សារព័ត៌មាន នគរវត្ត តែងតែនាំមុខគេជានិច្ច
នៅថ្ងៃគម្រប់ខួប២២ឆ្នាំ ដែលហុងកុងត្រូវបានអង់គ្លេស សងទៅឲ្យចិនវិញ នាថ្ងៃទី១ ខែកក្កដា ក្រុមបាតុករ បានសម្រុកចូលដណ្តើមទីតាំងរដ្ឋាភិបាល បង្កឲ្យមានអំពើហិង្សាកើតឡើង ។
ក្រុមបាតុករបានប្រើប្រាស់រថយន្តបុកទម្លុះរនាំងការពារ ចូលទៅគ្រប់គ្រងទីតាំងសំខាន់ៗរបស់រដ្ឋ ធ្វើឲ្យកម្លាំងសន្តិសុខត្រូវប្រើប្រាស់ឧស្ម័នបង្ហូរទឹកភ្នែក ។ គោលដៅរបស់ក្រុមបាតុករគឺរារាំងពិធីគោរពទង់ជាតិ ក្នុងឱកាសខួបទី២២ ថ្ងៃអង់គ្លេសប្រគល់ឲ្យចិនវិញ នាថ្ងៃ១ ខែកក្កដា ដោយមានការចូលរួមពីមេដឹកនាំកោះហុងកុង គឺលោកស្រី Carrie Lam ។
ក្រុមបាតុករប្រឆាំងរដ្ឋាភិបាលហុងកុងរាប់ពាន់នាក់ បាននាំគ្នាដណ្តើមគ្រប់គ្រងអគាររដ្ឋសភា ប៉ុន្តែនៅព្រឹកព្រលឹមថ្ងៃទី២ ខែកក្កដា ឆ្នាំ២០១៩ កងកម្លាំងប៉ូលិសបង្ក្រាបបាតុកម្មបានបាញ់ឧស្ម័នបង្ហូរទឹកភ្នែក បំបែកហ្វូងបាតុរទាំងនោះ ហើយបានគ្រប់គ្រងស្ថានការទាំងស្រុង នៅទីតាំងអគាររដ្ឋសភានោះឡើងវិញ ។
មេដឹកនាំដែនដីហុងកុង លោកស្រី Carrie Lam បានថ្លែងថ្កោលទោសអំពើហិង្សា និងការដណ្តើមគ្រប់គ្រងអគាររដ្ឋាភិបាល ពីសំណាក់ហ្វូងបាតុករនៅពេលនេះ ។ លោកស្រីបានថ្លែងថា វាជារឿងគួរឲ្យរន្ធត់ចិត្ត និងតក់ស្លុតបំផុត ។
សូមបញ្ជាក់ថា ផ្តើមចេញពីច្បាប់ធ្វើបត្យាប័នពីហុងកុងទៅចិនដីគោក បាននាំឲ្យមានរលកបាតុកម្មពីពលរដ្ឋហុងកុងរាប់ពាន់នាក់ ប្រឆាំងរដ្ឋាភិបាល ទាមទារឲ្យលុបច្បាប់ និងទាមទារឲ្យមេដឹកនាំដែនដីនេះចុះចេញពីតំណែង ដែលអូសបន្លាយមកដល់ពេលនេះ ៣សប្តាហ៍មកហើយ ។
ក្រុមបាតុករដែលខឹងសម្បារនោះ កាលពីថ្ងៃទី១ ខែកក្កដា បានទម្លុះរបាំងការពាររបស់នគរបាល សម្រុកចូលទៅកាន់អគាររដ្ឋសភា រុះរើសម្ភារ ខណៈកំពុងតែមានការបះទង្គិចជាមួយប៉ូលិសកើតឡើងនោះ ។ ហ្វូងបាតុករភាគច្រើនជាមនុស្សវ័យក្មេង ពាក់អាវ និងមួកពណ៌លឿង ។
ប៉ូលិសបានព្រមានអំពីវិធានការបន្តបង្ក្រាបទៅលើក្រុមបាតុករ ។ លុះវេលាម៉ោងរំលងអធ្រាត្រ ឈានចូលថ្ងៃទី២ ខែកក្កដា ប៉ូលិសបានមកពីទិសដៅផ្សេងៗ បាញ់ឧស្ម័នបង្ហូរទឹកភ្នែក បំបែកក្រុមបាតុករតែម្តង ។ ទីក្រុងទាំងមូលពោរពេញដោយផ្សែង និងការប្រឈមមុខតានតឹង ។ គ្មានការចាប់ខ្លួនណាម្នាក់ត្រូវបានប្រកាសនោះទេ ។
ស្នងការប៉ូលិសក្រុងហុងកុង លោក Stephen Lo បានថ្លែងថា «បាតុករ ធ្វើសកម្មភាពហិង្សា រុលទៅមុខហួសពីដែនកំណត់ ស្តីអំពីការទាមទារ ឬបាតុកម្មដោយសន្តិវិធី» ។
ពុំមានការផ្សាយពីគ្រោះថ្នាក់ របួស ឬស្លាប់ ទាំងខាងបាតុករ និងខាងប៉ូលិសនោះទេ អំឡុងពេលហេតុការណ៍ប៉ះទង្គិចគ្នា កើតឡើងកាលពីព្រឹកថ្ងៃទី២ ខែកក្កដា ឆ្នាំ២០១៩នេះ ។
ក្រុមបាតុករបានទាមទារឲ្យលោកស្រី Carrie Lam លាលែងពីតំណែងផងដែរ តាមអ្វីដែលពួកគេយល់ឃើញថា គឺដើម្បីសង្គ្រោះសិទ្ធិសេរីភាពនៅហុងកុងដែលត្រូវបានរិតត្បិតជាយូរឆ្នាំមកហើយនោះ ៕
