សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ យ៉ាងហោចណាស់មនុស្សប្រុសស្រី៣នាក់ស្លាប់ និងរបួសធ្ងន់២នាក់ ដោយសារករណីគ្រោះថ្នាក់ចរាចរណ៍គួរឲ្យរន្ធត់រវាងរថយន្ត២គ្រឿង បុកស្របទិសគ្នាពីលិចមកកើតពេញទំហឹងលាន់ដូចរន្ទះបាញ់ បង្កការភ្ញាក់ផ្អើលដល់អ្នកភូមិ និងសមត្ថកិច្ចទាំងយប់ ។
ហេតុការណ៍នេះ បានកើតឡើងកាលពីវេលាម៉ោង១១ និង៣០នាទីយប់ ថ្ងៃពុធ ៤កើត ខែអាសាឍ ឆ្នាំកុរ ឯកស័ក ព.ស ២៥៦៣ ត្រូវ នឹងថ្ងៃទី៣ ខែកក្កដា ឆ្នាំ២០១៩ ស្ថិតនៅលើផ្លូវជាតិលេខ១ ចន្លោះគីឡូម៉ែត្រលេខ១៥៩ និង១៦០ ភូមិត្រពាំងផ្លុង សង្កាត់បាទី ក្រុងបាវិត ខេត្តស្វាយរៀង ។
បើតាមសមត្ថកិច្ចនគរបាលបានឲ្យដឹងថា នៅមុនកើតហេតុ មានរថយន្ត១គ្រឿង ម៉ាក់ព្រួស ពាក់ស្លាកលេស្វាយរៀង ២AX-៥៦៤៣ ទិសដៅពីលិចមកកើត បើកបរដោយបុរសម្នាក់មិនស្គាល់អត្តសញ្ញាណ និងអ្នករួមដំណើរប្រុសស្រី៤នាក់ ជនជាតិចិន ខណៈប្រើប្រាស់ល្បឿនលឿន ខ្វះប្រុងប្រយត្ន័ ក៏បុករថយន្តមួយគ្រឿងទៀត មិនស្គាល់ម៉ាក ស្របទិសគ្នាពីក្រោយពេញទំហឹងបង្កការភ្ញាក់ផ្អើលតែម្ដង ។
បច្ចុប្បន្ន អ្នករងគ្រោះធ្ងន់ប្រុសទាំង២នាក់ បានបញ្ជូនទៅព្យាបាលនៅមន្ទីរពេទ្យបង្អែកខេត្តស្វាយរៀង និងសាកសព៣នាក់ បានយកទៅរក្សាទុកនៅវត្តពោធិថ្មី (ហៅវត្តបាវិត) ដើម្បីរង់ចាំប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណីខ្មែរ ។
រីឯវត្ថុតាងសមត្ថកិច្ចបានវាស់វែង និងយកមករក្សាទុកនៅអធិការដ្ឋាននគរបាលក្រុងបាវិត ដើម្បីបំពេញសំណុំរឿងទៅតាមច្បាប់ ។
សមត្ថកិច្ចបានបញ្ជាក់ថា មូលហេតុអ្នកបើកបររថយន្តម៉ាកព្រួសប្រើប្រាស់ល្បឿនលឿនខ្វះការប្រុងប្រយត្ន័ ៕ យឹម សុថាន
