សារព័ត៌មាន នគរវត្ត តែងតែនាំមុខគេជានិច្ច
អាមេរិកបានរក្សាភាពស្ងៀមស្ងាត់ខុសប្រក្រតី ចំពោះការបាញ់សាកល្បងកាំជ្រួចមីស៊ីលរបស់កូរ៉េខាងជើង ដល់ទៅ៧លើក កន្លងមក ក្នុងរយៈពេល ជិត១ខែ ដែលជាចំនួនច្រើនបំផុតមិនធ្លាប់មាន ។ អាមេរិក មិនបានថ្កោលទោសកូរ៉េខាងជើងដូចកាលពីមុនឡើយ មិនតែប៉ុណ្ណោះ អាមេរិកបានប្រកាសថា បានក្តាប់ព័ត៌មាន ទាំងស្រុងស្តីពីការបាញ់មីស៊ីលរបស់កូរ៉េខាងជើង ។
សារព័ត៌មានយ៉ុនហាប់របស់កូរ៉េខាងត្បូង បានផ្សាយថា កូរ៉េខាងជើង បានបាញ់សមីស៊ីល ពីរគ្រាប់ នៅព្រឹក ថ្ងៃទី២៤ ខែសីហានេះ ដោយមីស៊ីលហោះទៅកាន់សមុទ្រភាគខាងកើត កូរ៉េខាងជើង ។ ការបាញ់សាកល្បងនោះធ្វើឡើងនៅវេលាម៉ោង៦និង៤៥នាទី (ម៉ោងក្នុងតំបន់) ។មីស៊ីលទាំងពីរដើមបានហោះកម្ពស់៩៧គីឡូម៉ែត្រ ក្នុងចម្ងាយផ្លូវ៣៨០ គីឡូម៉ែត្រ ក្នុងល្បឿន លឿនជាង សំឡែង៦,៥ដង់ ។
សារព័ត៌មានយ៉ុនហាប់ បានដកស្រង់សម្តីអគ្គមេបញ្ជាការកម្លាំងទាហានកូរ៉េខាងត្បូង បានបញ្ជាក់ថា កូរ៉េខាងជើង បានបាញ់មីស៊ីលនៅព្រឹកថ្ងៃទី២៤ ខែសីហា ដោយបាញ់ចេញពីកោះ Sondok ស្ថិតនៅក្នុងខេត្ត Hamgyong កូរ៉េខាងជើង ។ នៅព្រឹកថ្ងៃទី២៤នេះ ការិយាល័យប្រធានាធិបតីកូរ៉េខាងត្បូងក៏បានកោះប្រជុំមន្ត្រីសន្តិសុខជាតិជាបន្ទាន់ស្ទីពីការបាញ់សាកល្បងមីស៊ីលខាងលើរបស់កូរ៉េខាងជើង។
ចំណែកកម្លាំងការពារដែនសមុទ្រប្រទេសជប៉ុន ក៏បានបញ្ជាក់ផងដែរ ថា បានឃើញកូរ៉េខាងជើង បាញ់មីស៊ីល ។ ក្រសួងការពារជាតិ ជប៉ុន បានបញ្ជាក់ទៅកាន់បណ្តាព័ត៌មាន NBC ថា កាំជ្រួចមីស៊ីលនាំផ្លូវ បានបាញ់ចេញពីកូរ៉េខាអជើង ប៉ុន្តែមីស៊ីលនោះ ហោះមិនទាន់ដល់ដែនសមុទ្ររបស់ជប៉ុននោះឡើយ។ មីស៊ីលដែលកូរ៉េខាងជើងបានបាញ់សាកល្បងគឺប្រភេទរយៈចម្ងាយខ្លី។
ឧបការីទទួលបន្ទុកកូរ៉េខាងជើងរបស់អាមេរិក លោក Stephen Biegun បានដឹកនាំគណៈប្រតិភូ ពិភាក្សាជានខ្ពស់ជាមួយកូរ៉េខាងជើង ហើយគណៈប្រតិភូនឹងទៅដល់កូរ៉េខាងត្បូង នៅក្នុងសប្តាហ៍នេះ ដើម្បីពិភាក្សាស្តីពីគម្រោងរៀបចំជំនួន ពិភាក្សាស្តីពីបរមាណូកូរ៉េខាងជើង ។
នេះជាការបាញ់សាកល្បងមីស៊ីលជាលើកទី៧ហើយរបស់កូរ៉េខាងជើង ក្នុងរយៈពេលមិនដល់មួយខែផងចាប់ពីថ្ងៃទី២៥ខែកក្កដា មកដល់ថ្ងៃ ទី២៤ខែសីហា ។ មុនការបាញ់សាកល្បងនោះ រដ្ឋមន្ត្រីការបរទេសកូរ៉េខាងជើង លោក Ri Yong Ho បានថ្កោលទោស រដ្ឋមន្ត្រីការបរទេសអាមេរិក លោក Mike Pompeo ថាបានធ្វើឲ្យប៉ះពាល់ដល់កិច្ចពិភាក្សាស្តីពី កម្មវិធីបរមាណូ ដោយប្រកាសបន្តដាក់ទណ្ឌកម្មទៅលើកូរ៉េខាងជើង។
សកម្មភាពខាងលើ របស់កូរ៉េខាងជើងកើតឡើង ក្រោយពេលដែល កូរ៉េខាងជើងនិយាយថា ខ្លួនត្រៀមទាំងការពិភាក្សា និងទាំងការប្រឈមមុខ ជាមួយអាមេរិក ។
