សារព័ត៌មាន នគរវត្ត តែងតែនាំមុខគេជានិច្ច
នៅព្រឹកថ្ងៃទី១៦ ខែសីហានេះ កូរ៉េខាងជើង បន្តបាញ់មីស៊ីល ពីរដើមទៀត ដែលជាការបាញ់សាកល្បងលើកទី៦ហើយ ចាប់តាំងពីថ្ងៃទី ២៥ ខែកក្កដា មកទល់ពេលនេះ។ កូរ៉េខាងជើង ក៏បានប្រកាសផងដែរថា កិច្ចពិភាក្សាជាមួយកូរ៉េខាងត្បូង បានបញ្ចប់ហើយ។
ក្រោយការបាញ់សាកល្បងលើកទី៦នេះ ក្រុមសន្តិសុខកូរ៉េខាងត្បូង ក៏បានកោះប្រជុំជាបន្ទាន់ទំាងព្រឹក ស្តីពីការបាញ់សាកល្បងខាងលើ ។ ក្នុងពេលជាមួយគ្នានេះដែរ ក្រសួងការពារជាតិជប៉ុន ក៏បានប្រកាសផងដែរថា មិនមានការគំរាមកំហែងដល់សន្តិសុខជប៉ុនឡើយ។ ការបាញ់សាកល្បងខាងលើ គឺជាការប្រឆាំងនឹងសកម្មភាពធ្វើសមយុទ្ធរបស់ អាមេរិក និងកូរ៉េខាងត្បូង ដែលទីក្រុងព្យុងយ៉ាងចាត់ទុកថា ជាសកម្មភាពប៉ុនប៉ងឈ្លានពានទឹកដីកូរ៉េខាងជើង ។
ពាក់ព័ន្ធការបាញ់ប្រហារខាងលើ សារព័ត៌មាន Sputniknews នៅព្រឹកថ្ងៃទី១៦ ខែសីហា បានផ្សាយថា កូរ៉េខាងជើងបានបាញ់មីស៊ីលពីរគ្រាប់ ចូលទៅកាន់ដែនសមុទ្រ នាភាគខាងកើត ឬអ្វីដែលគេស្គាល់ថា សមុទ្រជប៉ុន ។ នេះជាការបាញ់សាកល្បងមីស៊ីលជាថ្មីបន្ថែមទៀតរបស់រដ្ឋឯកោកូរ៉េខាងជើង។
ចាប់តាំងពីខែកក្កដា ឆ្នាំ២០១៩ មក រដ្ឋាភិបាលទីក្រុងព្យុងយ៉ាង បានបាញ់សាកល្បងមីស៊ីលជាច្រើនគ្រាប់ ហើយមីស៊ីលទាំងនោះ សុទ្ធតែជាមីស៊ីលប៉ាល្លិស្ទិក រយៈចម្ងាយខ្លី ។ ការបាញ់ថ្មីៗនេះត្រូវគេរាយការណ៍ថា កើតឡើងចំពេលដែលសមយុទ្ធយោធារវាងអាមេរិក និងកូរ៉េខាងត្បូងកំពុងប្រព្រឹត្តទៅ ចាប់ផ្តើមពីថ្ងៃទី៥ ខែសីហា រហូតដល់ថ្ងៃទី២០ ខែសីហា ឆ្នាំ២០១៩ ។
អគ្គសេនាធិការចម្រុះរបស់កូរ៉េខាងត្បូង បានថ្លែងថា កូរ៉េខាងជើងបាញ់មីស៊ីលមិនស្គាល់ភិនភាគ ចំនួនពីរគ្រាប់ នៅជិតទីក្រុង Tongchon ខេត្ត Kangwon ទៅកាន់សមុទ្រខាងកើត ឬដែលស្គាល់ថា សមុទ្រជប៉ុន ។
