សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ សេចក្តីរាយការណ៍ពីប្រជាពលរដ្ឋនៅឃុំថ្មដា ស្រុកវាលវែងថា បើទោសជាសមត្តកិច្ចប្រទេសថៃបង្រ្កាប ដោយចាប់ខ្លួនឬបាញ់រះស្លាប់ជាបន្តបន្ទាប់នាកន្លងមក ក៏ប្រជាពលរដ្ឋខ្មែរនៅតាមបន្ទាត់ព្រំដែនកម្ពុជា.ថៃ បន្តលួចចូលដើម្បីកាប់ឈើគ្រញូងរបស់គេដោយមិនញញើត ដរាបណាពួកឈ្មួញឈើគ្រញូងនៅខេត្តពោធិ៍សាត់ នៅតែប្រកៀកស្នាគ្នាជាមួយសមត្តកិច្ចនៅតំបន់នោះ ជាក់ស្ដែងកម្លាំងយោធាបានរិបអូសឈើប្រភេទប្រណីតគ្រញូងចំនួន ១០០ដុំ ឯជនប្រព្រិត្តរត់គេចខ្លួនបាត់ ។
ប្រភពរាយការណ៍ខាងលើបន្តថា ជាក់ស្ដែងនារសៀលពុធ ១៥រោច ខែអសាឍ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី៣១ ខែកក្កដា ឆ្នាំ២០១៩ កន្លងមកថ្មីៗនេះ នៅចំណុចភូមិសង្គមថ្មី ឃុំថ្មដា ស្រុកវាលវែង ខេត្តពោធិ៍សាត់ កងកម្លាំងប្រដាប់ដោយអាវុធ វរៈការពារព្រំដែនគោកលេខ៥០១ បានបង្រ្កាបករណីនាំឈើគ្រញូងខុសច្បាប់ចេញពីប្រទេសថៃចំនួន ១០០ដុំ ចំណែកក្រុមជនប្រព្រិត្តរត់គេចខ្លួនបាត់ស្រមោល ។
ប្រភពរាយការណ៍ដដែលបន្តទៀតថា វត្ថុតាងឈើប្រភេទប្រណីតគ្រញូងចំនួន ១០០ដុំ ដែលកងកម្លាំងប្រដាប់ដោយអាវុធបង្រ្កាប បានយកទៅរក្សាទុកជាបណ្ដោះអាសន្ន នៅទីបញ្ជាការវរៈលេខ៥០១ រងចាំបន្តនីតិវិធីជាក្រោយ ។
ករណីពលរដ្ឋលួចឆ្លងដែនចូលទឹកដីប្រទេសថៃ ដើម្បីកាប់ឈើប្រណីតគ្រញូងខាងលើដោយមិនខ្លាចញញើត បើទោសជាកន្លងមកត្រូវបានបង្រ្កាបពីសំណាក់សមត្ថកិច្ចប្រទេសថៃ ដោយចាប់ខ្លួនក្ដីឬបាញ់ស្លាប់ជាបន្តបន្ទាប់ក្ដី ត្រូវបានមហាជនរិះគន់ និងលើកឡើងស្រឌៀងៗគ្នាថា ការបង្រ្កាបបានម្ដងកាល់ដោយសារតែក្រុមអង្កភាពសមត្តកិច្ចតាមបន្ទាត់ព្រំដែននិមួយៗនោះ ប៉ែងជើងឬចែកលាភសក្ការមិនស្មើគ្នាប៉ុណ្ណោះ ព្រោះអង្កភាពនៅតំបន់នោះសុទ្ធសឹងជាប់ពាក់ព័ន្ធឈើគ្រញូងគ្មានចន្លោះ គឺប្រកៀកស្នាស្មើគ្នាជាមួយពួកឈ្មួញធំៗគ្រាក់ៗ នៅខេត្តពោធិ៍សាត់ ជាពិសេសអគ្គស្នងការដ្ឋាននគរបាលជាតិ គួរសើបអង្កេតស្រាវជ្រាវចំពោះវរៈការពារព្រំដែនគោកលេខ៨២៥ផង ម៉្យាងបុគ្គលនគរបាលក្នុងអង្កភាពនេះ មានដៃគូរជាមន្រ្តីបរិស្ថានយ៉ាងស្អិតរមួត ឲ្យតែគេចវេះពីក្រុមរបស់ពួកមន្រ្តីខិលខូចទាំងនោះ បោះដៃឲ្យមន្រ្តីបរិស្ថានជាដៃគូបង្រ្កាបភ្លាមមិនខាន ៕ បុឹម ពិន
