សារព័ត៌មាន នគរវត្ត តែងតែនាំមុខគេជានិច្ច
អ៊ីស្រាអែលបង្កើនការប្រុងប្រយ័ត្នយ៉ាងខ្លាំង ក្រោយពេលអ៊ីរ៉ង់បង្កើនសកម្មភាពផលិតអាវុធ ក្នុងនោះមានការបង្កើនចម្រើនសារធាតុអ៊ុយរ៉ានីញ៉ូម ។ នាយករដ្ឋមន្ត្រីអ៊ីស្រាអែល បានប្រកាសថា ប្រសិនបើអ៊ីរ៉ង់វាយប្រហារទៅលើ ទីតាំងបរមាណូ Dimona របស់អ៊ីស្រាអែលនោះ នឹងទទួលរងការវាយបកវិញ ដោយបរមាណូទៅលើទីតាំងនានារបស់អ៊ីស្រាអែលជាមិនខាន ។
កន្លងមកថ្មីៗ អ៊ីរ៉ង់ប្រកាសបន្តចម្រើនសារធាតុអ៊ុយរ៉ានីញ៉ូម ។ កាលពីថ្ងៃទី៧ ខែកក្កដា អ៊ីរ៉ង់បានប្រកាសថា នឹងបង្កើនការចម្រើនសារធាតុអ៊ុយរ៉ានីញ៉ូម លើសពីកម្រិត នៅក្នុងកិច្ចព្រមព្រៀងកាលពីឆ្នាំ២០១៥ ដែលជាកម្រិតមួយអាចផលិតបរមាណូ ។ សកម្មភាពខាងលើធ្វើឲ្យអាមេរិកបារម្ភកាន់តែខ្លាំង ។
ការប្រឈមមុខតានតឹង រវាងអាមេរិក និងអ៊ីរ៉ង់ បានធ្វើឲ្យបារាំង អង់គ្លេស អាល្លឺម៉ង និងភាគីដែលបានចុះហត្ថលេខាលើកិច្ចព្រមព្រៀងកាលពីឆ្នាំ២០១៥នោះ ។ នៅក្នុងសន្និសីទកាសែត មន្ត្រីជាន់ខ្ពស់ អ៊ីរ៉ង់ បានប្រកាសថា នឹងបន្តចម្រើនធារធាតុអ៊ុយរ៉ានីញ៉ូម ក្នុងមួយដំណាក់កាលមាន៦០ថ្ងៃ រហូតដល់ទៅ ភាគីចុះហត្ថលេខានៅអ៊ឺរ៉ុប ធានា ការពារអ៊ីរ៉ង់រួចផុតពីទណ្ឌកម្ម របស់អាមេរិក ។
លោក Behrouz Kamalvandi អ្នកនាំពាក្យអង្គការថាមពលបរមាណូអ៊ីរ៉ង់បានប្រកាសឲ្យដឹងថា«យើងបានត្រៀមលក្ខណគ្រប់គ្រាន់ក្នុងការចម្រើនសារធាតុអ៊ុយរ៉ានីញ៉ូម គ្រប់កម្រិត និងចំនួនដែលយើងចង់ធ្វើ» ។ លោកបន្តទៀតថា នៅប៉ុន្មានម៉ោងទៀតការចម្រើនបានលើកពីកម្រិត ៣,៦៧ភាគរយនឹងបញ្ចប់ ហើយកម្រិតនៅក្នុងកិច្ចព្រមព្រៀង ត្រឹមតែ៣ភាគរយប៉ុណ្ណោះ ។
នាយករដ្ឋមន្ត្រីអ៊ីស្រាអែល លោក Benjamin Netanyahu បានបញ្ជាក់ថា នេះជាសកម្មភាព ដ៏គ្រោះថ្នាក់ ហើយលោកអំពាវនាវជាថ្មី ដល់សហគមន៍អឺរ៉ុប មានវិធាតុការទប់ស្កាត់ទីក្រុងតេអ៊ីរ៉ង់ ។ លោកបន្តទៀតថា គោលដៅតែមួយគត់នៃការចម្រើនធារធាតុអ៊ុយរ៉ានីញ៉ូមនោះ គឺផលិតគ្រាប់បែកបរមាណូ ។
