សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ កម្មការិនីរោងចក្រញ៉ូហ្វូម៉ា ជាង២០នាក់ កើតមានដួលសន្លប់ ជាបន្តបន្ទាប់ ខណៈកំពុងបម្រើការងារបង្ការភ្ញាក់ផ្អើលដឹកបញ្ជូនទៅសង្គ្រោះភ្លាមៗកាលពីវេលាម៉ោង៨និង៤៥នាទីព្រឹក ថ្ងៃទី២២ ខែកក្កដា ឆ្នាំ២០១៩ ស្ថិតនៅរោងចក្រ ញ៉ូហ្វូម៉ា តាមផ្លូវបេតុង ភូមិត្រពាំងពោធិ សង្កាត់ចោមចៅ៣ ខណ្ឌពោធិសែនជ័យ ។
តាមកម្មកររោងចក្រ បានឲ្យដឹងថា មុនកើតហេតុ មានកម្មការិនីម្នាក់ គាត់មិនស្រួលខ្លួន ហើយត្រូវបាន កម្មកររួមការងារ កោសខ្យល់ជូនគាត់ ហើយចូលធ្វើការងារវិញ ស្រាប់តែនៅវេលាម៉ោងខាងលើ កម្មការិនីដដែល កើតមានអាការៈ ហេវហត់ បាក់កម្លាំង ទន់ដៃជើង ទើបបង្កឲ្យភ្ញាក់ផ្អើល ឈានដល់កម្មការិនីផ្សេងទៀត កើតជាការភិតភ័យ ដួលសន្លប់ជាបន្តបន្ទាប់ សរុបជាង២០នាក់តែម្តង ។
ករណីខាងលើកើតឡើងភ្លាមៗ ត្រូវបានកម្មកររោងចក្រ រដ្ឋបាល ដឹកបញជូនតាមម៉ូតូកង់បី បញ្ជូនទៅមន្ទីរពេទ្យ ហើយកម្លាំងសមត្ថកិច្ច អាជ្ញាធរ ក៏ចុះទៅដល់ទីតាំងកើតហេតុផងដែរ ។
តាមអាជ្ញាធរបានឲ្យដឹងថា រោងចក្រកាត់ដេរសម្លៀកបំពាក់ខាងលើ មានកម្មករសរុបចំនួនជាង៧០០នាក់ ក្រោយពីមានកម្មការិនីចំនួនជាង២០ ដួលសន្លប់ កម្មករផ្សេងទៀតត្រូវបាន ខាងក្រុមហ៊ុនរោងចក្រអនុញាតិ ឲ្យសម្រាកជាបណ្តោះអាសន្នសិន ៕ សុខាសែនជ័យ
