សារព័ត៌មាន នគរវត្ត តែងតែនាំមុខគេជានិច្ច
ក្រោយពេលជួបគ្រោះថ្នាក់ពីរលើកផ្ទួនគ្នា នូវប្រភេទយន្តហោះ 737 MAX ក្រុមហ៊ុនប៊ូអ៊ីន បានបាត់បង់អតិថិជនជាច្រើន នៅជុំវិញពិភពលោក ហើយអតិថិជនទាំងនោះ ក៏បានងាកទៅទិញយន្តហោះពីក្រុមហ៊ុន អ៊ែរបឺស វិញម្តង ។ កត្តាទាំងនោះហើយ បានធ្វើឲ្យ ប៊ូអ៊ីន បាត់បង់តំណែងជាក្រុមហ៊ុនផលិតយន្តហោះលំដាប់ទី១ លើពិភពលោក ។
ក្រុមហ៊ុនផលិតយន្តហោះ Boeing កំពុងតែប្រឈមនឹងការបាត់បង់តំណែងជាអ្នកផលិត និងផ្គត់ផ្គង់យន្តហោះ ធំបំផុតនៅលើពិភពលោក ក្រោយពេលការបញ្ជាទិញយន្តហោះ ពីអតិថិជនថយចុះ រហូតដល់ទៅ៣៧ភាគរយ ក្នុងរយៈពេល៦ខែដើមឆ្នាំ២០១៩ ដោយសារតែការផ្អាកហោះហើរ ប្រភេទយន្តហោះ 737 MAX ។
ការបញ្ជាទិញយន្តហោះពី Boeing ធ្លាក់ចុះខ្លាំង បើប្រៀបធៀបនឹងក្រុមហ៊ុន ផលិតយន្តហោះនៅអឺរ៉ុប អ៊ែរប៊ឺស ។ ក្នុងរយៈពេល៦ខែ ដើមឆ្នាំ២០១៩ ក្រុមហ៊ុន អ៊ែរប៉ឺស បានប្រគល់យន្តហោះឲ្យអតិថិជនដល់ទៅ៣៨៩គ្រឿង កើនឡើង ២៨ភាគរយ ។ ចំណែកប៊ូអ៊ីនថយចុះ៣៧ភាគរយ ។
ដើម្បីទប់ទល់នឹងលទ្ធផលអាក្រក់ ក្រុមហ៊នប៊ូអ៊ីន បានកាត់បន្ថយការផលិតយន្តហោះប្រភេទ MAX ពី៥២គ្រឿង សល់តែ៤២គ្រឿងប៉ុណ្ណោះ ក្រៅពីនេះ ក្រុមហ៊ុនបានខាត់បង់ប្រាក់១ពាន់លានដុល្លារក្នុង ត្រីមាសទី១ ឆ្នាំ២០១៩ ។ តាមការព្យាករណ៍នៅក្នុងត្រីមាសទីពីរក្រុមហ៊ុននឹងបន្តខាតបង់ទៀត ។
កាលពីថ្ងៃទី៧ ខែកក្កដា កន្លងមក ក្រុមហ៊ុន អាកាសចរណ៍ Flyadeal របស់អារ៉ាប៊ីសាអូឌីត បានសម្រេចលុបចោល ការបញ្ជាទិញយន្តហោះ៣០គ្រឿង ជាមួយប៊ូអ៊ីននៅប្រភេទយន្តហោះ737MAX។ ក្រុមហ៊ុនបានងាកទៅទិញយន្តហោះ Airbus A320 របស់ក្រុមហ៊ុន អ៊ែរប៊ឺសវិញម្តង ។ កិច្ចព្រមព្រៀងដែលក្រុមហ៊ុនបានលុបចោលមានតម្លៃដល់ទៅ៦ពាន់លានដុល្លារ ៕
