ព័ត៌មានទាន់ហេតុការណ៍៖

ប្រធានាធិបតីតួកគី ៖ ណាតូ គួរតែសប្បាយពេលទីក្រុងអេនការ៉ា មានមីស៊ីលការពារ S-400

ចែករំលែក៖

តួកគី ជាប្រទេសសមាជិកអង្គការណាតូ ដែលបានទិញមីស៊ីលការពារដ៏ទំនើបពីរុស្ស៊ី ។ ប្រទេសណាតូ ក្នុងនោះមានអាមេរិកបានថ្កោលទោសយ៉ាងខ្លាំង ដល់តួកគី ដែលទិញមីស៊ីលពី សត្រូវ​ ។ ប៉ុន្តែចំពោះប្រធានាធិបតីតួកគី​វិញ បានលើកឡើងថា ណាតូ គួរតែសប្បាយពីប្រទេសជាសមាជិក​ មានមីស៊ីលការពារដ៏ទំនើបបែបនេះ ។

ផ្ទុយទៅវិញ រដ្ឋាភិបាល​អាមេរិក ក្រោមការដឹកនាំរបស់លោក​ប្រធានាធិបតី ដូណាល់ ត្រាំ កំពុងមានគម្រោង​ដាក់ទណ្ឌកម្មជាកញ្ចប់ ទៅ​លើរដ្ឋាភិបាល​តួកគី បន្ទាប់ពី​ប្រទេសនេះ​ បាន​បញ្ជាទិញ និងដឹកញ្ជូន​ប្រព័ន្ធមីស៊ីការពារដែនអាកាសដ៏ទំនើប​ពីប្រទេសរុស្ស៊ី S-400 ។

កាលពីមុន អាមេរិក​បានគំរាមកំហែង​លុបតួកគី​ពី​កម្មវិធី​ F-35 របស់​ខ្លួន ដោយសារតែ​ការសម្រេច​ចិត្តរបស់តួកគី​ ទិញ​ប្រព័ន្ធមីស៊ីល S-400 ពីប្រទេសរុស្ស៊ី ។ ទីក្រុងវ៉ាស៊ីនតោន​និយាយថា ពួកគេអាចសម្រុះសម្រួល​យន្តហោះចម្បាំង​ផលិតដោយអាមេរិក ។

សារព័ត៌មាន​ Bloomberg បានដកស្រង់ប្រភព​ព័ត៌មាន​ចុះផ្សាយ ហើយត្រូវបានគេហទំព័រ sputniknews ដកស្រង់ចុះផ្សាយបន្ត​កាលពីថ្ងៃទី១៣ ខែកក្កដា ឆ្នាំ២០១៩ថា ទីក្រុងវ៉ាស៊ីនតោន​កំពុងមានគម្រោង​ប្រកាស​ដាក់ទណ្ឌកម្ម​ប្រឆាំងតួកគី ទៅលើការ​ដឹកជញ្ជូន​ប្រព័ន្ធមីស៊ីល S-400 របស់រុស្ស៊ី នៅចុងសប្តាហ៍នេះ ។

មន្ត្រីមួយក្រុម​របស់រដ្ឋាភិបាល​លោកដូណាល់ ត្រាំ បានសម្រេចរួចហើយ​​ទៅលើការដាក់ទណ្ឌកម្មជាកញ្ចប់​ប្រឆាំង​ប្រទេសតួកគី ។ នេះបើតាមប្រភព​មួយ​ថ្លែងប្រាប់ភ្នាក់ងារព័ត៌មាន​ ។

កាលពីដើមសប្តាហ៍​កន្លងនេះ ប្រធានគណៈកម្មការទំនាក់ទំនង​ការបរទេស និងសេវាកម្ម​អាវុធ​របស់ព្រឹទ្ធសភាអាមេរិក បានថ្លែងការណ៍រួម​មួយបញ្ជាក់ថា លោក ត្រាំ គួរដាក់ទណ្ឌកម្ម​តួកគី ក្រោយ​ប្រទេសសមាជិក​អង្គការណាតូ​មួយនេះ​​ ដឹកជញ្ជូន​លើកដំបូងបំផុត​ប្រព័ន្ធមីស៊ីលការពារជាតិ​ S-400 ពីប្រទេសរុស្ស៊ី ។

កាលពីថ្ងៃទី១២ ខែកក្កដា ឆ្នាំ២០១៩ ក្រសួងការពារជាតិ​តួកគី បានប្រកាសថា ការដឹកញ្ជូនលើកទីមួយ​ ប្រព័ន្ធមីស៊ីលការពារដែនអាកាស S-400 បានមកដល់ទីក្រុង អេនការា (Ankara)ហើយ ។

ទីក្រុងមូស្គូ និងទីក្រុង អេនការា បានចុះហត្ថលេខាលើកកិច្ចព្រមព្រៀង​ដឹកជញ្ជូន​អាវុធ​ S-400 កាលពីខែធ្នូ ឆ្នាំ២០១៧ ។ សហរដ្ឋអាមេរិក និងអង្គការណាតូ​បានរិះគន់​ខ្លាំងក្លា​កិច្ចសហប្រតិបត្តិការ​តួកគី​ជាមួយ​រុស្ស៊ី ហើយថា ប្រព័ន្ធមីស៊ីលការពារដែនអាកាស​ S-400 វិសមិត្ត ឬដែលមិនត្រូវគ្នា​ជាមួយប្រព័ន្ធ​ការពារដែនអាការរបស់អង្គការណាតូនោះឡើយ ។ តួកគី ដែលជាសមាជិកអង្គការណាតូ​ បានអះអាងដដែលជាដដែលថា ប្រព័ន្ធមីស៊ីលនោះ​មិននាំឲ្យគំរាមកំហែងដល់សម្ពន្ធមិត្តណាមួយឡើយ ៕


ចែករំលែក៖