ព័ត៌មានទាន់ហេតុការណ៍៖

បើកម៉ូតូល្បឿនលឿនរេចង្កូត​បុក​រង្វង់មូលឯករាជ្យ​​ ក្រុងប៉ៃលិន ស្លាប់ និងរបួសធ្ងន់

ចែករំលែក៖

ខេត្តប៉ៃលិន៖ បុរស២នាក់ បានរងរបួសធ្ងន់ម្នាក់ និងស្លាប់ម្នាក់ ដោយសារបើកម៉ូតូលឿនក្នុងទិសដៅ ពីលិចទៅកើត លើដងផ្លូវលេខ៥៧ ដល់រង្វង់មូលឯករាជ្យ ស្រាប់តែរេចង្កូតទៅបុកតែម្ដង ។

ហេតុការណ៍នេះកើតឡើងកាលពី​វេលាម៉ោង ២២និង៤៥នាទី ថ្ងៃទី២៥ ខែសីហា ឆ្នាំ២០១៩ នៅចំណុចភូមិ​វត្ត សង្កាត់​ប៉ៃលិន​ ក្រុងប៉ៃលិន ខេត្ត​ប៉ៃលិន ។

ករណីនេះ បណ្តាលឲ្យមនុស្សម្នាក់​របួសធ្ងន់ និង​ម្នាក់​ទៀត​ស្លាប់​នៅនឹង​កន្លែង​កើត​ហេតុ​ ។

ជនរងគ្រោះ​ទាំង​ពីរ​មាន​ឈ្មោះ​៖ ទី១-ឈ្មោះ ឥត សុធារ៉ា ភេទប្រុស អាយុ ២៥ឆ្នាំ មុខរបរលក់ដូរក្នុងផ្សារប៉ាហ៊ី មាន​ទីលំនៅក្នុងភូមិប៉ាហ៊ីជើង សង្កាត់​ប៉ៃលិន​ ក្រុងប៉ៃលិន ខេត្តប៉ៃលិន បើកបរម៉ូតូម៉ាក Zomer X ពាក់ស្លាកលេខ ប៉ៃលិន 1B -5966 ស្លាប់នៅកន្លែងកើតហេតុ ។ ទី២ អ្នករួមដំណើរ-ឈ្មោះ​ ខន សុខហៀង ភេទ​ប្រុស​ អាយុ ២៧ឆ្នាំ​ មានទីលំនៅក្នុងភូមិអូតាពុកក្រោម សង្កាត់ទួលល្វា ក្រុងប៉ៃលិន ខេត្តប៉ៃលិន រងរបួសធ្ងន់ ចំក្បាល បញ្ជូនទៅ​សង្គ្រោះ​បន្ទាន់​នៅ​មន្ទីរ​ពេទ្យ​ខេត្ត​បាត់ដំបង់ ។

មូលហេតុបណ្ដាលមកពីរ​កត្តា​មនុស្ស​បើកបរលឿនក្នុងស្ថានភាពស្រវឹង និងមិនពាក់មួកសុវត្តិភាព រួចជ្រុលទៅបុកជាមួយវិមានឯករាជ្យ ។

សមត្តកិច្ចបានបន្តថា បច្ចុប្បន្នវត្ថុតាងត្រូវបានយកទៅរក្សាទុកនៅការិយាល័យនគរបាលចរាចរណ៍​ផ្លូវ​គោកនៃ​ស្នងការដ្ឋាន​នគរបាល​ខេត្តប៉ៃលិន ចំណែក​ជនរងគ្រោះ​ដែល​បាន​ស្លាប់​បាត់​បង់ ត្រូវ​បាន​កម្លាំងជំនាញចរាចរណ៍ យកទៅ​ដាក់​ដល់​គេហដ្ឋាន ដើម្បីធ្វើបុណ្យតាមប្រពៃណី ៕ ស សារ៉េត

 


ចែករំលែក៖