សារព័ត៌មាន នគរវត្ត តែងតែនាំមុខគេជានិច្ច
សង្គ្រាមនៅក្នុងប្រទេសអាហ្វហ្គានីស្ថានរយៈពេលជិត២០ឆ្នាំកន្លងមក ដោយបានសម្លាប់មនុស្សជាច្រើន ។ មកទលពេលនេះ ទាំងភាគីតាលីបង់និងទាហានរដ្ឋាភិបាលអាហ្វហ្គាណីស្ថាន ក៏ដូចជាអាមេរិក មិន ទាន់អាចចុះកិច្ចព្រមព្រៀងសន្តិភាព បាននៅឡើយទេ បើទោះបីភាគីទាំងពីរបានពិភាក្សាគ្នា ៨លើករួចមកហើយ ។
ក្រុមអ្នកចរចាសន្ដិភាពរបស់ឧទ្ទាមតាលីបង់ នៅបា៉គីស្ថាន និងប្រតិភូអាមេរិក ដែលដឹកនាំដោយលោក Zalmay Khalizad បានជួប្រជុំគ្នាជាលើកទី៨ នៅក្នុងទីក្រុងដូហា ប្រទេស កាតារ ស្ដីអំពីកិច្ចព្រមព្រៀងសន្ដិភាព ។ ប៉ុន្ដែជំនួប រវាងក្រុងតាលីបង់ និងសហរដ្ឋអាមេរិក នោះបានបញ្ចប់ទៅវិញ ដោយមិនមានកិច្ចព្រមព្រៀងណាមួយ ចំពោះការបញ្ចប់សង្រ្គាម នៅក្នុងប្រទេសអាហ្វហ្គានីស្ថាននោះឡើយ ។ ភាគីទាំងពីរ អះអាងរៀងៗខ្លួនថា ថ្នាក់ដឹកនាំកំពូលរបស់ខ្លួន នឹងជួបគ្នានូវជំហានបន្ទាប់ទៀត ។
កិច្ចប្រជុំលើកទី៨នេះ បានចាប់ផ្តើមធ្វើឡើង នៅប្រទេសកាតារ កាលពីថ្ងៃទី៣ ខែសីហា ឆ្នាំ២០១៩ ដោយផ្តោតលម្ពិតលើបញ្ហាបច្ចេកទេស ។ ប៉ុន្ដែជំនួបនេះ បានបញ្ចប់ភ្លាមៗ កាលពីថ្ងៃទី១២ ខែសីហា ឆ្នាំ២០១៩ ហើយក៏មិនមានភាគីណាមួយ ផ្តល់ព័ត៌មានលម្អិតអំពីលទ្ធផល នៃកិច្ចពិភាក្សា នៅក្នុងទីក្រុង Doha ប្រទេសកាតារនោះឡើយ ។ គណៈប្រតិភូអាមេរិក ដឹកនាំដោយលោក Zalmay Khalilzad បានហៅថា នេះជាលទ្ធផលមួយ ។ ដោយឡែកក្រុមតាលីបង់វិញ អ្នកនាំពាក្យ Zabihullah Mujahid ហៅថា «រយៈពេលវែង នឹងមានសារប្រយោជន៍» ។
ភាគីទាំងសងខាង បាននិងកំពុងពិភាក្សាលើកិច្ចព្រមព្រៀងមួយ ដែលកងកម្លាំងទាហានអាមេរិក ត្រូវដកចេញពីប្រទេសអាហ្វហ្គានីស្ថាន ហើយក្រុមតាលីបង់ធានាថា ប្រទេសនេះនឹងលែងកើតមានអំពើវាយប្រហារ ដោយភេរវកម្មបន្ដទៀតហើយ ។
ដោយឡែកសហរដ្ឋអាមេរិកក៏ពិភាក្សាជំរុញឲ្យក្រុមតាលីបង់ ព្រមព្រៀងលើចំណុចចំនួន២ផ្សេងទៀត ដែលមួយចំណុចពិបាកនឹងសម្រេចបាននោះ គឺការពិភាក្សាលើការចែកអំណាចគ្នាជាមួយរដ្ឋាភិបាលអាហ្វហ្គានីស្ថាន ដែលគាំទ្រដោយអាមេរិក និងកិច្ចព្រមព្រៀងឈប់បាញ់គ្នា ។
កិច្ចព្រមព្រៀងមួយនេះ អាចនឹងផ្តល់ឲ្យលោក ដូណាល់ ត្រាំ សម្រេចបានដោយជោគជ័យ ក្នុងគោលបំណងរបស់គាត់ គឺការបញ្ចប់សង្គ្រាមមួយ ដែលចាប់ផ្តើម ក្រោយការវាយប្រហារអំពើភេរវកម្ម កាលពីថ្ងៃទី១១ ខែកញ្ញា ឆ្នាំ២០០១ ទៅលើទឹកដីអាមេរិក ។
សង្គ្រាមនៅក្នុងប្រទេសអាហ្វហ្គានីស្ថាន បានអូសបន្លាយយ៉ាងយូរ ដោយមិនមានភាគីណាមួយ អាចទទួលជ័យជម្នះ ឬបរាជ័យនោះឡើយ ហើយចំនួនជនរងគ្រោះដែលបានបាត់បង់ជីវិត ចេះតែបន្ដកើតឡើងជាបន្ដបន្ទាប់ ហើយក្នុងចំណោមអ្នកស្លាប់ទាំងនោះ មានទាំងជនស៊ីវិល និងយុទ្ធជនផងដែរ ។
រដ្ឋាភិបាលអាហ្វហ្គានីស្ថានមិនបានពាក់ព័ន្ធចូលក្នុងកិច្ចពិភាក្សានោះឡើយ ។ ក្រុមតាលីបង់ច្រានចោលការជួបពិភាក្សាជាមួយរដ្ឋាភិបាលអាហ្វហ្គានីស្ថានបច្ចុប្បន្ន ។
ក្រុមតាលីបង់ត្រូវបានមើលឃើញថា មានសកម្មភាពខ្លាំងក្លា ចាប់តាំងពីអាមេរិកដឹកនាំឈ្លានពានទម្លាក់រដ្ឋាភិបាល៥ឆ្នាំរបស់ពួកគេ កាលពីឆ្នាំ២០០១ ។ អាមេរិក និងកម្លាំងសម្ពន្ធមិត្តបានបញ្ចប់សមរភូមិពួកគេក្នុងឆ្នាំ២០១៤ ។ ប៉ុន្តែ ទាហានប្រហែល២០ ០០០នាក់របស់អាមេរិក និងសម្ពន្ធមិត្តនៅបន្តឈរជើងក្នុងប្រទេសនេះ ៕
