ព័ត៌មានទាន់ហេតុការណ៍៖

ទីបំផុត…មេក្លោងបំផ្លាញព្រៃឈើធំជាងគេ គឺឧកញ៉ា សុឹង សំអុល និងបក្ខពួក៣រូប ត្រូវបានកម្លាំងអាវុធហត្ថលើផ្ទៃប្រទេសឃាត់ខ្លួន ជាមួយឡានជាង៤០គ្រឿង កំពុងធ្វើកំណត់ហេតុស្តាប់ចម្លើយនៅខេត្តមណ្ឌលគិរី

ចែករំលែក៖

ខេត្តមណ្ឌលគិរី៖ ទីបំផុត…ជុងអត់ភ្លេចកុកមែន …មានតែកុកទេភ្លេចជុង..គឺជើងខ្លាំងបំផ្លាញព្រៃឈើប្រចាំភូមិភាគឥឦសាន្ត ឧកញ៉ា សុឹង សំអុល ត្រូវបានឃាត់ខ្លួន ជាមួយនិងបក្ខពួក៣នាក់ទៀត និងរឹបអូសបានឡានជាង៤០គ្រឿង បន្ទាប់ពីកងរាជអាវុធហត្ថលើផ្ទៃប្រទេសចេញសេចក្តីប្រកាសព័ត៍មាន បើកយុទ្ធនាការបង្ក្រាបបទល្មើសធនធានធម្មជាតិបាន១ថ្ងៃក្រោយមក ដោយគ្មានការអនុគ្រោះជនបំផ្លាញព្រៃឈើ និងដុតបំផ្លាញសំភារៈជាមធ្យោបាយបទល្មើសបំផ្លាញចោល តាមរយៈស្នើសុំគោលការណ៍។

