណ៍នេះ កើតឡើងកាលពីម៉ោង ២រសៀល ថ្ងៃទី១៨ ខែមិថុនា ឆ្នាំ២០១៩ ស្ថិតក្នុងភូមិគង្គារផុស សង្កាត់ទួលសង្កែទី២ ខណ្ឌឫស្សីកែវ រាជធានីភ្នំពេញ ។
ជនរងគ្រោះឈ្មោះ ចន នី អាយុ៦៥ឆ្នាំ ជនជាតិ សិង្ហបុរី ស្នាក់នៅកន្លែងកើតហេតុខាងលើ ។
តាមប្រភពព័ត៌មានពីសមត្ថកិច្ចឲ្យថា នៅវេលាម៉ោង៩ព្រឹក ជនរងគ្រោះចង់ទៅផ្សារ ពេលមកដល់ចំណតឡានជនរងគ្រោះ មានអក្ការមិនស្រួលខ្លួន រួចគាត់បានទៅមន្ទីរព្យាបាលសម្ភពប្រសិទ្ធភាព តែដោយអក្ការបេះដូងធ្ងន់ លោកគ្រូពេទ្យក៏ប្រាប់ឲ្យទៅមន្ទីពេទ្យកាល់ម៉ែត្រ ផ្នែកបេះដូង ។
ពេលទៅដល់មន្ទីពេទ្យកាល់ម៉ែតផ្នែកបេះដូង បន្ទាប់ពីគ្រូពេទ្យពិនិត្យរួចប្រាប់ថា ឲ្យអ្នកជំងឺសម្រាកចំនួន ៣ថ្ងៃ តែជនរងគ្រោះមិនព្រមដេកសម្រាកឡើយ ដោយនិយាយជាមួយគ្រូពេទ្យ និងសរសេរលិខិតសុំចេញពីពេទ្យត្រឡប់មកខុនដូវិញ ។ យោងតាមសំដីបងថ្លៃប្រុសរបស់ជនរងគ្រោះឈ្មោះ ស៊ុក មករា អាយុជាង ២០ឆ្នាំ បានឲ្យដឹងថា នៅវេលាម៉ោង២រសៀលថ្ងៃដដែល ពួកគេកំពុងអង្គុយជុំគ្នាបួននាក់ លើសាឡុងនៅបន្ទប់ខុនដូជាន់ទី១២ ក្នុងបុរីខាំកូស៊ីធី ខណ:កំពុងអង្គុយលើសាឡុងសុខៗ ប្អូនថ្លៃរបស់ខ្លួនដកចង្កាមាន់ចំនួន២ដង ស្លាប់នៅកន្លែង តែដោយក្រុមគ្រួសារមិនអស់ចិត្តក្រែងលោមិនទាន់ស្លាប់ ទើបដឹកតាមម៉ូតូកង់បីមកកាន់មន្ទីរព្យាបាលសម្ភពប្រសិទ្ធភាព ពេលមកដល់លោកគ្រូពេទ្យបានប្រាប់ថា ប្អូនថ្លៃរបស់ខ្លួនបានស្លាប់បាត់ទៅហើយ ។
ក្រោយពេលកើតហេតុ ក៏រាយការណ៍ប្រាប់សមត្ថកិច្ចមូលដ្ឋាន ចុះពិនិត្យដល់មន្ទីរពេទ្យ រួចដឹកសពទៅតម្កល់នៅវត្តចង្ក្រានតាព្រហ្មស្ទឹងមានជ័យ ក្នុងខណ្ឌមានជ័យ រាជធានីភ្នំពេញ ៕ ជ្រោយពេជ្រ
