ដាច់លុយទិញថ្នាំញៀនប្រើប្រាស់ បែកគំនិតលួចម៉ូតូគេដល់ក្នុងរោងចក្រ ចុងក្រោយត្រូវសមត្ថកិច្ចចាប់ខ្លួន

ខេត្តកណ្ដាល៖ ជនសង្ស័យម្នាក់ ក្នុងចំណោមបក្ខពួក៣នាក់ ជាមុខសញ្ញាប្រើប្រាស់គ្រឿងញៀន បានបែកគំនិតនាំគ្នាចូលលួចម៉ូតូរបស់បុរសជាសន្ដិសុខរោងចក្រម្នាក់ ដែលទុកក្នុងរោងចក្រ យកទៅលក់នៅឯរាជធានីភ្នំពេញ ព្រោះតែក្រុមជនសង្ស័យខាងលើនេះ ដាច់លុយទិញថ្នាំញៀនប្រើប្រាស់ តែទោះជាយ៉ាងណាក៏គេចមិនផុតពីសមត្ថកិច្ចដដែល ។ ករណីនេះ បានកើតឡើង កាលពីវេលាម៉ោង ២៤និង០៥នាទី ថ្ងៃទី៦ ខែសីហា ឆ្នាំ២០១៩ ត្រង់ចំណុចក្នុងរោងចក្រហ្គោលហ្វេម ស្ថិតភូមិកំពង់ព្រីង សង្កាត់សិត្បូ ក្រុងតាខ្មៅ ខេត្តកណ្តាល ។

មន្ត្រីនគរបាលក្រុងតាខ្មៅបានឲ្យដឹងថា ជនសង្ស័យមានគ្នា៣នាក់ ឃាត់ខ្លួនបានម្នាក់ ឈ្មោះ រិន សុជាតិ ភេទប្រុស អាយុ២៣ឆ្នាំ មានទីលំនៅភូមិកំពង់ព្រីង សង្កាត់សិត្បូ ក្រុងតាខ្មៅ ខេត្តកណ្តាល រីឯជនសង្ស័យ២នាក់ទៀត ដែលគេចខ្លួនទី១-ឈ្មោះ ទ្រី លីហៀង ភេទប្រុស អាយុ២២ឆ្នាំ និងទី២-ឈ្មោះ វីន ភេទប្រុស អាយុ២១ឆ្នាំ ។ ជនសង្ស័យទាំង២នាក់ មានទីលំនៅភូមិសិត្បូ សង្កាត់សិត្បូ ក្រខ្មៅ ខេត្តកណ្តាល ។ ចំណែកជនរងគ្រោះជាម្ចាស់ម៉ូតូឈ្មោះ ជ្រិន ផាន់និត ភេទប្រុស អាយុ៣២ឆ្នាំ ទីលំនៅភូមិ-សង្កាត់កើតហេតុ មុខរបរ សន្តិសុខរោងចក្រ ។ ដោយឡែកសម្ភារះបាត់បង់មាន ម៉ូតូ១គ្រឿងម៉ាកហុងដាដ្រីម ធុនសេ១២៥ ពណ៌ខ្មៅ ស៊េរីឆ្នាំ២០១៦ ពាក់ស្លាកលេខភ្នំពេញ 1FQ-8508 ជារបស់ជនរងគ្រោះ ។

ប្រភពដដែលបន្ដថា កាលពីថ្ងៃទី៦ ខែសីហា ឆ្នាំ២០១៩ ជនរងគ្រោះជាម្ចាស់ម៉ូតូបានជិះម៉ូតូរបស់ខ្លួន មកធ្វើការជាសន្ដិសុខយាមក្នុងរោងចក្រហ្គោលហ្វេម លុះភ្លឺឡើងថ្ងៃទី៧ ខែឆ្នាំដដែល ស្រាប់តែជនរងគ្រោះ មកយកម៉ូតូរបស់ខ្លួនវិញស្រាប់តែមិនឃើញ សង្ស័យថា មានចោរលួច ក៏ទៅដាក់ពាក្យបណ្ដឹងប្ដឹងសមត្ថកិច្ចនគរបាលប៉ុស្ដិ៍ស្វាយរលំ ដើម្បីជួយស្រាវជ្រាវអន្ដរាគមន៍ រកជនសង្ស័យចាត់ការតាមច្បាប់ ។ បន្ទាប់ពីសមត្ថកិច្ចនគរបាលប៉ុស្ដិ៍សិត្បូទទួលបានពាក្យបណ្ដឹងពីជនរងគ្រោះរួច ភ្លាមនោះ ក៏ធ្វើការស្រាវជ្រាវ តាមដាន រហូតកំណត់មុខសញ្ញាច្បាស់ បានឃាត់ខ្លួនជនសង្ស័យឈ្មោះ រិន សុជាតិ នៅថ្ងៃទី៧ ខែឆ្នាំដដែល យកមកប៉ុស្ដិ៍នគរបាលរដ្ឋ ស្វាយរលំ ដើម្បីធ្វើការសាកសួរ ។

នៅចំពោះមុខសមត្ថកិច្ចនគរបាល ជនសង្ស័យឈ្មោះ រិន សុជាតិ បានសារភាពថា កាលពីវេលាម៉ោង២៤ ខ្លួនបានធ្វើសកម្មភាពលួចម៉ូតូរបស់ជនរងគ្រោះប្រាកដមែន ក្រោយពីលួចបាន ខ្លួនក៏បបួលមិត្ដភក្ដិ២នាក់ទៀត ឌុបគ្នាឆ្ពោះទៅរាជធានីភ្នំពេញ ដើម្បីដោះគ្រឿងយកទៅបញ្ចាំនៅផ្សារឃ្លាំងរំសេវ បានប្រាក់ចំនួន៥០ដុល្លារ បន្ទាប់ពីបានលុយចំនួន៥០ដុល្លាររួច ខ្លួន និងមិត្ដភក្ដិ បាននាំគ្នា ទិញថ្នាំញៀនជក់ នៅក្នុងព្រៃមួយកន្លែង ស្ថិតនៅក្នុងសង្កាត់ស្វាយរលំ អស់ទៅ ។ ក្រោយពីនាំគ្នាជក់ថ្នាំ ញៀនរួចហើយ បក្ខពួករបស់ខ្លួន២នាក់ បានយកម៉ូតូដែលខ្លួនលួចនោះ ជិះគេចខ្លួនបាត់ទៅ ហើយចំពោះការប្រើប្រាស់គ្រឿងញៀនវិញ ខ្លួន បានប្រើប្រាស់អស់រយៈពេលជាង៣ឆ្នាំមកហើយ ។

បន្ទាប់ពីសមត្ថកិច្ចសាកសួររួច សមត្ថកិច្ចកសាងសំណុំរឿង បញ្ជូនជនសង្ស័យខាងលើ យកមកអធិការដ្ឋាននគរបាលក្រុងតាខ្មៅ ចាត់ការតាមនីតិវិធីច្បាប់ ។ដោយឡែកជនសង្ស័យ២នាក់ទៀតដែលគេចខ្លួនេះ សមត្ថកិច្ចជំនាញ កំពុងធ្វើការសា្រវជ្រាវ ចាប់ខ្លួនចាត់ការបន្ដទៀត ៕ ស្អាងជ័យ