ក្រុមការងារបានរាយការណ៍មកថា៖ កម្លាំងអាវុធហត្ថបើកប្រតិបត្តិការទ្រង់ទ្រាយធំបង្ក្រាបបទល្មើសព្រៃឈើ នៅខេត្តមណ្ឌលគិរី ចាប់ខ្លួនឧកញ៉ា ស៊ឹង សំអុល និងបក្ខពួក៣នាក់, រឹបអូសរថយន្ដជាង៤០គ្រឿង ត្រៀមបំផ្លាញចោលនៅនឹងកន្លែង ដែលជាក្តីបំណងរបស់ប្រជាពលរដ្ឋចង់បាន គាំទ្រនូវកណ្តាប់ដៃដែកនេះ ហើយនិងមានជនពាក់ព័ន្ធបន្ត បន្ទាប់ពីមន្ត្រីនគរបាលយុត្តិធម៍កងរាជអាវុធហត្ថធ្វើកំណត់ហេតុស្តាប់ចម្លើយជនសង្ស័យខាងលើនេះ។
ប្រតិបត្តិការបង្ក្រាបបទល្មើសព្រៃឈើទ្រង់ទ្រាយធំ នៅខេត្តមណ្ឌលគិរី បានធ្វើឡើងនៅរសៀលថ្ងៃទី០៩ ខែកក្កដា ឆ្នាំ២០១៩នេះ ។ ជាកម្លាំងគណៈកម្មាធិការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ ក្រោមការដឹកនាំបញ្ជាផ្ទាល់ពីនាយឧត្តមសេនីយ៍ សៅ សុខា ជាប្រធានគណៈកម្មាធិការជាតិ បានបង្ក្រាបក្នុងរូបភាពទ្រង់ទ្រាយធំ ដោយចាប់ខ្លួនមនុស្ស៤នាក់ ក្នុងនោះមានឧកញ៉ា ស៊ឹង សំអុល ប្រធានក្រុមហ៊ុន ម៉ាស្ទ័រខេសាន់ មេការ២នាក់ និងអ្នកបើករថយន្តម្នាក់ ព្រមទាំងដកហូតរថយន្ដជាង៤០គ្រឿងផងដែរ ក្នុងបទល្មើសជាក់ស្តែង។
លោកឧត្តមសេនីយ៍ត្រី អេង ហ៊ី អ្នកនាំពាក្យគណៈកម្មការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ បានប្រាប់បណ្ដាញសារព័ត៌មាន នៅរសៀលថ្ងៃនេះថា ៖ ជាលទ្ធផលក្នុងប្រតិបត្តិការទ្រង់ទ្រាយធំនេះ កម្លាំងអាវុធហត្ថបានចាប់ខ្លួនមនុស្ស៤នាក់ ដែលមានឧកញ៉ា ស៊ឹង សំអុល ប្រធានក្រុមហ៊ុន មេការ និងអ្នកបើករថយន្ត ព្រមទាំងរថយន្ដជាង៤០គ្រឿង។
លោកឧត្តមសេនីយ៍បានបញ្ជាក់ទៀតថា រថយន្ដល្មើសផ្សេងទៀត ត្រូវបានឈ្មូញយកទៅលាក់ទុកនៅក្នុងព្រៃ ហើយនៅពេលនេះកម្លាំងជំនាញ កំពុងរុករកយ៉ាងក្ដៅគគុក។ លោកឧត្តមសេនីយ៍ អេង ហ៊ី បានបញ្ជាក់ទៀតថា រថយន្ដដែលសមត្ថកិច្ចរកឃើញនៅក្នុងព្រៃ នឹងបំផ្លាញចោលនៅទីនោះតែម្ដង។
អ្នកនាំពាក្យរូបនេះ ក៏បានអំពាវនាវឲ្យក្រុមឈ្មួញដែលពាក់ព័ន្ធបទល្មើសព្រៃឈើនេះ ត្រូវដកខ្លួនចេញជាបន្ទាន់ បើមិនដូច្នោះទេ នឹងត្រូវប្រឈមមុខនឹងផ្លូវច្បាប់ជាក់ជាមិនខានឡើយ។
សូមបញ្ជាក់ថា ប្រតិបត្តិការដ៏ក្តៅគគុកនេះ បានកើងមានឡើងបន្ទាប់ពីគណៈកម្មការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ បានសម្រេចដាក់ចេញនូវវិធានការថ្មីៗបន្ថែមទៀត ដើម្បីរឹតបន្តឹងច្បាប់ឲ្យបានតឹងរ៉ឹង និងសម្រេចឲ្យមានការបំផ្លាញចោលមធ្យោបាយដឹកជញ្ជូនបទល្មើសព្រៃឈើ នៅនឹងកន្លែងតែម្តង។
លោកឧត្តមសេនីយ៍ អេង ហ៊ី បានបញ្ជាក់ថា កន្លងទៅគណៈកម្មការជាតិ បានធ្វើការត្រួតពិនិត្យឃើញថា ទោះបីមានការផ្សព្វផ្សាយអប់រំ និងបង្ក្រាបបទល្មើសព្រៃឈើជាបន្តបន្ទាប់ក៏ដោយ នៅតែមានការលួចបន្លំកាប់ឈើ ដឹកជញ្ជូនផលអនុផលព្រៃឈើដោយខុសច្បាប់ តាមគ្រប់មធ្យោបាយគ្រប់រូបភាព។
លោកបន្តថា ដើម្បីថែរក្សាបានព្រៃឈើគង់វង្ស គណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ នឹងអនុវត្តវិធានការដូចក្រោម៖
*ទី១៖ បុគ្គល ឬក្រុមហ៊ុន ដែលពាក់ព័ន្ធការប្រព្រឹត្តល្មើសច្បាប់នេះ នឹងត្រូវអនុវត្តវិធានការច្បាប់តឹងរ៉ឹង។
*ទី២៖ មធ្យោបាយ (រថយន្ត គោយន្ត ម៉ូតូ…) ដែលពាក់ព័ន្ធនឹងបទល្មើសព្រៃឈើនេះ ត្រូវបានស្នើសុំទៅអាជ្ញាធរមានសមត្ថកិច្ច ដើម្បីបំផ្លាញចោលនៅនឹងកន្លែង។
លោកឧត្តមសេនីយ៍ក៏បានអំពាវនាវដល់សមត្ថកិច្ចជំនាញ អាជ្ញាធរមានសមត្ថកិច្ចគ្រប់ថ្នាក់ មេត្តារួមគ្នាគិត រួមគ្នាធ្វើ និងរួមគ្នាទទួលខុសត្រូវ និងសូមអំពាវនាវដល់ ប្រជាពលរដ្ឋទាំងអស់ ផ្លាស់ប្តូរផ្នត់គំនិត ពីការប្រកបមុខរបរកាប់ឈើ ដឹកជញ្ជូនឈើខុសច្បាប់ ទៅប្រកបមុខរបរស្របច្បាប់វិញ ដើម្បីរួមគ្នាការពារបរិស្ថាន និងការបម្រែបម្រួលអាកាសធាតុ។
សូមបញ្ជាក់ថា៖ ដោយសារឧកញ៉ា សុឹង សំអុល បានឃុបឃិតគ្នាជាមួយនាយផ្នែករដ្ឋបាលព្រៃឈើកោះញែក នាយខណ្ឌរដ្ឋបាលព្រៃឈើ លោក អ៊ុំ វណ្ណសុភក៍ ,លោក សុង ឃាង ប្រធានមន្ទីរកសិកម្មរុក្ខាប្រមាញ់ និងនេសាទ គឺអោយ ឧកញ៉ា សុឹង សំអុល កេណ្ឌប្រមូលមនុស្សអោយចូលកាប់ អារផ្តួលរលំឈើក្រៅពីតំបន់ក្រុមហ៊ុនម៉ាស្ទ័រខេសាន់ អូសចូលក្រុមហ៊ុន លួចកាត់PCស្របច្បាប់ និងដឹកជញ្ជូនលើPC ទៀតផង។
សមត្ថកិច្ច ជំនាញ ជាច្រើនស្ថាប័ននៅខេត្តមណ្ឌលគិរី អាចលោះព្រលឹង នៅមិនសុខ ដេកមិនលក់ បក់មិនល្ហើយ ខណៈមានប្រវត្តិទទួលសំណូក ឧកញ៉ា សុឹង សំអុល ក្នុងចេតនាទុច្ចរិតបំផ្លាញព្រៃឈើនៅខេត្តមណ្ឌលគិរី។
លោកឧត្តមសេនីយ៍ អេង ហ៊ី បានបញ្ជាក់ថា៖ ឧកញ៉ា សុឹង សំអុល និងបក្ខពួក៣នាក់ទៀត កំពុងនាំខ្លួនមកសាកសួរនៅបញ្ជាការដ្ឋាន កងរាជអាវុធខេត្តមណ្ឌលគិរីតាមនីតិវិធី៕

ដោយ៖ សុខ ខេមរា


ចែករំលែក៖