សារព័ត៌មាន នគរវត្ត តែងតែនាំមុខគេជានិច្ច
អគ្គរដ្ឋទូតចិនប្រចាំនៅអង្គការសហប្រជាជាតិ កាលនៅថ្ងៃទី៣ ខែសីហា បានប្រកាសថា ប្រសិនបើអាមេរិកចង់បង្កសង្គ្រាមពាណិជ្ជកម្មជាមួយចិននោះ ចិនស្វាគមន៍ដល់ទីបញ្ចប់ ហើយទីក្រុងប៉េកាំងនឹងមានវិធានការតប់តវិញ នូវការដាក់ទណ្ឌកម្មថ្មី ដំឡើងពន្ធបន្ថែមពីអាមេរិក ។
មន្ត្រីចិនប្រចាំនៅអង្គការសហប្រជាជាតិ បានបញ្ជាក់ទៀតថា ទស្សនរបស់ចិនបានបង្ហាញយ៉ាងច្បាស់ថា បើទីក្រុងវ៉ាស៊ីនតោន ចង់ចរចា ចិន នឹងចរចា ហើយបើចង់ប្រកាសសង្គ្រាម ចិនក៏បានត្រៀមតប់តវិញផងដែរ ។
ការប្រកាសខាងលើរបស់ចិនកើតឡើង ក្រោយពេល ប្រធានាធិបតីអាមេរិក លោក ដូណាល់ ត្រាំ នៅថ្ងៃទី២ ខែសីហា បានប្រកាសថា អាមេរិកនឹងដំឡើងពន្ធចំនួន១០ភាគរយបន្ថែមទៀត លើមុខទំនិញ នាំមកពីប្រទេសចិន ដែលមានតម្លៃសរុប៣០០ពាន់លានដុល្លារអាមេរិក ។ ការដំឡើងពន្ធបន្ថែមនេះ នឹងចូលជាធរមាន នៅថ្ងៃទី១ ខែកញ្ញា ឆ្នាំ២០១៩ខាងមុខនេះ ។
លោក ដូណាល់ ត្រាំ បានប្រកាសបែបនេះ នៅលើបណ្តាញសង្គម Twitter កាលពីថ្ងៃទី១ ខែសីហា (ម៉ោងនៅអាមេរិក) ក្រោយពេលលោកប្រធានាធិបតីអាមេរិក ទទួលបានរបាយការណ៍ ស្តីអំពីកិច្ចពិភាក្សា លើវិស័យពាណិជ្ជកម្មជាមួយចិន នៅទីក្រុងសៀងហៃ ប្រទេសចិន ។
បើតាមការលើកឡើងរបស់ប្រធានាធិបតីអាមេរិក ដូណាល់ ត្រាំ គឺមន្ត្រីនៃប្រទេសទាំងពីរ អាមេរិក និងចិន នឹងបន្តពិភាក្សាគ្នាបន្ថែមទៀត ហើយលោកសង្ឃឹមថា កិច្ចពិភាក្សានេះ នឹងទទួលបានកិច្ចព្រមព្រៀងមួយជាមួយចិន ។ លោកប្រធានាធិបតីអាមេរិក ដូណាល់ ត្រាំ បានចោទប្រកាន់រដ្ឋាភិបាលទីក្រុងប៉េកាំង ថា ចិនមិនគោរពពាក្យសន្យា ទិញផលិតផលកសិកម្មពីអាមេរិក ក៏ដូចជា ការលក់ឱសថបំបាត់ការឈឺចាប់ Fentanyl ទៅកាន់អាមេរិកផងដែរ ។
សកម្មភាពខាងលើបានធ្វើឲ្យទីផ្សា មូលបត្រ(ភាគហ៊ុន)អាមេរិកធ្លាក់ចុះ ចំណែកតម្លៃប្រេងវិញឡើងថ្លៃខ្ពស់ ក្រោយការប្រកាសរបស់លោកត្រាំ ។ ចំណែកមូលនិធិរូបិយវត្ថុអន្តរជាតិ IMF ក៏បានប្រកាសថា ការដំឡើងពន្ធរបស់អាមេរិក និងធ្វើឲ្យសេដ្ឋកិច្ចពិភពលោក ដើរយឺត នៅក្នុងឆ្នាំ២០២០ គឺថយចុះ០,២ភាគរយ ។
ក្រុមអ្នកឯកទេសវិភាគបានលើកឡើងថា សកម្មភាពរបស់អាមេរិក មិនមែនប៉ះពាល់តែចិននោះឡើយ អាមេរិក ក៏ជាអ្នកប៉ះពាល់ខ្លាំងពីការដំឡើងពន្ធនោះ ។ នៅពេលនេះដែរ សេដ្ឋកិច្ចអាមេរិកចាប់ផ្តើមឲ្យសញ្ញាដើរយឺតៗ ។
ក្រុមអ្នកជំនាញ់កំពុងតែវាយតម្លៃថា តើសេដ្ឋកិច្ចអាមេរិកកំពុងចាប់រង្គោះរង្គើដោយសារសង្រ្គាមពាណិជ្ជកម្មចិន អាមេរិកឬក៏យ៉ាងណា? តួលេខរបស់នាយកដ្ឋានពាណិជ្ជកម្មអាមេរិក ចេញផ្សាយជាផ្លូវការពេលកន្លងមកថ្មីៗបង្ហាញឲ្យឃើញថា ឱនភាពពាណិជ្ជកម្ម ប្រចាំខែ និមួយៗបានកាត់បន្ថយ ប្រមាណ ០,៣ភាគរយ ដោយសារការនាំចូលទំនិញ មកពីប្រទេសចិន និងសហភាព អឺរ៉ុប បានធ្លាក់ចុះ ។ ទន្ទឹមគ្នានោះ ការនាំចេញទំនិញអាមេរិកក៏បានធ្លាក់ចុះ ខ្លាំងគួរ ឲ្យកត់សំគាល់ផងដែរ ។
