សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ កម្មករសំណង់២នាក់ ជាមុខសញ្ញាចោរប្លន់ បានយកដាវជាអាវុធធ្វើសកម្មភាព ភ្ជង់ប្លន់យកម៉ូតូ សេ១២៥ ស៊េរី២០១៩ បានសម្រេចហើយ នៅតាមផ្លូវបេតុងបុរីជា រី ភូមិព្រៃព្រីងត្បូង១ សង្កាត់ចោមចៅ២ កាលពីវេលាម៉ោង៤ព្រឹក ថ្ងៃទី០៣ ខែកក្កដា ឆ្នាំ២០១៩ ហើយរត់គេចបាត់ រហូតដល់វេលាម៉ោង៧ និង៣០នាទីយប់ ថ្ងៃដដែល ត្រូវបានជនរងគ្រោះ និងសមត្ថកិច្ចតាមរកឃើញជនសង្ស័យ បានរត់ឆ្លងផ្លូវជាតិលេខ៣ ពីបុរីជា រី ទៅសម្ងំលាក់ខ្លួនក្នុងការដ្ឋានសំណង់ បុរី ធូន លន ផ្លូវជាតិលេខ៣ ភូមិព្រៃព្រីង២ សង្កាត់ចោមចៅ៣ ខណ្ឌពោធិសែនជ័យ ចាប់ក្របួចជាប់ ដកហូតបានដាវមួយដើម ចំណែកបក្ខពួកគេចខ្លួនបាត់ ។
ជនសង្ស័យឈ្មោះ សុវណ្ណ រតនា ភេទប្រុស អាយុ២៣ ឆ្នាំ មុខរបរកម្មករសំណង់ ស្នាក់នៅបុរីធូ លន ភូមិ ព្រៃព្រីងត្បូង២ សង្កាត់ចោមចៅទី៣ ខណ្ឌពោធិ៍សែន មានស្រុកកំណើតនៅភូមិ អន្លង់គគី ឃុំស្តៅ ស្រុកកងមាស ខេត្តកំពង់ចាម ។ ចំណែកជនរងគ្រោះឈ្មោះ ម៉ៅ មួន ភេទប្រុស អាយុ២៩ ឆ្នាំ មុខរបរកម្មករសំណង់ ជាង បៀកថ្នាំ និងស្នាក់នៅ ក្នុងការដ្ឋានសំណង់បុរីជា រី ដែលស្ថិតនៅភូមិព្រៃព្រីងត្បូង១ សង្កាត់ចោមចៅ២ ខណ្ឌពោធិ៍សែនជ័យ ។ រីឯម៉ូតូដែលជនសង្ស័យប្លន់យកទៅបាត់ ម៉ាកហុងដា សេ១២៥ ស៊េរី២០១៩ ពណ៌ខ្មៅពាក់ស្លាកលេខ ភ្នំពេញ1HH-8559 ។ ជនសង្ស័យ និងជនរងគ្រោះជាមនុស្សធ្លាប់ស្គាល់គ្នា ខណៈដែលធ្វើជាកម្មករ នៅក្រុមហ៊ុន ជា រី និង ធូ លន តែមួយទេ ។
តាមប្រភពបានឲ្យដឹងថា កាលវេលាម៉ោង៤ព្រឹក ថ្ងៃទី០៣ ខែកក្កដា ឆ្នាំ២០១៩ ជនសង្ស័យ ប្រើប្រាស់ដាវ ធ្វើសកម្មភាពភ្ជង់គម្រាមប្លន់យកម៉ូតូ របស់ជនរងគ្រោះ តាមផ្លូវបេតុង ក្នុងបុរី ជា រី ខាងកើតផ្លូវជាតិលេខ៣ លុះដល់តាមស្រាវជ្រាវ រកឃើញចាប់ខ្លួនជនសង្ស័យបាន កំពុងសង្ងំលាក់ខ្លួនក្នុងបុរី ធូ លន ខាងលិចផ្លូវជាតិលេខ៣ ទល់មុខគ្នាម្ខាងម្នាក់ នៅវេលាម៉ោង៧ និង៣០នាទីយប់ ថ្ងៃដដែលនេះ ចំណែកម៉ូតូ របស់ជនរងគ្រោះ ត្រូវបានបក្ខពួកយកគេចទៅបាត់ ។
បច្ចុប្បន្នជនសង្ស័យត្រូវបាននគរបាលកសាងសំណុំរឿងបញ្ជូនទៅអធិការដ្ឋាននគរបាលខណ្ឌពោធិ៍សែនជ័យរងចាំដោះស្រាយតាមច្បាប់ ៕ សុខាសែនជ័យ
