កុមារីម្នាក់លង់ទឹកស្រះក្បែរផ្ទះស្លាប់

ខេត្តឧត្ដរមានជ័យ៖ នៅថ្ងៃទី០៨ ខែសីហា ឆ្នាំ២០១៩នេះមានករណីលង់ទឹកស្លាប់មួយកើតឡើង នៅភូមិពពេល ឃុំផ្អាវ ស្រុកត្រពាំង ប្រាសាទ ខេត្តឧត្ដរមានជ័យ ។

សមត្ថកិច្ចបានឲ្យដឹងថា កាលពីថ្ងៃទី៧ ខែសីហា ឆ្នាំ ២០១៩ ម៉ោង២រសៀល ឈ្មោះខាំ ភារម្យ ភេទស្រី អាយុ ៨ ឆ្នាំបានសុំប្រាក់ជីដូនឈ្មោះ ស៊ុត សុខខឿន អាយុ៥៨ឆ្នាំ ក្រោយពីបានលុយរួចចៅស្រីបានដើរទៅទិញនំ ឯជីដូនក៏បានដេក លង់លក់នៅនឹងផ្ទះ លុះដល់ម៉ោងជាង៣រសៀលថ្ងៃដដែល ពេលដែលគាត់ក្រោកពីដំណេក រកចៅមិនឃើញ ក៏រកបងប្អូនអ្នកជិតខាងឲ្យជួយរករហូត ដល់ម៉ោង ៦ល្ងាច ទើបរកសាកសពឃើញនៅក្នូងស្រះ ទឹក ក្រោយផ្ទះចម្ងាយ២៥ម៉ែត្រ ។

សមត្ថកិច្ចបន្ដថា ក្មេងស្រីម្នាក់ឈ្មោះ យ៉ាន សុខុម អាយុ ០៣ ឆ្នាំដែលបានឃើញហេតុការណ៍ នៅពេលសាច់ញាតិតាមរកក្មេងស្រី នាងបាននិយាយ រៀបរាប់ទាំងរដេបរដុបពុំសូវច្បាស់ថា បានឃើញក្មេងស្រី ប្រូងក្នុងទឹក (លោតទឹក) និងធ្វើកាយវិការ តម្រាប់តាមដោយធ្វើដៃខ្វៃៗធ្លាក់ក្នុងទឹកស្រះ ។

លឺដូច្នេះសាច់ញាតិ និងអ្នកជិតខាង បានចុះទៅក្នុងស្រះដែលមានជម្រៅទឹកជាង៣ម៉ែត្ររាវរកទើបបានឃើញក្មេងស្រីរងគ្រោះឈ្មោះ ខាំ ភារម្យ ត្រូវបានលង់ទឹកស្លាប់នៅក្នុងស្រះនោះ ។

ក្រោយសមត្ថកិច្ច ពិនិត្យកន្លែងកើតហេតុ និងធ្វើកោសល្យវិច័យសាកសពរកឃើញថា ពិតជាបានស្លាប់ដោយសារលង់ទឹកពិតប្រាកដមែន ក៏បានប្រគល់ជូនក្រុមគ្រួសារយកទៅធ្វើបុណ្យទៅតាមប្រពៃណី៕ ប៉ែន នួន