សារព័ត៌មាន នគរវត្ត តែងតែនាំមុខគេជានិច្ច
សកម្មភាពរបស់អាមេរិក រយៈពេលកន្លងមក ទាំងតំបន់មជ្ឈិមបូព៌ា រហូតដល់ សមុទ្រចិនខាងត្បូង ខាងកើត ក៏ដូចជាការលូកដៃចូលកិច្ចការផ្ទៃក្នុងប្រទេសមួយចំនួន ដូចវេណេហ្ស៊ុយអេឡា និងចិនជាដើម ទាំងនោះគឺជាសកម្មភាពបំផ្លាញសន្តិសុខ ស្ថេរភាពនៅលើពិភពលោកទាំងមូល ។
សកម្មភាពទាំងនោះត្រូវបានចិន ចារនៅក្នុងសៀវភៅសការពារជាតិរបស់ចិន ។ នៅក្នុងសៀវភៅស រដ្ឋាភិបាលទីក្រុងប៉េកាំងបានប្រកាសថា ស្ថានភាពពាក់ព័ន្ធ និងកោះតៃវ៉ាន កាន់តែអាក្រក់ទៅ ។ ក្រុមអ្នកគាំទ្រកោះតៃវ៉ាន ឯករាជ្យគឺជាការគំរាមកំហែង ដល់សន្តិសុខ ស្ថេរភាព និងសន្តិភាព ដល់តំបន់ និងពិភពលោកទាំងមូល ។
សារព័ត៌មានរ៉យទ័របានផ្សាយថា ក្រសួងការពារជាតិអាមេរិកនាពេលថ្មីៗនេះ បានអនុម័ត លក់អាវុធទៅឲ្យកោះតៃវ៉ានមានតម្លៃ រហូតដល់ទៅជាង២,២ពាន់លានដុល្លារ ។ សកម្មភាពទាំងនោះជាការបំពានច្បាប់ចិត តែមួយដែលអាមេរិក បានព្រមព្រៀង ។ កោះតៃវ៉ាន គ្រាន់តែជាខេត្តស្វ័យភាពមួយរបស់ចិនតែប៉ុណ្ណោះ ។
នៅក្នុងសន្និសីទកាសែតប្រកាសពីសៀវភៅការពារជាតិ តំណាងក្រសួងការពារជាតិចិនបានប្រកាសថា ចិនមិនសន្យាថានឹងមិនប្រើប្រាស់កម្លាំងយោធា អាវុធ ទៅលើតៃវ៉ាននោះឡើយ ។ ប្រសិនបើតៃវ៉ាន ប្រកាសឯករាជ្យនោះ ចិននឹងវាយប្រហារទៅលើកោះនេះជាមិនខាន ។
សៀវភៅការពារជាតិចិន មានចំណងជើងថា «ការពារជាតិក្នុងសករាជថ្មី» ត្រូវបានប្រកាសជាផ្លូវការដោយការិយាល័យព័ត៌មានជាតិ ។ សារព័ត៌មានចិនបានផ្សាយថា សៀវភៅការពារជាតិចិន និងជួយដល់សហគមន៍អន្តរជាតិយល់កាន់តែច្បាស់ពី សកម្មភាពការពារជាតិរបស់ចិន៕
