សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាល៖ សាកសពបុរសម្នាក់ ត្រូវបានឃាតកដៃដល់យកមកផ្លុងចោលតាមអូរដងផ្លូវ នៅចំណុចស្ពានព្រែករូងទី២ ផ្លូវជាតិលេខ៨ ចន្លោះគីឡូម៉ែតលេខ ២៨-២៩ ភូមិអន្លង់ ឃុំព្រែកតាមាក់ ស្រុកខ្សាច់កណ្តាល ខេត្តកណ្តាល បង្កការភ្ញាក់ផ្អើលកាលពីព្រឹក ថ្ងៃអាទិត្យ ១៣ រោច ខែជេស្ឋ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី៣០ ខែមិថុនា ឆ្នាំ២០១៩ ហើយត្រូវបានសមត្ថកិច្ចអះអាងថា ជាករណីប្លន់សម្លាប់យករថយន្ត។
មន្រ្តីនគរបាលស្រុកខ្សាច់កណ្តាលនៅព្រឹកថ្ងៃទី១ ខែកក្កដា ឆ្នាំ២០១៩ ឲ្យដឹងថា ក្រោយស្រាវជ្រាវជាជំហ៊ានដំបូង បានបង្ហាញថា ករណីនេះជាអំពើសម្លាប់យករថយន្តពីជនរងគ្រោះ ដែលបានជួលដឹកមនុស្សចេញ ពីក្រុងប៉ោយប៉ែត ឆ្ពោះមកភ្នំពេញ ។ មកដល់ពេលនេះកម្លាំងជំនាញ ខេត្តកណ្តាលកំពុង សហការជាមួយកម្លាំងសមត្ថកិច្ចពាក់ព័ន្ធ បាននិងកំពុងតាមដានស្រាវជ្រាវដើម្បីបំបែកសំណុំរឿងមួយនេះហើយ ។
ប្រភពដដែលបានឲ្យដឹងទៀតថា នៅវេលាម៉ោង៨និង៣០នាទីព្រឹកថ្ងៃអាទិត្យ ១៣រោច ខែជេស្ឋ ឆ្នាំកុរ ឯកស័ក ពស ២៥៦៣ ត្រូវនឹងថ្ងៃទី៣០ ខែមិថុនា ឆ្នាំ២០១៩នៅ ចំណុចស្ពានព្រែករូងទី២ ផ្លូវជាតិលេខ៨ ចន្លោះគីឡូម៉ែត្រលេខ ២៨-២៩ ភូមិអន្លង់ ឃុំព្រែកតាមាក់ ស្រុកខ្សាច់កណ្តាល ខេត្តកណ្តាល មានការភ្ញាក់ផ្អើលមួយដោយប្រជាពលរដ្ឋបានប្រទះឃើញសពជនបុរសម្នាក់ នៅអូរក្បែរចិញ្ចើមថ្នល់ រួចនាំគ្នារាយការណ៍ប្រាប់សមត្ថកិច្ចមូលដ្ឋាន ។
ក្រោយសមត្ថកិច្ចជំនាញទទួលដំណឹងនេះភ្លាម ក៏ទៅដល់កន្លែងកើតហេតុដើម្បីស្រាវជ្រាវនិងធ្វើកោសល្យវិច័យ ទើបដឹងថា ជនរងគ្រោះមានឈ្មោះ មឿក សុភ័ណ ភេទប្រុស អាយុ៣៧ ឆ្នាំ ជនជាតិខ្មែរ មុខរបរបើកបររថយន្តឈ្នួលមានទីលំនៅ ភូមិចំបក់ ឃុំបឹងបេង ស្រុកម៉ាឡៃ ខេត្តបន្ទាយមានជ័យ។សាកសពបុរសនេះដេកផ្កាប់មុខបែរក្បាលទៅទិសខាងលិចចម្ងាយ ៧,៣០ម៉ែត្រ ពីចិញ្ចើមផ្លូវជាតិ ពាក់អាវយឺតដៃវែង ពណ៌ខ្មៅ មានឆ្នូតបីពណ៌លឿង ខាងខ្នងមានអក្សរ LFC រូបហង្ស មានរូតពីមុខ អាវយឺត សក់ខ្លី ខាងក្នុងដៃខ្លីពណ៌ខៀវលាយខ្មៅ ស្លៀកខោជើងវែងសាច់ក្រណាត់គគីរ ពណ៌ដី ខោទ្រនាប់ក្នុងពណ៌ក្រហម ពាក់ខ្សែចង្កេះនិង មានកម្ពស់ ១,៥៥ ម៉ែត្រ ។នៅដៃទាំងសងខាងនៃសពមានចងខ្សែភ្លើងពណ៌លឿងរិតភ្ជាប់គ្នា នៅត្រង់កមានខ្សែក្រវាត់រឹតជាប់នឹងក មានស្នាមទ្រុឌកលើគ្រាប់ពោនពីមុខដល់គល់ថ្គាមទាំងសងខាង។ក្រោយការពិនិត្យសមត្ថកិច្ចជំនាញសន្និដ្ឋានថា ជាករណីឃាតកម្មស្លាប់ដោយចោររឹតកប្លន់យករថយន្ត ប៉ុន្តែមិនបញ្ជាក់ឲ្យដឹងថារថយន្តនោះម៉ាកអ្វីនោះទេ ។
រីឯវត្ថុតាងជាឧបករណ៍ធ្វើមនុស្សឃាតរឹបអូសបាន មានរ៉ូឡូភ្លើងពណ៌លឿងចំនួន ១ មានខ្សែភ្លើងពណ៌លឿងមួយកំណាត់ ប្រវែង ២,៦៤ម៉ែត្រ ជាប់នឹងរ៉ូឡូខ្សែក្រវ៉ាត់ក្បាលដែកមានរូបក្បាលខ្មោចចំនួន០១ មានប្រវែង ១,០៩ម៉ែត្រខ្នើយចំនួន១។ ដោយឡែកសាកសពត្រូវបានសមត្ថកិច្ចជំនាញប្រគល់ឲ្យក្រុមគ្រួសារដឹកយកទៅធ្វើបុណ្យតាមប្រពៃណី៕
ដោយ៖ សហការី
