សមត្ថកិច្ចអូរបែកក្អបឃាត់ខ្លួនជនសង្ស័យម្នាក់ ក្រោយពីផ្លោះរបងផ្ទះបំណងលួចទ្រព្យសម្បត្តិ

ភ្នំពេញ ៖ ជនសង្ស័យត្រូវបានកម្លាំងនគរបាលប៉ុស្ដិ៍រដ្ឋបាល អូរបែកក្អម នៃអធិការដ្ឋាននគរបាលខណ្ឌសែនសុខ បានធ្វើការឃាត់ខ្លួនជនសង្ស័យម្នាក់ ពាក់ព័ន្ធនិងករណីប៉ិនប៉ងលួចទ្រព្យសម្បត្តិរបស់ប្រជាពលរដ្ឋ និងប្រើប្រាស់គ្រឿងញៀន កាលពីវេលាម៉ោង២ និង២០នាទីរំលងអាធ្រាត ឈានចូលថ្ងៃទី១៥ ខែសីហា ឆ្នាំ២០១៩ នៅចំណុចផ្ទះលេខ៨A ផ្លូវលេខ២០០២ ក្នុងសង្កាត់អូរបែកក្អម ខណ្ឌសែនសុខ ។

ជនសង្ស័យម្នាក់ដែលត្រូវសមត្ថកិច្ចឃាត់ខ្លួនមានឈ្មោះ ឯក ច្រូច ភេទប្រុស អាយុ២៧ឆ្នាំ មុខរបរកម្មករសំណង់ ក្បែរកន្លែងកើតហេតុ ស្នាក់នៅភូមិឬស្សី សង្កាត់ស្ទឹងមានជ័យ២ ខណ្ឌមានជ័យ ។

សមត្ថកិច្ចមូលដ្ឋានបានឲ្យដឹងថា មុនឈានដល់ឃាត់ខ្លួនជនសង្ស័យខាងលើបាន គឺ ជនសង្ស័យខាងលើនេះបានផ្លោះរបងផ្ទះប្រជាពលរដ្ឋដោយបំណងលួចទ្រព្យសម្បត្តិក្នុងផ្ទះ តែមិនបានសម្រេច ក៏ត្រូវប្រជាពលរដ្ឋសហការគ្នាឃាត់ខ្លួនបានតែម្ដង រួចរាយការណ៍ប្រាប់សមត្ថកិច្ចឲ្យចុះមកយកជនសង្ស័យរូបនេះចាក់ការបន្ត ។

បន្ទាប់ពីទទួលបានដំណឹងនេះភ្លាម សមត្ថកិច្ចមូលដ្ឋានក៏ចុះទៅដល់កន្លែងកើតហេតុ រួចនាំខ្លួនជនសង្ស័យខាងលើមកកាន់ប៉ុស្ដិ៍នគរបាលរដ្ឋបាល អូរបែកក្អម ដើម្បីសួរនាំបន្ថែម និងធ្វើតេសទឹកនោម ក៏រកឃើញមានសារធាតុញៀនផងដែរ ។

បច្ចុប្បន្ននេះ ជនសង្ស័យខាងលើត្រូវបានសមត្ថកិច្ចកសាងសំណុំរឿងបញ្ជូនទៅកាន់អធិការដ្ឋាននគរបាលខណ្ឌសែនសុខ ចាត់ការបន្តតាមនីតិវិធី ៕ចន្ទ លីហ្សា