សេចក្តីថ្លែងការណ៍ដដែល ត្រូវបានប្រភព AFP ដកស្រង់ចុះផ្សាយ នៅថ្ងៃទី១៦ ខែសីហា ឆ្នាំ២០១៩ នេះថា យោធាកូរ៉េខាងត្បូង កំពុងត្រួតពិនិត្យស្ថានការណ៍នេះ ខ្លាចក្រែងមានការបាញ់ប្រហារបន្ថែមទៀត ខណៈត្រៀមលក្ខណៈចំពោះឥរិយាបថទាំងនេះ ។
បើទោះបីកូរ៉េខាងជើងនៅតែមានសកម្មភាព ឌឺដង តែប្រធានាធិបតី កូរ៉េខាងត្បូងលោក ម៉ូន ជេអ៊ីន សន្យានឹងបង្រួបបង្រួមឧបទ្វីបកូរ៉េនៅឆ្នាំ២០៤៥។ ប្រធានាធិបតីកូរ៉េខាងត្បូង លោក ម៉ូន ជេអ៊ីន បានប្រកាសសន្យាថា លោកនឹង បង្រួប បង្រួមឧបទ្វីបកូរ៉េនៅឆ្នាំ២០៤៥ មានន័យថាការបង្រួមបង្រួមក្រោយសង្ក្រាមលោកលើកទីពីរបានបញ្ចប់គ្រប់១០០ឆ្នាំ ។
នៅទិវា ៧៤ឆ្នាំ ថ្ងៃបញ្ចប់សង្គ្រាមលោកលើកទីពីរ (១៥/៨/១៩៤៥-១៥/៨/២០១៩) ប្រធានាធិបតី ម៉ូន ជេអ៊ីន បាន ប្រកាសថា កូរ៉េខាងត្បូង ពិតជារីករាយដែលបានរួមចំណែកធ្វើឲ្យសង្គ្រាមពាណិជ្ជកម្មប្រទេសទាំងពីរ ល្អប្រសើរឡើងវិញ ។
ជាមួយគ្នានេះប្រធានាធិបតីកូរ៉េខាងត្បូង ជំរុញឲ្យពិភាក្សាស្តីពីការរំសាយអាវុធបរមាណូ ។ លោកម៉ូនជេអ៊ីន ក៏បានអំពាវានាវដល់អាមេរិក និងកូរ៉េខាងជើង រៀងចំជំនួបពិភាក្សាលើកទី៤ ឲ្យបានឆាប់បំផុត ។ លោកត្រាំ និង គីម ជុងអ៊ុន បានជួបពិភាក្សាគ្នា ៣លើករួចមកហើយ នៅសឹង្ហបុរីនាថ្ងៃទី១២ ខែមិថុនា ឆ្នាំ២០១៨ លើកទីពីរនៅទីក្រុងហាណូយ ប្រទេសវៀតណាម ថ្ងៃទី ២៨ ខែកុម្ភៈ ឆ្នាំ ២០១៩ និង លើកទី៣ នៅថ្ងៃទី៣០ ខែមិថុនា ឆ្នាំ២០១៩ នៅព្រំដែន dmz រវាងកូរ៉េខាងត្បូង និងខាងជើង ។
លោកម៉ុន ជេអ៊ីន បានបញ្ជាក់ថា នៅពេលនេះ ទាំងអាមេរិក កូរ៉េខាងត្បូង និងកូរ៉េខាងជើង ចាំបាច់ត្រូវតែរៀបចំជំនួបពិភាក្សាឲ្យបានឆាប់បំផុតដែលអាចធ្វើទៅបាន។ លោកម៉ូន បញ្ជាក់ថា នេះជាពេលវេលាដែលត្រូវរំសាយបរមាណូ និងបង្កើនកិច្ចសហប្រតិបត្តិការសេដ្ឋកិច្ច ស៊ីជម្រៅ ជាមួយកូរ៉េខាងជើង ដែលជាមូលដ្ឋានគ្រឹះនៃសន្តិភាព ឧបទ្វីបកូរ៉េ៕
