សារព័ត៌មាន នគរវត្ត តែងតែនាំមុខគេជានិច្ច
ស្ថានភាពនៅតាមបណ្តោយព្រំដែនកាស្មៀរ រវាងឥណ្ឌា នឹងប៉ាគីស្ថាន ប្រឈមមុខតានតឹងសារជាថ្មី ក្រោយពេល ស្ងប់ស្ងាត់ជាច្រើនថ្ងៃកន្លងមក ។ នៅពេលនេះ កម្លាំងទាហានការពារព្រំដែនប្រទេសទាំងពីរបានប៉ះទង្គិចគ្នា ដោយអាវុធ ទ្រង់ទ្រាយធំ ។
សារព័ត៌មានឥណ្ឌា បានផ្សាយថា កាលពីថ្ងៃទី៥ ខែកក្កដា មានការផ្ទុះអាវុធទ្រង់ទ្រាយធំបានកើតឡើងកាលពីថ្ងៃទី៥ ខែកក្កដា រវាងកងកម្លាំងឥណ្ឌា និងប៉ាគីស្ថាន ស្ថិតនៅតំបន់ ស LoC គឺតំបន់ Jummu និង Kashmir ។
អ្នកនាំពាក្យក្រសួងការពារជាតិឥណ្ឌា លោក Devender Anand ថ្លែងប្រាប់កាសែត IANS ផ្សាយថា កងទ័ពប៉ាគីស្ថានបានរំលោភលើកិច្ចព្រមព្រៀងឈប់បាញ់ ជាមួយការបាញ់កាំភ្លើងត្បាល់ចូលមកតំបន់ស នៅវេលាម៉ោងប្រហែល២១ ម៉ោងនៅក្នុងស្រុក ថ្ងៃសុក្រ ទី៥ ខែកក្កដា ឆ្នាំ២០១៩ ។
សារព័ត៌មានដដែលបញ្ជាក់ថា ការរំលោភបំពានកិច្ចព្រមព្រៀងឈប់បាញ់កើតឡើងនៅចំណុច Nowshera ស្រុក Rajouri ដែលជាចំណុចទីតាំង Jammu និង Kashmir ។ កងទ័ពប៉ាគីស្ថានបានចាប់ផ្តើមបាញ់កាំភ្លើងធុនតូច បន្ទាប់មកកាំភ្លើងត្បាល់ចូលទៅក្នុងតំបន់ Loc ។ ពុំមានរបាយការណ៍អំពីខូចខាត ឬស្លាប់មនុស្សនោះទេ ៕
យោធាប៉ាគីស្ថានមិនបានចេញធ្វើអត្ថាធិប្បាយ ឬថ្លែងការណ៍អ្វីមួយទាក់ទងបញ្ហាខាងលើនេះនៅឡើយទេ ។
នៅអំឡុងពេលជាមួយគ្នានេះផងដែរ សារព័ត៌មានIANS នៅបានផ្សាយថា ការបាញ់ប្រហារគ្នាទៅវិញទៅមកកើតមានឡើងនៅតំបន់ LoC គឺកំពុងតែបន្តកើតមានដដែល ៕
