សារព័ត៌មាន នគរវត្ត តែងតែនាំមុខគេជានិច្ច
ពលរដ្ឋហ្វីលីពីន ព្រួយបារម្ភយ៉ាងខ្លាំងពីគ្រោះរញ្ជួយដី កម្រិត៥,៥រិចទ័រវាយប្រហារ តំបន់ភាគខាងត្បូងប្រទេសនេះ កាលពីថ្ងៃ ទី១៥ ខែកក្កដា ឆ្នាំ២០១៩ ។
ប្រភពព័ត៌មានបានឲ្យដឹងថា រញ្ជួយដី ៥.៥រ៉ិចទ័រ ស្ថិតនៅក្នុងខេត្ត Surigao del Sur ភាគខាងត្បូងហ្វីលីពីនកាលពីព្រឹកថ្ងៃទី១៤ ខែកក្កដា ឆ្នាំ២០១៩ បណ្តាលឲ្យបាក់រលំ លំនៅឋានច្រើនខ្នង, ខូចខាតព្រះវិហារ និងអគារជាច្រើនទៀត និងបណ្តាលឲ្យមនុស្សរងរបួសយ៉ាងតិច៥១នាក់ ។
វិទ្យាស្ថានសិក្សាពីបាតុភូតភ្នំភ្លើង និងបាតុភូតរញ្ជួយដីហ្វីលីពីន (Phivolcs) បានបញ្ជាក់ថា ការរញ្ជួយដីកើតឡើងនៅវេលាម៉ោង៤និង៤២នាទី ទៀបភ្លឺ (ម៉ោងនៅក្នុងតំបន់) មានជម្រៅ៥គីឡូម៉ែត្រ ស្ថិតនៅប្រហែល៩គីឡូម៉ែត្រភាគអាគ្នេយ៍ទីក្រុង Carrascal និងនៅភាគឦសានឈូងសមុទ្រដែនកោះ Mindanao ។
ក្រុមប្រឹក្សាគ្រប់គ្រង និងកាត់បន្ថយគ្រោះមហន្តរាយជាតិ (NDRRMC)របស់ហ្វីលីពីនបញ្ជាក់ថា ទីក្រុងចំនួន៥រងការខូចខាតដោយសារតែការរញ្ជួយដីនៅពេលនេះ ។ ព្រះវិហារចំនួនពីរកន្លែងនទីក្រុងឈូងសមុទ្រ Lanuza និង Carmen បានខូចខាត រួមជាមួយផ្ទះ និងអគារជាច្រើនកន្លែងទៀត ។ ពិតានព្រះវិហារនៅទីក្រុង Carmen ត្រូវគេរាយការណ៍បានបាក់រលំ ។
ប្រភព Phivolcs បញ្ជាក់ថា ការរញ្ជួយដីនេះញាប់ញ័រទៅដល់តំបន់ Butuan, Tandag និង Cagayan de Oro ហើយនិង Misamis Oriental ភាគខាងត្បូងហ្វីលីពិនផងដែរ ៕
