សារព័ត៌មាន នគរវត្ត តែងតែនាំមុខគេជានិច្ច
ការរំលោភផ្លូវភេទទៅលើ សិស្ស និស្សិត ពីសំណាក់ លោកគ្រូផ្ទាល់ បានបង្កក្តីកង្វល់យ៉ាងខ្លាំង ដល់ពលរដ្ឋបង់ក្លាដែសទំាងមូល ពិសេស គឺអាណាព្យាបាល សិស្ស ដែលមានកូនស្រីទៅរៀន ។ ជនរងគ្រោះមួយចំនួនធំមិនហ៊ានប្តឹងនោះឡើយ ដោយខ្លាច ជនដៃដល់សងសឹក ឬប្តឹងមិនឈ្នះគេ ដោយសារតែជនល្មើសមានលុយ មានអំណាច ។
កន្លងមក និស្សិតដ៏ស្រស់ស្អាតម្នាក់ ត្រូវនិស្សិតជាច្រើននាក់ចាក់សាំងដុតសម្លាប់ទាំងរស់ ព្រោះហ៊ានប្ដឹងនាយកវិទ្យាល័យពីបទបំពានផ្លូវភេទ ។ រឿងរ៉ាវនិស្សិតស្រី វ័យ១៩ឆ្នាំ ត្រូវគេចាក់សាំងដុតទាំងរស់ ដោយសារតែនាងហ៊ានប្តឹងនាយកសាលាពីបទបៀតបៀនផ្លូវភេទនោះ បង្កការខឹងសម្បារយ៉ាងខ្លាំងពីមហាជន គ្រប់ទិសទីពេញពិភពលោក ។
នាង Nusrat Jahan Rafi ជានិស្សិតដែលមានសម្រស់ស្រស់ស្អាតជាងគេនៅក្នុងមហាវិទ្យាល័យ ត្រូវនាយកមហាវិទ្យាល័យ ល្មោភកាម ហៅនាងចូលក្នុងបន្ទប់ រួចបៀតបៀនផ្លូវភេទ ។ តែនាងត្រូវបានក្រុមនិស្សិតប្រុសស្រីជាច្រើននាក់ទៀតចាប់ចាក់សាំងដុតនាងទាំងរស់ នៅក្នុងមហាវិទ្យាល័យ តែម្តង ដោយសារតែនាងបានប្តឹងនាយកមហាវិទ្យាល័យ ពីបទបៀតបៀនផ្លូវភេទនេះ ។ ហេតុការណ៍ខាងលើកើតឡើងនៅភាគខាងត្បូង ទីក្រុង Dhaka ប្រទេសបង់ក្លាដែស ។
នៅពេលនេះ នាយកសាលានៅជាយក្រុង Dhaka ប្រទេសបង់ក្លាដែស ត្រូវបានប៉ូលិសចាប់ខ្លួន ដោយចោទប្រកាន់ពីបទចាប់រំលោភសិស្ស ជាច្រើននាក់នាពេលកន្លងមក ធ្វើឲ្យមហាជនខឹងសម្បារយ៉ាងខ្លាំង ។
កាលពីថ្ងៃទី៥ ខែកក្កដា រដ្ឋាភិបាលបង់ក្លាដែសបានប្រកាសថា កម្លាំងប៉ូលិសបានចាប់ខ្លួន នាយកសាលា ដោយចោទប្រកាន់ពីបទរំលោភបំពានទៅលើសិស្សដល់ទៅ១២នាក់ ។ ក្រោយបែកធ្លាយ ព័ត៌មានខាងលើ ពលរដ្ឋខឹងសម្បារយ៉ាងខ្លាំង ដោយនាំគ្នាធ្វើបាតុកម្មប្រឆាំង ។
ប៉ូលិសបានចាប់ខ្លួន លោក al Amin នាយកសាលា និងជាអ្នកបង្កើតសាលា Baitul Huda Cadet Madrassa ក្នុងទីក្រុង Fatulla ជាយក្រុង Dhaka។ កន្លងមក ម្តាយរបស់កុមារី អយុ១០ឆ្នាំម្នាក់បានដាក់លិខិត ប្តឹង នាយកសាលា រំលោភបំពានផ្លូវភេទ លើកូនស្រីរបស់គត់ ។
ការចាប់ខ្លួនធ្វើឡើងនៅថ្ងៃទី៥ ខែកក្កដា ដោយពេលដំបូង នាយកសាលាខាងលើបានច្រានចោលការចោទប្រកាន់ ប៉ុន្តែក្រោយមកក៏បានសារភាព ។ កុមារីដល់ទៅ១២នាក់ ក្លាយជាជនរងគ្រោះ ក្នុងហេតុការណ៍នោះ ។
កាលពីសប្តាហ៍កន្លងមក ប៉ូលិសបង់ក្លាដែស ក៏បានចាប់ខ្លួនគ្រូបង្រៀនថ្នាក់មធ្យមពីរនាក់ ដែលរំលោភសិស្ស ដល់ទៅ២០នាក់ ។ ប្រភពព័ត៌មានបានឲ្យដឹងថា គ្រូបង្រៀនមួយចំនួនជា គ្រូតិរច្ឆាន ដោយបានរំលោភសិស្សជាច្រើន ។ មិនតែប៉ុណ្ណោះ ថែមទាំងរំលោភម្តាយរបស់សិស្សមួយចំនួនទៅទៀតក្នុងរយៈពេល៤ឆ្នាំកន្លងមក ។
តាមរបាយការណ៍របស់អង្គការណ៍ Manusher Jonno Foundation បានឲ្យដឹងថា នៅឆ្នាំ២០១៨ មានកុមារបង់ក្លាដែស ៤៣៣នាក់ ត្រូវគេរំលោភបំពាន មានអាយុចាប់ពី៧-១២ឆ្នាំ ។ ក្នុងចំណោមនោះ មានការរំលោភ តែ៣ភាគរយប៉ុណ្ណោះ ត្រូវបានចាប់កាត់ទោស ក្រៅពីនេះ គឺជនល្មើសរួចខ្លួនជានិច្ច ដោយសារតែមានអំណាច និងមានលុយកាក់ច្រើន៕
