សារព័ត៌មាន នគរវត្ត តែងតែនាំមុខគេជានិច្ច
ដើម្បីទាក់ទាញអ្នកគាំទ្រលោកកាន់តែច្រើនឡើង នោះ ប្រធានាធិបតីអាមេរិក ដូណាល់ ត្រាំ ឡើងគម្រោងដកទាហានមួយចំនួនធំរបស់អាមេរិកចេញពីអាហ្វហ្គានីស្ថាន នៅមុនឆ្នាំ២០២០ ។
សកម្មភាពខាងលើរបស់អាមេរិកកើតឡើង ក្រោយពេលដែលអង្គការសហប្រជាជាតិចេញរបាយការណ៍ ថ្កោលទោសកម្លាំងទាហាន អាហ្វហ្គានីស្ថាននិង ណាតូ ដឹកនាំដោយអាមេរិក សម្លាប់ពលរដ្ឋជាច្រើន ។ សកម្មភាពយោធា វាយប្រហារទៅលើក្រុមភេរវកម្មនៅក្នុង ប្រទេសអាហ្វហ្គានីស្ថាននាពេលកន្លងមក របស់ ណាតូនិងទាហាន អាហ្វហ្វានីស្ថានបានសម្លាប់ពលរដ្ឋស្លូតត្រង់ជាច្រើន ។ បេសកជនអង្គការសហប្រជាជាតិ នៅថ្ងៃទី៣០ ខែកក្កដា បានចេញផ្សាយរបាយការណ៍មួយ ដោយបានបញ្ជាក់ថា កងកម្លាំងអាហ្វហ្គានីស្ថាន និងកងទ័ពអង្គការណាតូ បានសម្លាប់ជនស៊ីវិលអាហ្វហ្គានីស្ថាន ច្រើនជាងក្រុមឧទ្ទាមតាលីបង់ និងក្រុមឧទ្ទាមផ្សេងទៀត នៅពាក់កណ្តាលឆ្នាំ២០១៩នេះ ។
ប្រភពបានបញ្ជាក់ថា ជនស៊ីវិលបានស្លាប់កាន់តែច្រើនឡើងក្នុងអំឡុងពេលកងទ័ពអាហ្វហ្គានីស្ថាន និងណាតូធ្វើប្រតិបត្តិការប្រឆាំងក្រុមឧទ្ទាម ដោយក្នុងនោះមានការវាយប្រហារតាមដែនអាកាស, ការវាយឆ្មក់នៅពេលយប់ទៅលើទីតាំងលាក់ខ្លួនរបស់ពួកឧទ្ទាម ។ ពួកឧទ្ទាមតែងតែលាក់ខ្លួននៅក្នុងចំណោមជនស៊ីវិល ។
របាយការណ៍ដដែលបញ្ជាក់ថា ជនស៊ីវិលអាហ្វហ្គានីស្ថាន ៤០៣នាក់ ត្រូវបានសម្លាប់ដោយកងកម្លាំងរដ្ឋាភិបាលអាហ្វហ្គានីស្ថាននៅអំឡុងពេល៦ខែ ដើមឆ្នាំ២០១៩នេះ ខណៈ៣១៤នាក់ ត្រូវបានសម្លាប់ដោយកងកម្លាំងបរទេស សរុបទាំងអស់ជនស៊ីវិល៧១៧នាក់ដែលបានត្រូវបានសម្លាប់ ។ តួលេខនេះ បើប្រៀបធៀបអំឡុងពេលដូចគ្នា មានតែ៥៣១នាក់ប៉ុណ្ណោះ ដែលត្រូវសម្លាប់ដោយក្រុមឧទ្ទាមតាលីបង់ និងក្រុមឧទ្ទាមដទៃផ្សេងទៀត ។
របាយការណ៍ដដែលបន្តថា ក្នុងចំណោម៣០០នាក់ដែលសម្លាប់ដោយក្រុមឧទ្ទាម គឺមានគោលដៅដោយផ្ទាល់ ។ ក្រុមតាលីបង់បានវាយប្រហារស្ទើរតែរាល់ថ្ងៃ ភាគច្រើនគោលដៅទៅលើកងកម្លាំងសន្តិសុខ ។
ក្រុមតាលីបង់បានច្រានចោលការអំពាវនាវរកកិច្ចព្រមព្រៀងឈប់បាញ់ ខណៈពួកគេកំពុងពិភាក្សាជាមួយអាមេរិក ឆ្ពោះទៅរកការបញ្ចប់សង្គ្រាមរយៈពេល១៨ឆ្នាំនេះ ។ ក្រុមនេះជាសម្ព័ន្ធជាមួយរបស់ក្រុមរដ្ឋអិស្លាម វាយប្រហារកងកម្លាំងសន្តិសុខ និងក្រុមអិស្លាមនិកាយស៊ីអ៊ីដផងដែរ ។
ពាក់ព័ន្ធរបាយការណ៍ខាងលើនេះ មិនទាន់មានការអត្ថាធិប្បាយបែបណានោះទេពីរដ្ឋាភិបាលទីក្រុងកាប៊ុល ក៏ដូចជាពីកងកម្លាំងយោធាអង្គការណាតូ ៕
