សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ អនុលោមតាមអនុក្រិត្យរបស់ រាជរដ្ឋាភិបាល ក្នុងការសម្រេចបង្កើតរដ្ឋបាលខណ្ឌថ្មីចំនួនពីបន្ថែមទៀត ដែលបំបែកសង្កាត់មួយចំនួនចេញពីខណ្ឌចាស់នោះ នៅព្រឹកថ្ងៃសុក្រ៤រោច ខែជេស្ឋ ឆ្នាំកុរឯកស័កព.ស២៥៦៣ ត្រូវនឹងថ្ងៃទី២១ ខែមិថុនា ឆ្នាំ២០១៩ លោក ឃួង ស្រេង អភិបាលរាជធានីភ្នំពេញ និងមន្រ្តីពាក់ព័ន្ធ បាន ប្រារពពិធីប្រកាស ស្តីពីការបង្កើត និងដាក់អោយដំណើរការរដ្ឋបាលខណ្ឌ និងប្រកាសមុខ តំណែង ប្រធាន និងសមាជិកក្រុមប្រឹក្សាខណ្ឌកំបូលទាំង១៧រូប ។
លោក ឃួង ស្រេង អភិបាលរាជធានីភ្នំពេញ បានបញ្ជាក់ថា៖ រដ្ឋបាលខណ្ឌថ្មី ក៏ដូចជា ក្រុមប្រឹក្សា ដែលទើបនឹងទទួលបានការគាំទ្រ ពីការបោះឆ្នោតជ្រើសរើស ជាប្រធាន និងសមាជិក ក្រុមប្រឹក្សាខណ្ឌកំបូល អាណត្តិទី៣ ត្រូវពង្រឹងការគ្រប់គ្រង នៅក្នុងដែនសមត្ថកិច្ចរបស់ខ្លួនឲ្យបានល្អ តាមគោលការណ៍ណែនាំ របស់រដ្ឋបាលរាជធានីភ្នំពេញ ពិសេស ក្រសួងមហាផ្ទៃ សំដៅបំរើ ផលប្រយោជន៍ប្រជាពលរដ្ឋក្នុងមូលដ្ឋាន ទាំងសន្តិសុខ សណ្តាប់ធ្នាប់សាធារណៈ និង ជម្រុញការអភិវឌ្ឍន៍ក្នុងមូលដ្ឋានឲ្យមានប្រសិទ្ធភាព និង តម្លាភាព។
លោកបញ្ជាក់ថា៖ បើទោះជាខណ្ឌកំបូលទើបតែបង្កើតថ្មីក៏ដោយ ប៉ុន្តែមន្រ្តីបំរើការគ្រប់ផ្នែក ក្នុងរដ្ឋបាលខណ្ឌនេះ ភាគច្រើនជាមន្រ្តីដែលចេញមកពីខណ្ឌចាស់ ទាំងមន្រ្តីរដ្ឋបាលសាធារណៈនិងកម្លាំងមានសមត្ថកិច្ចជាពិសេស ប្រធាន និងសមាជិកទាំង១៧រូប របស់ក្រុមប្រឹក្សាខណ្ឌ ជាមន្រ្តីដែលធ្លាប់បំរើការងារ ក្រោមរដ្ឋបាលខណ្ឌ និង រដ្ឋបាលរាជធានីភ្នំពេញ ដូច្នេះត្រូវប្រឹងប្រែងបំរើប្រជាជនឲ្យបានល្អទ្វេដង តាមអនុសាសន៍ណែនាំដ៏ខ្ពង់ខ្ពស់ របស់ប្រមុខរាជរដ្ឋាភិបាល ដែលបានលើកឡើងកាលពីពេលកន្លងទៅនេះ។
ជាមួយគ្នានោះ លោក អភិបាល បានជម្រាបជូនពីគោលបំណង ដែលរាជរដ្ឋាភិបាល សម្រេចបង្កើតខណ្ឌថ្មីទាំងពីនេះឡើង មិន មែន ដើម្បីចែកអំណាចគ្នានោះទេ គឺចង់ឲ្យអភិបាលខណ្ឌ ក៏ដូចជាក្រុមប្រឹក្សាទាំងអស់ បានចុះទៅឲ្យបានកៀកកិតជាមួយប្រជាជន ស្តារបញ្ហា និងដោះស្រាយបញ្ហាឲ្យបានទាន់ពេលវេលា ឆ្លើយតបនឹងតម្រូវការចាំបាច់របស់ប្រជាពលរដ្ឋ ពិសេសអ្នករស់នៅជាយៗរាជធានីភ្មំពេញ ទាំងការបំរើសេវាសាធារណៈ បញ្ហាការការពារសន្តិសុខ សណ្តាប់ធ្នាប់ បរិស្ថាន និងអនាម័យជាដើម ដែលត្រូវយកចិត្តទុកដាក់ខ្ពស់បន្ថែមទៀត។
សូមបញ្ជាក់ថា៖ ខណ្ឌកំបូល ត្រូវបានបង្កើតឡើងតាមអនុ ក្រឹត្យរបស់រាជរដ្ឋាភិបាល កាលពីថ្ងៃទី៨ ខែមករា ឆ្នាំ២០១៩នេះ ដោយបំបែកចេញពីខណ្ឌពោធិ៍សែនជ័យ និងខណ្ឌដង្កោ ក្នុងនោះមានសង្កាត់ចំនួន៧ គឺសង្កាត់ កំបូល, កន្ទោក, ស្នោ,ភ្លើងឆេះរទេះ ប្រទះឡាង,ឪឡោក និងសង្កាត់បឹងធំ ៕ សំរិត