នៅខែមិថុនា និងខែកក្កដា ឱនភាពពាណិជ្ជកម្មអាមេរិក មានទំហំទឹកប្រាក់ ៥៥ ២០០លានដុល្លារអាមេរិក គឺថយចុះបន្តិច ដោយសារការនាំចូលបានធ្លាក់ចុះ ប្រមាណ ១,៧% ឬ ២៦១ពាន់លានដុល្លារ ចំណែក ការនាំចេញរបស់អាមេរិកវិញ ធ្លាក់ចុះខ្លាំង ជាងការនាំចូលទៅទៀត ដល់ ទៅ២% ។
តាមរបាយការណ៍របស់នាយកដ្ឋានពាណិជ្ជកម្មអាមេរិក ចេញផ្សាយ កាលពីថ្ងៃទី២ ខែសីហាថា ដោយសារការនាំចូលពីចិន និងអឺរ៉ុបធ្លាក់ថយចុះ ទំនិញនាំចូលអាមេរិក ដូចជាទូរស័ព្ទដៃ និងសំភារៈប្រើប្រាស់របស់ប្រជាជនអាមេរិកាំង បានធ្លាក់ថយចុះ ជាង ១៤០០លានដុល្លារ ។ នៅក្នុងជម្លោះពាណិជ្ជកម្ម រវាងគ្នា ប៉េកាំង និងវ៉ាស៊ីនតោនបានប្រកាសដំឡើងពន្ធ លើទំនិញនាំចូលគ្នាទៅវិញ ទៅមក សរុប ៣៦០ពាន់លានដុល្លារ ក្នុងគោលដៅ កាត់បន្ថយ ការដោះដូរពាណិជ្ជកម្មរវាងមហាអំណាចសេដ្ឋកិច្ចទាំងពីរ ។
លោកដូណាល់ ត្រាំ ប្រើនយោបាយ ដំឡើងពន្ធលើទំនិញនាំចូលពីប្រទេសចិន ដើម្បី ការពារការងារប្រជាជនអាមេរិកាំង និងកាត់បន្ថយ គម្លាត នៃការដោះដូរពាណិជ្ជកម្មជាមួយប្រទេសចិន ។ ប៉ុន្តែ តួលេខរបស់ក្រសួងការងារអាមេរិក បានបង្ហាញដែរថា សម្រាប់ខែកក្កដា ចំនួនការងារបង្កើតថ្មី បានថយចុះ នៅពេលអត្រាអ្នកអត់ការងារធ្វើវិញ នៅនឹងថ្កល់ ប្រមាណ ៣,៧% ដែលនេះ ជាសញ្ញានៃសេដ្ឋកិច្ចដើរយឺតរបស់អាមេរិក ។
ការនាំចេញធ្លាក់ចុះ ចំណែកចំនួនការងារបង្កើតថ្មី ក៏ធ្លាក់ចុះ ។ សញ្ញានៃសេដ្ឋកិច្ចដើរយឺត នឹងអាចរឹតតែអាក្រក់ នៅពេលនយោបាយដំឡើងពន្ធរបស់លោកដូណាល់ ត្រាំ ទៅលើទំនិញចិន នាំចូលអាមេរិក ដែលមានតម្លៃ ជាង ៣០០ពាន់លានដុល្លារផ្សេងទៀត ចាប់ចូលជាធរមាន នៅខែកញ្ញាខាងមុខ ។
នៅថ្ងៃ ព្រហស្បតិ៍ ដោយសារការចរចាពាណិជ្ជកម្មជាមួយចិន នៅទីក្រុងសៀងហៃ មិនបានផ្តល់លទ្ធផលតាមការចង់បាន លោកដូណាល់ ត្រាំ បានប្រកាសដំឡើងពន្ធ ១០ភាគរយ លើទំនិញនាំចូលពីចិន ប្រមាណ ៣០០ពាន់លានដុល្លារផ្សេងទៀត ចាប់ពីថ្ងៃទី ១កញ្ញា ។
នៅពេលវិធានការដំឡើងពន្ធពីរលើកដំបូង លើទំនិញនាំចូលពីចិន ផ្តោតសំខាន់ទៅលើវត្ថុធាតុដើម វិធានការដំឡើងពន្ធ លើកទី៣របស់លោកដូណាល់ ត្រាំ កាលពីថ្ងៃព្រហស្បតិ៍ លើទំនិញចិន តម្លៃ ជាង ៣០០ពាន់លានដុល្លារផ្សេងទៀត នឹងធ្វើឲ្យទំនិញ លក់រាយឡើងថ្លៃនៅអាមេរិក ដែលជាការប៉ះពាល់ដោយផ្ទាល់ លើប្រយោជន៍ របស់អ្នកប្រើប្រាស់ និងអ្នកជំនួញអាមេរិកាំង ។
ធនាគារកណ្តាលអាមេរិក នៅសប្តាហ៍នេះបានកាត់បន្ថយអត្រាការប្រាក់ប្រមាណ០,២៥ភាគរយ ដើម្បី ជំរុញ ពង្រីក សេដ្ឋកិច្ចអាមេរិក ក្នុងកាលៈទេសៈដែលសេដ្ឋកិច្ចពិភពលោកដើរយឺត ហើយនិងភាពមិនច្បាស់លាស់ ដោយសារសង្រ្គាមពាណិជ្ជកម្មចិន អាមេរិក៕
