សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ ស្ថាប័នពាក់ព័ន្ធ រដ្ឋបាលមូលដ្ឋាន ត្រូវរួមគ្នាយកចិត្តទុក ដាក់ក្នុងការចុះបង្ក្រាបបទ ល្មើសជល ផលគ្រប់ប្រភេទ ជាពិសេសទប់ស្កាត់ការ ប្រើប្រាស់ឧបករណ៍នេសាទខុសច្បាប់ គ្រប់ប្រភេទ ដែលបំផ្លិចបំផ្លាញធ្ងន់ធ្ងរដល់ប្រភពទឹក និងធនធានធម្មជាតិ និងមច្ឆាជាតិ ការទន្ទ្រានដីព្រៃកោងកាង ជាកម្មសិទ្ធិ ការចាក់ដីលប់បឹង.និងដែននេសាទ។ ក្នុងនោះក៏ត្រូវខិតខំចុះពង្រឹងសមត្ថភាព របស់ សហគមន៍នេសាទ ដែលបានបង្កើតឡើងរួចហើយ ឲ្យបានរឹងមាំប្រកបដោយភាពជាម្ចាស់ការ ក្លាយជាសហគមន៍នេសាទគ្មានបទល្មើសជលផល។
នេះជាប្រសាសន៍របស់លោក គួច ចំរើន អភិបាល នៃគណៈអភិបាលខេត្តព្រះសីហនុ នៅក្នុង ពេលដែលលោកអញ្ជើញចូលរួមទិវាមច្ឆជាតិ ១ កក្កដា នាបរិវេណបឹងត្រាវ ស្ថិតក្នុងភូមិតាអោងធំ ឃុំសាមគ្គី ស្រុកព្រៃនប់ ខេត្តព្រះសីហនុ នាព្រឹកថ្ងៃសុក្រ ១០រោចខែអាសាឍ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៦ ខែកក្កដា ឆ្នាំ២០១៩ ដោយមានការចូលរួមពីមន្ត្រីរាជការ កងកម្លាំងប្រដាប់អាវុធ អាជ្ញាធរស្រុកព្រៃនប់ លោកគ្រូ អ្នកគ្រូ សិស្សានុសិស្ស និងប្រជាពលរដ្ឋរាប់រយនាក់។
នាឱកាសនោះ លោក នេន ចំរើន ប្រធានមន្ទីរកសិកម្ម រុក្ខា ប្រមាញ់ និងនេសាទខេត្តព្រះសីហនុ បានឲ្យដឹងថា ទិវាមច្ឆាជាតិ ០១ កក្កដា ឆ្នាំ២០១៩នេះ ប្រារព្ធធ្វើនៅបឹងត្រាវ ភូមិតាអោងអំ ឃុំសាមគ្គី ស្រុកព្រៃនប់ និងបានលែងកូនត្រីចំនួន ៥០.០០០ក្បាល និងមេត្រីពូជចំនួន ២០ គីឡូក្រាម ដើម្បីអភិរក្ស និងជាការថែទាំមច្ឆាជាតិឲ្យកាន់តែសំបូរបែបថែមទៀត។
លោក គួច ចំរើន អភិបាលខេត្តព្រះសីហនុ បានចាត់ទុក ការប្រារព្ធទិវាមច្ឆាជាតិ ០១ កក្កដា ឆ្នាំ២០១៩នេះឡើង ថាជាការបំផុសស្មារតីដល់ប្រជាពលរដ្ឋ មន្ត្រីរាជការ កងកម្លាំងប្រដាប់អាវុធ និងវិស័យឯកជន នុសិស្ស ឲ្យចូលរួមថែរក្សា ការពារអភិរក្ស និងបង្កើនផលស្តុកធនធានជលផលក្នុងធម្មជាតិ ឲ្យកាន់តែសំបូរបែប ដើម្បីលើកកម្ពស់ជីវភាពរស់នៅ របស់ប្រជាពលរដ្ឋនៅមូលដ្ឋាន។
លោកអភិបាលបន្តថា ទន្ទឹមនឹងការថែរក្សាត្រីធម្មជាតិ ឲ្យមាននិរន្តរភាព ការអភិវឌ្ឍវារីវប្បកម្ម ត្រូវតែជំរុញឲ្យបានខ្លាំងក្លាថែមទៀត ទាំងខ្នាតតូច មធ្យម និងខ្នាតធំ ដើម្បីឲ្យស្របតាមតម្រូវការទីផ្សារស្បៀងអាហារ និងសក្តានុពល នៃការអភិវឌ្ឍ របស់ខេត្តព្រះសីហនុបច្ចុប្បន្ន។
លោក គួច ចំរើន ឲ្យដឹងដូច្នេះ រួចបញ្ជាក់ថា មន្ត្រីស្ថាប័នជំនាញពាក់ព័ន្ធ រួមមានក្រសួង-មន្ទីរកសិកម្ម ក៏ដូចជារដ្ឋបាលជលផល ព្រមទាំងអាជ្ញាធរមូលដ្ឋានជាដើម ត្រូវលើកទឹកចិត្ត និងបង្កលក្ខណៈ ងាយស្រួលដល់វិស័យឯកជនទាំងក្នុង និងក្រៅ ប្រទេស ដើម្បីចូលរួមវិនិយោគលើការចិញ្ចឹមបង្គា ក្តាមថ្ម ត្រីសមុទ្រ ដែលមានតម្លៃខ្ពស់មានដូចជា ត្រីទឹកកែ ត្រីស្ពង់ ត្រីផ្ទក់សមុទ្រ រួមទាំងការកែច្នៃផលិតផលសមុទ្រប្រកបដោយគុណភាព សុវត្ថិភាព និងកាត់បន្ថយការនាំចូលពីប្រទេសជិតខាងនាថ្ងៃអនាគត។
ឆ្លៀតឱកាសនោះដែរ លោក គួច ចំរើន ក៏បានសំណូមពរដល់ប្រជាពលរដ្ឋនៅរាមសហគមន៍នីមួយៗ ត្រូវចូលរួមថែរក្សា អភិរក្សធន ធានធម្មជាតិជលផល ឲ្យកាន់តែសម្បូរបែប ដើម្បីពង្រឹងការគ្រប់គ្រង និងការការពារកន្លែងអភិរក្សជលផលក្នុងដែននេសាទ របស់សហគមន៍ ថែរក្សាព្រៃលិចទឹក និងព្រៃកោងកាង ឲ្យបានគង់វង្ស ដែលជាជម្រកមច្ឆាជាតិពង កូន ដ៏សំខាន់ របស់ប្រទេសកម្ពុជា។
លោក គួច ចំរើន បន្តទៀតថា ទិវាមច្ឆាជាតិ០១ កក្កដា គឺជាយុទ្ធសាស្ត្រដ៏សំខាន់ ដើម្បីរក្សាពូជត្រី ក្នុងស្រុកឲ្យបានគង់វង្ស ដើម្បីបន្តពូជនៅរដូវ ឬបណ្តាឆ្នាំក្រោយៗថែមទៀត ឲ្យស្របតាមអនុសាសន៍ដឹកនាំដ៏ថ្លៃថ្លាប្រកបដោយគតិបណ្ឌិត របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ៕ ឆ្លាមសមុទ្រ
