សារព័ត៌មាន នគរវត្ត តែងតែនាំមុខគេជានិច្ច
ខេត្តក្រចេះ៖ សាកសពឆេះខ្លោចនៅក្នុងព្រៃចំការកៅស៊ូ ត្រូវប្រជាពលរដ្ឋបានប្រទះឃើញនៅក្នុងភ្នក់ភ្លើង ក្បែរម៉ូតូមួយគ្រឿងផងដែរ ។
ហេតុការណ៍នេះភ្ញាក់ផ្អើលនៅវេលាម៉ោង ១២.០០នាទី ថ្ងៃថ្ងៃពុធ ៩ រោច ខែជេស្ឋ ឆ្នាំកុរឯកស័ក ពុទ្ធសករាជ ២៥៦៣ ត្រូវនឹងថ្ងៃទី២៦ ខែមិថុនា ឆ្នាំ២០១៩ត្រង់ចំណុចផ្លូវកាំភ្លើងធំ ក្នុងឡូតិ៍ចម្ការកៅស៊ូក្រុមហ៊ុនស្នួល ភូមិដូនប៉ុក ឃុំស្រែចារ ស្រុកស្នួល ខេត្តក្រចេះ ។
តាមប្រភពថា គេប្រទះឃើញមនុស្សដេកស្លាប់ឆេះក្នុងភ្នក់ភ្លើង ក្បែរម៉ូតូមួយគ្រឿង ក្នុងដីឡូតិ៍ចំការកៅស៊ូចម្ងាយពីផ្លូវលំប្រមាណ១០០ម៉ែត្រប៉ុណ្ណោះ ត្រូវបានគេដឹងថា ជនរងគ្រោះឈ្មោះ ខុម សិទ្ធ ភេទប្រុស អាយុ ២៣ឆ្នាំ ជនជាតិខ្មែរ រស់នៅភូមិដូនប៉ុក ឃុំស្រែចារ ស្រុកស្នួល ខេត្តក្រចេះ ។
ប្រភពបន្តថា ជនរងគ្រោះកន្លងមកធ្លាប់បានប្រើប្រាស់សារធាតុញៀនទៀតផង ។
ជីដូនរបស់សាកសពប្រាប់ថា មុនពេលកើតហេតុវេលាម៉ោងប្រហែល ១០.០០នាទីព្រឹកថ្ងៃដដែល ជនរងគ្រោះបានសុំលុយចំនួន ២០០០រៀល (ពីរពាន់រៀល) ដើម្បីទៅកាប់អុស ក្នុងចម្ការកៅស៊ូហើយជិះម៉ូតូម៉ាក សង់ការ៉េ ពណ៌ក្រហម គ្មានស្លាកលេខ (ម៉ូតូចាស់) និងកាំបិតផ្គាក់មួយចេញទៅតែម្នាក់ឯងទេ លុះដល់វេលាម៉ោងកើតហេតុខាងលើ ស្រាប់តែមានកម្មករជៀរជ័រកៅស៊ូ ប្រទះឃើញមសាកសព មិនស្គាល់អត្តសញ្ញាណ ឆេះស្លាប់ នៅក្បែរម៉ូតូនោះតែម្តង ។
សាកសពឆេះខ្លោចមើលមិនស្គាល់ទេ ទើបរាយការណ៍ជូនសមត្ថកិច្ចភ្លាមៗហើយកម្លាំងសមត្ថកិច្ច ក៏បានចុះដល់ កន្លែងកើតហេតុហ៊ុមព័ទ្ធ និងស្រាវជ្រាវរកសាច់ញាតិ អត្តសញ្ញាណនៃសពនោះភ្លាម ។
កម្លាំងជំនាញក្រោយពីបានហ៊ុមព័ទ្ទកន្លែងកើតហេតុពិនិត្យឃើញមានស្រាបៀរកម្ពុជាចំនួន ៣កំប៉ុង ប្រអប់ស្នោមួយ ក្រៅពីនោះពុំមានអ្វីគួរកត់សម្គាល់នោះទេ។
សមត្ថកិច្ចជំនាញក៏កំពុងធ្វើការស្រាវជ្រាវតាមនីតិវិធីបន្តទៀតផងដែរ ៕ ជីវន្ត័