លោក Ri Yong Ho រដ្ឋមន្ត្រីក្រសួងការបរទេសកូរ៉េខាងជើងបានថ្លែងកាលពីថ្ងៃទី២៣ ខែសីហា ឆ្នាំ២០១៩ថា ទីក្រុងព្យុងយ៉ាងបានត្រៀមខ្លួនទាំងសម្រាប់កិច្ចពិភាក្សា និងទាំងការប្រឈមមុខជាមួយសហរដ្ឋអាមេរិក ហើយបានព្រមានទីក្រុងវ៉ាស៊ីនតោនថា ការបន្តជ្រើសរើសយកវិធីដាក់ទណ្ឌកម្មនោះ អាចជាការគិតគូរដ៏ខុសឆ្គងមួយ ។ នេះបើតាមសារព័ត៌មានរដ្ឋកូរ៉េខាងជើង ដែលបានចេញផ្សាយ ។
កិច្ចពិភាក្សាកម្រិតការងារ រវាងសហរដ្ឋអាមេរិក និងកូរ៉េខាងជើងនៅមិនទាន់ចាប់ផ្តើមនោះទេ ចាប់តាំងតែពីពេលជាប់គាំង ក្រោយជំនួបបរាជ័យលើកទីពីររវាងប្រធានាធិបតី ដូណាល់ ត្រាំ និងលោកគីម ជុងអ៊ុន នៅទីក្រុងហាណូយ កាលពីចុងខែកុម្ភៈ ឆ្នាំ២០១៩នោះរួចមក ។
ប្រធានាធិបតី ត្រាំ និងលោក គីម បានជួបគ្នាម្តងទៀតកាលពីខែមិថុនា ឆ្នាំ២០១៩ នៅឯព្រំដែនអន្តរកូរ៉េ ហើយមេដឹកនាំទាំងពីរបានព្រមព្រៀងគ្នាថា នឹងបន្តបើកកិច្ចពិភាក្សា ប៉ុន្តែចាប់តាំងពីពេលនោះមិនមានមានកិច្ចប្រជុំណាមួយត្រូវបានធ្វើឡើងនៅឡើយទេ ។
លោក Ri បានថ្លែងថា«បើសិនអាមេរិកនៅតែសុបិន្តចង់សម្រេចបានលទ្ធផលគ្រប់យ៉ាង តាមរយៈការដាក់ទណ្ឌកម្មនោះ, យើងត្រូវតែអនុញ្ញាតឲ្យបន្តក្តីសុបិន្ត ឬបំបែកក្តីសុបិននោះចុះ ។ យើងបានត្រៀមទាំងការពិភាក្សា និងទាំងការប្រឈមមុខ ។ ប្រសិនបើអាមេរិកព្យាយាមប្រឈមមុខជាមួយយើងដោយការដាក់ទណ្ឌកម្ម ហើយមិនព្រមបោះបង់ចោលឥរិយាបថរបស់ខ្លួននោះ, វាអាចជាការគិតគូខុស» ។
លោក Ri ក៏បានចោទប្រកាន់រដ្ឋមន្ត្រីក្រសួងការបរទេសអាមេរិក លោក Mike Pompeo ពីការជះស្រមោលខ្មៅងងឹតជុំវិញជំនួបរវាងអាមេរិក-កូរ៉េខាងជើងផងដែរ ។ លោក Ri បានបញ្ជាក់ថា លោក Pompeo កាន់តែចាប់អារម្មណ៍ខ្លាំងចំពោះមហិច្ឆតានយោបាយផ្ទាល់ខ្លួន ជាងគោលនយោបាយការបរទេសអាមេរិកនាពេលបច្ចុប្បន្ននេះទៅទៀត ។
ការថ្លែងរបស់លោក Ri នៅលើបណ្តាញសារព័ត៌មានកូរ៉េខាងជើង KCNA បែបនេះ ក្រោយពីលោក Pompeo ធ្វើបទសម្ភាសន៍ជាមួយបណ្តាញព័ត៌មាននៅក្នុងសប្តាហ៍នេះថា បើសិនកូរ៉េខាងជើងមិនព្រមរំសាយកម្មវិធីអាវុធនុយក្លេអ៊ែរនោះទេ អាមេរិកនឹងរក្សាការដាក់ទណ្ឌកម្មឲ្យកាន់តែខ្លាំងក្លាជាប្រវត្តិសាស្ត្រ ខណៈដែលកំពុងបញ្ចុះបញ្ចូលកូរ៉េខាងជើងថា ការរំសាយអាវុធនុយក្លេអ៊ែរគឺជាផ្លូវដ៏ត្រឹមត្រូវនោះ ។
លោក Stephen Biegun ប្រតិភូអាមេរិក ដែលដឹកនាំក្រុមពិភាក្សា កម្រិតការងារ ជាមួយភាគីកូរ៉េខាងជើងនោះ បានទៅដល់ទីក្រុងសេអ៊ូលរួចហើយកាលពីថ្ងៃ២០ ខែសីហា ដើម្បីពិភាក្សា ។ លោក Kim Hyun-chong អនុប្រធានទីប្រឹក្សាសន្តិសុខជាតិកូរ៉េខាងត្បូងបានថ្លែងថា ជំនួបពិភាក្សាស្តីអំពីការរំសាយអាវុធនុយក្លេអ៊ែរ នឹងកើតឡើងឆាប់ៗ ។ ការផ្តល់អំពីសុទិដ្ឋិនិយមបែបនេះ ក្រោយពីជំនួបមួយត្រូវបានធ្វើឡើងកាលពីថ្ងៃទី២២ ខែសីហា ឆ្នាំ២០១៩ ជាមួយ លោក Biegun ៕
