ចោរស្ទើរភ្លើង ឆក់កាបូបបានសម្រេច តែរត់មិនរួចពីខ្នោះរបស់សមត្ថកិច្ច

ខេត្តសៀមរាប៖ មន្ត្រីនគរបាលខេត្តសៀមរាប កាលពីថ្ងៃទី២ ខែកក្កដា ឆ្នាំ២០១៩ បានរាយការណ៍មកថា បានឃាត់ខ្លួនយុវជនកំហូច២នាក់ ភ្លាមៗ បន្ទាប់ពីពួកគេធ្វើសកម្មភាព (ឆក់កាបូប ) កាលពីថ្ងៃទី១ ខែកក្កដា ឆ្នាំ២០១៩ វេលាម៉ោង៩ និង៣០នាទីព្រឹក កើតហេតុនៅចំណុចមុខប្រាសាទល្មុង ភូមិត្រពាំងសេះ សង្កាត់គោកចក ក្រុងសៀមរាប ។

សមត្ថកិច្ចបានឲ្យដឹងថា ជនសង្ស័យចំនួន២នាក់ ទី១.ឈ្មោះ ក្រិត វណ្ណថី ភេទប្រុស អាយុ១៨ឆ្នាំ មុខរបរសិស្ស ទីលំនៅភូមិបារយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ (អ្នកបើកបរម៉ូតូ និងលូកឆក់) ។ ទី២.ឈ្មោះ អ៊ុក រិទ្ធករុណា ភេទប្រុស អាយុ១៥ឆ្នាំ ទីលំនៅភូមិអូរបែកក្អម សង្កាត់ទឹកថ្លា ខណ្ឌសែនសុខ រាជធានីភ្នំពេញ (អ្នកជិះក្រោយចូលរួមធ្វើសកម្មភាព) ជិះម៉ូតូ១គ្រឿង ម៉ាកហុងដា ស្កុបពី ស៊េរីឆ្នាំ២០២០ ពណ៌ខ្មៅ លាយទឹកមាស ពាក់ស្លាកលេខ ភ្នំពេញ ១HS.៨៩៥៦ បន្ទាប់ពីពួកគេធ្វើសកម្មភាពរួច បានជិះគេចខ្លួន តែដោយសារមានការស្រែកពីសំណាក់ជនរងគ្រោះ មន្ត្រីនគរបាលបានសហការគ្នាចាប់បានរួមទាំងវត្ថុតាងតែម្ដង ។

បច្ចុប្បន្នជនសង្ស័យទាំង២នាក់ ត្រូវបានសមត្ថកិច្ចកសាងសំណុំរឿង ដើម្បីចាត់ការតាមច្បាប់ ៕ ប៊ុនរិទ្ធី