សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បើករថយន្តហាយឡេនឌ័រមួយគ្រឿង ក្នុងល្បឿនលឿនទាំងមេឃកំពុងធ្លាក់ភ្លៀង រេចង្កូតជ្រុលទៅបុករបាំងថ្ម ពុះចែកទ្រូងផ្លូវបណ្តាលឲ្យខ្ទាតខុសទម្រង់ដើម៣កង់ រថយន្តដាច់កាឡេ ខ្ទេចមុខមួយចំហៀង ។
ហេតុការណ៍នេះបានកើតឡើង កាលពីវេលាម៉ោង១០ និង៣០នាទីយប់ ថ្ងៃទី២២ ខែមិថុនា ឆ្នាំ២០១៩ ស្ថិតនៅតាមបណ្តោយផ្លូវសហព័ន្ធរុស្សី ភូមិក្បាលដំរី២ សង្កាត់កាកាប២ ខណ្ឌពោធិសែនជ័យ រាជធានីភ្នំពេញ ។
សាក្សីនៅកន្លែងកើតហេតុបានឲ្យដឹងថា មុនពេលកើតហេតុគេឃើញរថយន្តបង្ក ម៉ាក ហាយឡេនឌ័រ ពណ៌ត្រាវ ពាក់ស្លាកលេខភ្នំពេញ2AK-4294អ្នកបើកបរដោយបុរសម្នាក់មិនបានប្រាប់ពីអត្តសញ្ញាណ បានបើកល្បឿនលឿន តាមបណ្តោយផ្លូវសហព័ន្ធរុស្សីពីកើតទៅលិច ខណៈដែលមេឃកំពុងភ្លៀង លុះដល់ចំណុចកើតហេតុ បានរេចង្កូតបុកទ្រូងផ្លូវតែម្តង ដាច់កាឡេ ទៅមុខលែងរួច អ្នកបើកបររងរបួសស្រាលចំណែក ទ្រូងផ្លូវប៉ើងខ្ទាតចំនួន០៣កង់ ភ្លាមៗដោយសាមេឃកំពុងរលឹមធ្លាក់ភ្លៀងខ្លាចមានរថយន្តផ្សេងមកបុកបន្ថែម ប្រជាពលរដ្ឋក៍បានយកធុងសំរាមមកដាក់ជាសញ្ញា ។
ក្រោយកើតហេតុ រថយន្តខាងលើត្រូវ សមត្ថកិច្ចមកស្ទូចអូសយកទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ រង់ចាំដោះស្រាយពេលក្រោយ ៕ សុខាសែនជ័យ
