សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ៖ បុរសវ័យចំណាស់ម្នាក់បានស្លាប់ ចំណែកបុរសម្នាក់ទៀតរងបួសធ្ងន់ ក្នុងហេតុការណ៍គ្រោះថ្នាក់ចរាចរណ៍ រវាងម៉ូតូបុកជាមួយម៉ូតូកាលពីវេលាម៉ោង៥ និង៥៥នាទីទៀបភ្លឺ ថ្ងៃទី២០ ខែសីហា ឆ្នាំ២០១៩ នៅលើកណាត់ផ្លូវជាតិលេខ៦ ត្រង់ចំណុចផ្លូវបំបែកចូលទៅឃុំបុស្បូវ ស្រុកព្រះនេត្រព្រះ ស្ថិតក្នុងភូមិសាលាក្រៅ សង្កាត់ភ្នៀត ក្រុងសិរីសោ័ណ ខេត្តបន្ទាយមានជ័យ ។
លោកនាយរងការិយាល័យ នគរបាលចរាចរណ៍ខេត្ត សួន នីប៉ូបានឲ្យដឹងថា ជនរងគ្រោះរងរបួសធ្ងន់ឈ្មោះ សុង បេឡា ភេទប្រុស អាយុ២៨ឆ្នាំ នៅភូមិបាណយ សង្កាត់ទឹកថ្លា ក្រុងសិរីសោភ័ណ បើកបរម៉ូតូម៉ាកហុងឌ្រីម ពណ៌ខ្មៅ ធុនសេ ១២៥ ជាបុគ្គលិកអង្គការប្រាសាក់ និងជនរងគ្រោះដែលស្លាប់ឈ្មោះតាន់ ឌឿន ភេទប្រុស អាយុ៧៦ឆ្នាំ នៅភូមិសូភី កំពុងស្វាយ ក្រុងសិរីសោភ័ណ ខេត្តបន្ទាយមានជ័យ បើកបរម៉ូតូឆាលី ។
លោកបញ្ជាក់ថា នៅមុនពេលកើតហេតុ ឈ្មោះ តាន់ ឌឿន គាត់បានបើកបរម៉ូតូ ម៉ាកឆាលី ក្នុងទិសដៅពីលិចទៅកើត ពេលដល់ចំណុចកើតហេតុផ្លូវបំបែក បានបត់ឆ្វេងដើម្បីទៅមើលចម្ការ ស្របពេលនោះ មានម៉ូតូម៉ាកហុងដាឌ្រីម ពណ៌ខ្មៅ ដែលបើកបរដោយឈ្មោះសុង បេឡា បើកស្របទិសគ្នាពីក្រោយក្នុង ទិសដៅពីលិចទៅកើត លុះទៅដល់ចំណុចកើតហេតុបានទាក់នឹងដៃចង្កូត បណ្តាលឲ្យលោកតាតាន់ ឌឿន ដួលខ្ទាតទៅលើទ្រូងថ្នល់ ក៏ត្រូវរថយន្ត១គ្រឿងមិនស្គាល់ម៉ាក បើកបរស្របទិសកិនពីលើជនរងគ្រោះបណ្ដាលឲ្យ ស្លាប់តែម្ដង ។ រថយន្តបង្កបើករត់គេចខ្លួនបាត់ ពេលនេះ សមត្ថកិច្ចកំពុងស្រាវជ្រាវ ។ ចំណែកឈ្មោះតាន់ បេឡា ទៅលើចិញ្ចើមថ្នល់រងរបួសធ្ងន់បាក់ឆ្អឹងស្លាបប្រចៀវ ត្រូវបានបញ្ជូនទៅកាន់មន្ទីរពេទ្យបង្អែក មិត្តភាពកម្ពុជា-ជប៉ុន នៅស្រុកមង្គលបូរី ។
ចំពោះវត្ថុតាង ម៉ូតូទាំង២គ្រឿង ខូចខាតស្រាល សមត្ថកិច្ចបានយកមករក្សាទុក នៅការិយាល័យ នគរបាលចរាចរណ៍ រង់ចាំដោះស្រាយនៅពេលក្រោយ ៕ នីម វណ្ណា