សកម្មភាពខាងលើរបស់អ៊ីរ៉ង់ ទទួលរងការព្រមានយ៉ាងខ្លាំងពីប្រធានាធិបតីអាមេរិក ដូណាល់ ត្រាំ ។ លោកត្រាំបានលើកឡើងថា «ល្អបំផុតអ៊ីរ៉ង់ត្រូវតែប្រយ័ត្នក្រោយប្រកាសចម្រើនសារធាតុអ៊ុយរ៉ានីញ៉ូម» ។
ប្រធានាធិបតីអាមេរិក លោក ដូណាល់ ត្រាំ បានព្រមាន ទៅលើរដ្ឋាភិបាលទីក្រុង តេអ៊ីរ៉ង់ ពីលទ្ធផលអាក្រក់ ក្រោយពេល អ៊ីរ៉ង់ ប្រកាសបន្តបង្កើនការចម្រើនសារធាតុអ៊ុយរ៉ានីញ៉ូម ។
ប្រធានាធិបតី ដូណាល់ ត្រាំ មានប្រសាសន៍ទៅកាន់ក្រុមអ្នកសារព័ត៌មាន នៅទីក្រុង New Jersey អាមេរិក កាលពីថ្ងៃទី៧ខែកក្កដា ថា«អ៊ីរ៉ង់ ល្អបំផុតត្រូវតែប្រយ័ត្ន ដោយអ្នកចម្រើនសារធាតុអ៊ុយរ៉ានីញ៉ូមដោយមូលហេតុផ្សេង ល្អបំផុត ត្រូវតែប្រយ័ត្ន ។
ជាមួយគ្នានេះដែររដ្ឋមន្ត្រីការបរទេសអាមេរិក លោក Mike Pompeo បានប្រកាសថា អ៊ីរ៉ង់នឹងត្រូវប្រឈមការដាក់ទណ្ឌកម្មថ្មីបន្ថែមទៀត នៅពេលដែលប្រទេសនេះបង្កើនការចម្រើនសារធាតុអ៊ុយរ៉ានីញ៉ូម ។ លោក Mike Pompeo បានប្រកាសនៅលើបណ្តាញ Twitter ថា«សកម្មភាពពង្រីកកម្មវិធីបរមាណូ អ៊ីរ៉ង់ ធ្វើឲ្យប្រទេសនេះ ត្រូវរងទណ្ឌកម្មកាន់តែខ្លាំងឡើង ។
ប៉ុន្តែក្រមអ្នកឯកទេសបានបញ្ជាក់ថា សកម្មភាពរបស់អ៊ីរ៉ង់ ដោយសារតែអាមេរិក និងសម្ព័ន្ធមិត្តនៅក្នុងតំបន់ មានកម្មភាពយោធាប៉ុនប៉ងវាយប្រហារទៅលើប្រទេសអ៊ីរ៉ង់ ។ ទាំងនោះហើយអ៊ីរ៉ង់ចាំបាច់ត្រូវតែបង្កើន ការផលិតអាវុធដើម្បីការពារខ្លួន ។ កន្លងមករុស្ស៊ី និងចិន ធ្លាប់បានលើកឡើងថា ការបង្កើនកម្មវិធីបរមាណូគឺដោយសារតែអាមេរិក និងអាមេរិក ។
កន្លងមក មេដឹកនាំរដ្ឋាភិបាលអ៊ីរ៉ង់ លោកប្រធានាធិបតី Hassan Rouhani បានចោទប្រកាន់មហាអំណាចអាមេរិក ដែលបានដាក់ទណ្ឌកម្មមកលើទីក្រុងតេងអេរ៉ង់នោះថា ជាអំពើ «ភេរវកម្ម» ។
