សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ ប្រជាពលរដ្ឋក្នុងខេត្តស្វាយរៀង មានការសប្បាយចិត្តយ៉ាងខ្លាំង ខណៈដែលនាពេលខាងមុខ នឹងមានរៀបចំការប្រកួតកីឡាទូកប្រពៃណីខ្នាតអន្តរជាតិ ទូកនាគ ពានរង្វាន់សម្តេចក្រឡាហោម ស ខេង ភូមិភាគវាលរាប លើកទី១ ឆ្នាំ២០១៩ នៅទន្លេវ៉ៃគោ ក្រុងស្វាយរៀង ។
លោក ម៉ែន វិបុល អភិបាលខេត្តស្វាយរៀង ក៏បានសម្តែងនូវងនូវការអរគុណ និងស្វាគមន៍យ៉ាងកក់ក្ដៅចំពោះប្រតិភូសហព័ន្ធកីឡាទូកកានូ និងរ៉ូអ៊ីងកម្ពុជា ដែលបានជ្រើសរើសយកទីតាំងទន្លេវ៉ៃគោ ក្រុងស្វាយរៀង ខេត្តស្វាយរៀង ធ្វើជាម្ចាស់ផ្ទះក្នុងការប្រកួត ។
ក្នុងនោះ រដ្ឋបាលខេត្តស្វាយរៀង នឹងចូលរួមសហការទៅលើកិច្ចការងារផ្សេងៗដូចជា សន្តិសុខ សណ្តាប់ធ្នាប់ អនាម័យបរិស្ថាន និងការងារសំខាន់ៗមួយចំនួនទៀត ដើម្បីឲ្យការរៀបចំព្រឹត្តិការណ៍នេះប្រព្រឹត្តទៅដោយរលូន បង្កភាពសប្បាយរីករាយជូនដល់បងប្អូនប្រជាពលរដ្ឋ និងទទួលបានលទ្ធផលជោគជ័យល្អប្រសើរប្រកបដោយសុវត្ថិភាព។
សូមជម្រាបជូនថា ព្រឹត្តិការណ៍នៃការប្រកួតទូកប្រពៃណីខ្នាតអន្តរជាតិ ពានរង្វាន់សម្តេចក្រឡាហោម ស ខេង ភូមិភាគវាលរាប លើកទី១ ឆ្នាំ២០១៩នេះ ក៏មានការដាក់តាំងពិពណ៌ផ្សព្វផ្សាយលក់ ផលិតផលជាតិ-អន្តរជាតិ ការប្រគុំតន្ត្រី ព្រមទាំងការហាត់សមរបស់កីឡាករទូកចាប់ពីថ្ងៃទី២២ តទៅ និងដល់ថ្ងៃទី២៧-២៨ខែកក្កដា ឆ្នាំ២០១៩ ជាថ្ងៃប្រកួតផ្លូវការយកចំណាត់ថ្នាក់ផ្តាច់ព្រ័ត្រ ដែលប្រព្រឹត្តទៅនៅតាមបណ្តោយមាត់ទន្លេវ៉ៃគោ ក្រុងស្វាយរៀង ខេត្តស្វាយរៀងហេតុដូចបានជម្រាបជូន លោក លោកស្រី អ្នកនាងកញ្ញាយុវជន យុវតីនិងបងប្អូនប្រជាពលរដ្ឋចូលរួមទស្សនាឲ្យបានច្រើនកុះករនៅទន្លេវ៉ៃគោ ៕ យឹម សុថាន
