សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ មន្ត្រីពេទ្យសត្វខេត្តស្វាយរៀង បានចុះល្បាតនាពេលយប់ ក៏ប្រទះឃើញម៉ូតូរ៉ឺម៉ក់ដឹកសត្វជ្រូក៩ក្បាល នៅយប់ថ្ងៃទី១៨ ខែមិថុនា ឆ្នាំ ២០១៩ ដែលលួចនាំចូលពីប្រទេសវៀតណាម ឆ្លងតាមច្រករបៀង ភូមិមនោរម្យ ឃុំមនោរម្យ ស្រុកស្វាយទាប ខេត្តស្វាយរៀង ។
មន្ត្រីពេទ្យសត្វបានឲ្យដឹងថា នៅថ្ងៃទី១៩ ខែមិថុនា ឆ្នាំ២០១៩ថា តាមសារាចរណែនាំរបស់រដ្ឋមន្ត្រីក្រសួងកសិកម្ម រុក្ខា ប្រមាញ់ និងនេសាទ ស្តីពី វិធានការបន្ទាន់ក្នុងការទប់ស្កាត់ការរាលដាល នៃជំងឺឆ្លងប៉េស្តជ្រូកអាហ្វ្រិក និងដោយមានការបញ្ជាផ្ទាល់ពីលោក តាន់ ផាន់ណារ៉ា ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយក នៃអគ្គនាយកដ្ឋានសុខភាពសត្វ និងផលិតកម្មសត្វ ក្រុមមន្រ្តីបានបើកប្រតិបត្តិការជាបន្តបន្ទាប់លើការងារនេះ ។
មន្ត្រីពេទ្យសត្វបានបញ្ជាក់ទៀតថា មន្ត្រីជំនាញបានស្ទាក់ឃាត់ និងចាប់រ៉ឺម៉ក់ ១គ្រឿងដឹកសត្វជ្រូកចំនួន ០៩ក្បាល នៅចំណុចទីសត្តឃាតដ្ឋាន ជីភូ ភូមិកំពោតប្រស់ សង្កាត់ច្រកម្ទេស ក្រុងបាវិត ខេត្តស្វាយរៀង ដែលលួចនាំចូលពីប្រទេសវៀតណាម ឆ្លងតាមច្រករបៀង នៃភូមិសាស្ត្រនៃស្រុកស្វាយទាប ។
មន្ត្រីពេទ្យសត្វបានបន្តថា ក្រុមការងារបានដឹកនាំបទល្មើស និងវត្ថុតាងទាំងនោះយកទៅរក្សាទុកនៅមន្ទីរកសិកម្ម រុក្ខាប្រមាញ់ និងនេសាទខេត្ត ដើម្បីចាត់ការតាមច្បាប់៕ យឹម សុថាន