ខុទ្ទកាល័យប្រធានាធិបតីអ៊ីរ៉ង់ បានបញ្ជាក់ថា ប្រធានាធិបតីអ៊ីរ៉ង់ លោក Hassan Rouhani ដែលបានសន្ទនា តាមទូរស័ព្ទជាមួយសមភាគីបារាំង គឺលោកប្រធានាធិបតី Emmanuel Macron កាលពីថ្ងៃសៅរ៍ ទី៦ ខែកក្កដា បានហៅការដាក់ទណ្ឌកម្មដាក់មកលើទីក្រុងតេអេរ៉ង់របស់សហរដ្ឋអាមេរិកថា ជាអំពើ “ភេរវកម្ម” ហើយបានព្រមានថា “សង្គ្រាមសេដ្ឋកិច្ច” អាចនឹងបន្តកើតមាន ហើយវានឹងប៉ះពាល់ដល់ពិភពលោកទាំងមូល ។
គេហទំព័រផ្លូវការរបស់ប្រធានាធិបតីអ៊ីរ៉ង់បានផ្សាយកាលពីរសៀលថ្ងៃទី៦ ខែកក្កដាថា «លោក (Rouhani)ក៏បានពណ៌នាផងដែរ ការដាក់ទណ្ឌកម្មរបស់អាមេរិកប្រឆាំងនឹងប្រទេសអ៊ីរ៉ង់ ថា ជាអំពើភេរវកម្ម និងសង្រ្គាមសេដ្ឋកិច្ចយ៉ាងពេញលេញ” ។
មេដឹកនាំអ៊ីរ៉ង់ បានប្រាប់លោក Macronថា ប្រសិនបើសម្ពាធសេដ្ឋកិច្ចរបស់អាមេរិកនៅតែបន្តកើតមាននោះ វានឹងមានផលវិបាកនៅក្នុងតំបន់ និងនៅជុំវិញពិភពលោកទាំងមូល ។
លោក Rouhani បានថ្លែងនៅក្នុងសេចក្តីថ្លែងការណ៍ថា «ការបន្តសង្គ្រាមសេដ្ឋកិច្ច អាចនាំទៅរកការគំរាមកំហែងផ្សេងៗទៀត នៅក្នុងតំបន់ និងនៅលើពិភពលោក» ។
ក្នុងអំឡុងពេលនៃការសន្ទនាតាមទូរស័ព្ទនោះផងដែរ លោកប្រធានាធិបតីអ៊ីរ៉ង់ ក៏បានទទូចដល់សហភាពអឺរ៉ុប ឲ្យខិតខំបន្ថែមទៀត ដើម្បីរក្សាកិច្ចព្រមព្រៀងនុយក្លេអ៊ែរអ៊ីរ៉ង់ ដែលសហរដ្ឋអាមេរិកបានដកខ្លួនចេញជាងមួយឆ្នាំមកហើយ ។
លោក Rouhani បានថ្លែងថា ទោះបីជារងការដាក់ទណ្ឌកម្មរបស់អាមេរិកក៏ដោយ ក៏អ៊ីរ៉ង់នៅតែព្យាយាមរក្សាកិច្ចព្រមព្រៀង JCPOA អស់រយៈពេល១៤ខែ ជាមួយនឹងការអត់ធ្មត់ជាយុទ្ធសាស្ត្រ ។
ប្រធានាធិបតីអាមេរិក លោក Donald Trump បានប្រកាសនៅខែឧសភា ឆ្នាំ២០១៨ថា សហរដ្ឋអាមេរិកនឹងដកខ្លួនចេញពីកិច្ចព្រមព្រៀងនុយក្លេអ៊ែរអ៊ីរ៉ង់ (JCPOA)ឆ្នាំ២០១៥ ដោយសារតែអ៊ីរ៉ង់រំលោភបំពានកិច្ចព្រមព្រៀងនេះ ។ មិនយូរប៉ុន្មានបន្ទាប់ពីចាកចេញពី JCPOA, សហរដ្ឋអាមេរិក បានដាក់ទណ្ឌកម្មសេដ្ឋកិច្ចឡើងវិញ ប្រឆាំងនឹងអ៊ីរ៉ង់ភ្លាម ៕
