សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ សាកសពបុរសម្នាក់ត្រូវបានប្រជាពលរដ្ឋប្រទះឃើញស្លាប់នៅលើផ្លូវរថភ្លើង ដែលគេសន្និដ្ឋាន រថភ្លើងបើកកិន បង្កឲ្យមានការភ្ញាក់ផ្អើលដល់ប្រជាពលរដ្ឋ កាលពីវេលាម៉ោង៨ព្រឹក ថ្ងៃទី២២ ខែកក្កដា ឆ្នាំ២០១៩ នៅត្រង់ចំណុចលើថ្នល់រថភ្លើង ភូមិ ប្រទះឡាង ក្បែរ ស្ពានស្ដុក ប៉ែកខាងជើងប្រហែល300ម៉ែត្រ សង្កាត់ប្រទះឡាង ខណ្ឌដង្កោ ។
សាកសពជនរងគ្រោះមានឈ្មោះ ជ័យ ហុំ ភេទប្រុស អាយុ៤០ឆ្នាំ មុខរបរ កម្មករសំណង់ ស្នាក់នៅក្នុងការដ្ឋានសំណង់ស្ពានអាកាសចោមចៅ ក្នុងសង្កាត់ចោមចៅ៣ ខណ្ឌពោធិ៍សែនជ័យ និងមានស្រុកកំណើតក្នុងភូមិកំពង់អុស ឃុំកំពង់អុស ស្រុកជល់គិរី ខេត្តកំពង់ឆ្នាំង ។
បើតាមប្រភពពីសមត្ថកិច្ចបានឲ្យដឹងពីការបំភ្លឺពីអ្នកភូមិថា នៅវេលាម៉ោងប្រហែល១១ និង៣០នាទីយប់ ថ្ងៃទី២១ ខែកក្កដា ឆ្នាំ២០១៩ គេឃើញជនរងគ្រោះឈរលើផ្លូវបេតុងជិតថ្នល់រថភ្លើងចម្ងាយពីកន្លែងកើតហេតុ ប្រហែល៥០០ម៉ែត្រ លុះមកដល់វេលាម៉ោង៨ព្រឹក ថ្ងៃទី២២ ខែកក្កដា នេះ ស្រាប់តែប្រជាពលរដ្ឋប្រទះឃើញ ជនរងគ្រោះដេកស្លាប់នៅលើថ្នល់រថភ្លើងទៅវិញ ។
បន្ទាប់មក សាកសពត្រូវបានសមត្ថកិច្ចជំនាញ ចុះទៅពិនិត្យ និងកោសល្យវិច័យ សន្និដ្ឋានថា ពិតជាស្លាប់ដោយសាររថភ្លើង បើកកិនពិតប្រាកដមែន រួចប្រគល់ជូនក្រុមគ្រួសារចាត់ចែងដឹកយកទៅធ្វើបុណ្យតាមប្រពៃណី ៕ ភារ៉ា ដង្កោ
