សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ជនសង្ស័យម្នាក់ ដែលជាមុខសញ្ញាចោរលួច ឆក់ ប្លន់ដ៏សកម្មម្នាក់ ដែលនៅសេសសល់ពីការចាប់បង្ក្រាបនាពេលកន្លងមក ត្រូវបានកម្លាំងនគរបាលប៉ុស្តិ៍រដ្ឋបាលផ្សារកណ្ដាលទី១ ស្រាវជ្រាវរហូតឈានដល់ការឃាត់ខ្លួន បន្ទាប់ពីរូបគេបានធ្វើសកម្មភាពលួចទូរស័ព្ទរបស់ជនរងគ្រោះពីរនាក់ប្ដីប្រពន្ធដែលអង្គុយនៅមាត់ទន្លេភ្លេចខ្លួន ហើយព្យាយាមគេចខ្លួនមិនបានប៉ុន្មានម៉ោងផង ។
ករណីឃាត់ខ្លួនជនសង្ស័យនេះ បានធ្វើឡើងកាលពីវេលាម៉ោង២និង១៥នាទីរសៀល ថ្ងៃព្រហស្បតិ៍ ៣រោច ខែជេស្ឋ ឆ្នាំកុរ ឯកស័ក ព.ស ២៥៦៣ត្រូវនឹងថ្ងៃ២០ ខែមិថុនា ឆ្នាំ២០១៩ ក្រោយប្រព្រឹត្តិបទល្មើសលួចទូរស័ព្ទដៃ កាលពីថ្ងៃទី១៦ ខែមិថុនា ឆ្នាំ២០១៩ វេលាម៉ោង០៨និង៣០នាទី ចំណុចលើបង់សួនច្បារមាត់ទន្លេផ្លូវព្រះស៊ីសុវត្ថិ ភូមិទី២សង្កាត់ផ្សារកណ្ដាលទី១ ខណ្ឌដូនពេញ រាជធានីភ្នំពេញ ។
ជនសង្ស័យឈ្មោះ ចេន រតនាហៅ វិន ភេទប្រុស អាយុ២៩ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅមិនពិតប្រាកដ។ ចំណែកជនរងគ្រោះ ឈ្មោះ វ៉ន សំនិត ភេទស្រី អាយុ៤៤ឆ្នាំ ជនជាតិខ្មែរ មុខរបរជាងកាត់ដេរ មានទីលំនៅផ្ទះលេខ១៥៥ ផ្លូវសហព័ន្ធរុស្សី សង្កាត់កាកាបទី១ខណ្ឌពោធិ៍សែនជ័យ រាជធានីភ្នំពេញ។
យោងតាមមន្រ្តីនគរបាលប៉ុស្តិ៍រដ្ឋបាលផ្សារកណ្ដាលទី១ បានឲ្យដឹងថា កាលពីថ្ងៃទី១៦ ខែមិថុនា ឆ្នាំ២០១៩ វេលាម៉ោង០៨និង៣០នាទីព្រឹក ជនរងគ្រោះ និងប្តី បាននាំគ្នាមកអង្គុយលេងនៅលើបង់ម្តុំ សួនច្បារមាត់ទន្លេហើយបានយកទូរស័ព្ទដៃដាក់នៅលើបង់ក្បែរខ្លួន មួយសន្ទុះក្រោយមក ស្រាប់តែមានជនសង្ស័យខាងលើ បានមកធ្វើសកម្មភាបលួចយកទូរស័ព្ទដៃពីក្រោយទៅបាត់ ហើយជនរងគ្រោះ បានមកដាក់ពាក្យបណ្ដឹងនៅ ប៉ុស្តិ៍នគរបាលរដ្ឋបាលផ្សារកណ្ដាលទី១តែម្ដង ។
បន្ទាប់ពីទទួលបានពាក្យបណ្ដឹងពីជនរងគ្រោះ កម្លាំងនគរបាលប៉ុស្តិ៍រដ្ឋបាលផ្សារកណ្តាលទី១ នៃអធិការដ្ឋាននគរបាលខណ្ឌដូនពេញ ក៏បានធ្វើការស្រាវជ្រាវរហូតដល់ថ្ងៃទី២០ ខែមិថុនា ឆ្នាំ២០១៩ វេលាម៉ោង២និង១៥នាទីរសៀល ទើបឃាត់ខ្លួនជនសង្ស័យឈ្មោះ ចេន រតនា ហៅអាវិន ភេទប្រុសអាយុ២៩ឆ្នាំ នៅចំណុច សួនច្បារមាត់ទន្លេផ្លូវព្រះស៊ីសុវត្ថិកែងផ្លូវលេខ១៤៨ ភូមិ៥ សង្កាត់ ផ្សារកណ្ដាលទី១ ខណ្ឌដូនពេញ យកមកធ្វើការសាកសួរតែម្ដង ។ សម្ភារៈបាត់បង់ មានទូរស័ព្ទដៃមួយគ្រឿងម៉ាកអាយហ្វូន៧ផ្លើស ពណ៌ខ្មៅ។
សមត្ថកិច្ចបញ្ជាក់ទៀតថា ជនសង្ស័យជាមុខសញ្ញាសេសសល់ ក្នុងករណី លួច(ម៉ូតូ) កាលពីថ្ងៃទី២៣ ខែឧសភា ឆ្នាំ២០១៩ វេលាម៉ោង០១និង៣០នាទី ត្រង់ចំណុចមាត់ទន្លេសង្កាត់ផ្សារកណ្ដាលទី១ ហើយជាមុខសញ្ញាលួច ឆក់ យ៉ាងសកម្មទៅលើប្រជាពលរដ្ឋ និងជនជាតិបរទេស ដែលដើរលេងកម្សាន្តនៅតាមមាត់ទន្លេផងដែរ ។ ជនសង្ស័យធ្លាប់ប្រើប្រាស់គ្រឿងញៀនដោយឆ្លងតាមការពិនិត្យទឹកនោម ។
បច្ចុប្បន្នជនសង្ស័យ ត្រូវបានឃាត់ខ្លួនបណ្ដោះអាសន្ននៅអធិការដ្ឋាននគរបាលខណ្ឌដូនពេញ ដើម្បីកសាងសំណុំរឿងតាមនីតិវិធី ៕ ស រស្មី
