រថយន្តRANGE ROVER បើកលឿនជ្រុលទៅបុកក្បាលនាគទ្រូងផ្លូវ បណ្តាលឲ្យរថយន្តក្រឡាប់ផ្ងារជើង

ភ្នំពេញ ៖  រថយន្តRANGE ROVER បើកលឿនជ្រុលទៅបុកក្បាលនាគទ្រូងផ្លូវ បណ្តាលឲ្យរថយន្តក្រឡាប់ផ្ងារជើងឡើងល សំណាងល្អអ្នកបើកបរនឹងអ្នករួមដំណើរ រងរបួសស្រាល។ ហេតុការណ៍នេះបានកើតឡើងនៅម៉ោង១២និង៣០នាទីរំលងអធ្រាត ថ្ងៃទី០១ ខែកញ្ញា ឆ្នាំ២០១៩ នៅតាមបណ្តោយផ្លូវលេខ២៧១ មុខមន្ទីរពេទ្យលោកសង្ឃ ភូមិបុរីកម្មករ សង្កាត់ទឹកថ្លា ខណ្ឌសែនសុខ ។

ប្រភពពត៌មាននៅកន្លែងបានឲ្យដឹងថា រថយន្តបង្កម៉ាក RANGE ROVER ពណ៌ខ្មៅ ពាក់ស្លាកលេខ ភ្នំពេញ 2BD-8268 បើកបរដោយយុវជនម្នាក់ និងរួមដំណើរជាមួយ នារីម្នាក់ ដែលនៅកន្លែងកើតហេតុ ហើយនៅមុនពេលកើតហេតុ រថយន្តបើកតាមបណ្តោយផ្លូវលេខ២៧១ ក្នុងទិសដៅពីជើងទៅត្បូងយ៉ាងលឿន ខណៈមកដល់ចំណុចកើតហេតុរថយន្តបានជ្រុលចង្កូតទៅបុកក្បាលនាគ ទ្រូងផ្លូវ បណ្តាលឲ្យក្រឡាប់ផ្ងារជើង អ្នកបើកបរ និងអ្នករួមដំណើរ រងរបួសស្រាល ពលរដ្ឋជួយទាញយកចេញ ហើយនារីវ័យក្មេង បានគេចទៅបាត់ នៅតែយុវជនជាអ្នកបើកបរ នៅកន្លែងកើតហេតុ ចំណែករថយន្តក្រោយកើតហេតុភ្លាម មានហុយផ្សែង ដោយខ្លាចកើតជាអគ្គិភ័យ ពលរដ្ឋនាំគ្នាដងទឹកជះពន្លត់។

តាមសម្តីយុវជនអ្នកបើកបរ មិនប្រាប់ឈ្មោះ គ្រាន់តែឲ្យដឹងថា ពួកគេទើបចេញពីកម្មវិធី ប្រញ៉ាប់ធ្វើដំណើរទៅផ្ទះ ដល់ចំណុច ហាក់បីដូចជាងងឹតព្រិលភ្នែក ទើបជ្រុលទៅបុក ទ្រូងផ្លូវតែម្តង ។

បន្ទាប់ពីកើតហេតុ សមត្ថកិច្ចចុះទៅដល់ទីតាំងកើតហេតុ  រួចស្ទូចយករថយន្តទៅរក្សាទុកនៅការិយាល័យចរាចរផ្លូវគោក  រួមទាំងអ្នកបើកបររថយន្តផងដែរ ដើម្បីដោះស្រាយគ្នានៅពេលក្រោយ៕ ជ្រោយពេជ្រ