សារព័ត៌មាន នគរវត្ត តែងតែនាំមុខគេជានិច្ច
រដ្ឋាភិបាលទីក្រុងវ៉ាស៊ីនតោន បានសម្រេច អនុម័តដាក់ទណ្ឌកម្មទៅលើវិស័យ អវកាសរបស់អ៊ីរ៉ង់ ដោយចាត់ទុកថា វិស័យនោះជាការលាក់បាំងដល់កម្មវិធីអភិវឌ្ឍន៍កាំជ្រួចមីស៊ីលឆ្លងទ្វីបរបស់អ៊ីរ៉ង់ ។
ការដាក់ទណ្ឌកម្មថ្មីរបស់អាមេរិក គឺបានហាមប្រាមពលរដ្ឋអាមេរិក រកស៊ីជាមួយបណ្តាក្រុមហ៊ុនអ៊ីរ៉ង់ ក្នុងនោះមានវិស័យអវកាសជាដើម ។ រដ្ឋមន្ត្រីការបរទេសអាមេរិក លោក Mike Pompeo បានបញ្ជាក់ថា អាមេរិក មិនអនុញ្ញាតឲ្យអ៊ីរ៉ង់ប្រើប្រាស់កម្មវិធីអវកាសដើម្បីផលិតមីស៊ីលឆ្លងទ្វីបនោះឡើយ ។
ក្នុងពេលជាមួយគ្នានេះដែរអ៊ីរ៉ង់ បានព្រមានថា នឹងឈប់គោរពទៅតាមច្ចសន្យា កាលពីឆ្នាំ២០១៥ ប្រសិនបើប្រទេសតំបន់អឺរ៉ុបមិនមានវិធានការការពារសេដ្ឋកិច្ចអ៊ីរ៉ង់ ទប់ស្កាត់ការដាក់ទណ្ឌកម្មពីអាមេរិកនោះទេ ។ រដ្ឋមន្ត្រីការបរទេសអ៊ីរ៉ង់ លោក Javad Zarif បានបញ្ជាក់នៅក្នុងសន្និសីទកាសែតនៅថ្ងៃទី៣ ខែកញ្ញាថា « វាជារឿងអត់ប្រយោជន៍បើអ៊ីរ៉ង់នៅតែបន្តគោរពការសន្យា ចំណែកប្រទេសអឺរ៉ុប មិនអាចជួយអ្វីដល់អ៊ីរ៉ង់ បាន ដូចការសន្យា ។ អាមេរិកនៅតែបន្តដាក់ទណ្ឌកម្មទៅលើអ៊ីរ៉ង់ដដែល» ។
កាលពីខែកក្កដាកន្លងមកអ៊ីរ៉ង់ បានចម្រើនសារធាតុអ៊ុយរ៉ានីញ៉ូម លើសពីកម្រិតអនុញ្ញា ដល់ទៅ២០២,៨ គីឡូក្រាម និងកម្រិត កំហាប់នៃភាពបរិសុទ្ធអ៊ុយរ៉ានីញ៉ូម លើសពី ៣,៦៧ភាគរយ ។ ចំនួនទំាំងនោះនៅតិចជាង ពេលមុនអ៊ីរ៉ង់ចុះកិច្ចព្រមព្រៀង បរមាណូជាមួយអាមេរិក នៅឆ្នាំ២០១៥ ពេលនោះអ៊ីរ៉ង់អ៊ីរ៉ង់ចម្រើនសារធាតុអ៊ុយរ៉ានីញ៉ូម បានដល់ទៅ២០ភាគរយ ។ ដើម្បីឈានដល់ការផលិត គ្រាប់បែកបរមាណូ គឺត្រូវចម្រើនកម្រិត កំហាប់នៃភាពបរិសុទ្ធដល់ទៅ៩០ភាគរយ ។
ប៉ុន្តែអ៊ីរ៉ង់បានប្រកាសថា នឹងឈប់គោរពទៅតាមការសន្យា នៅថ្ងៃទី៦ ខែកញ្ញាខាងមុខ ដោយបន្តចម្រើនសារធាតុអ៊ុយរ៉ានីញ៉ូមលើកពី២០ភាគរយ ក៏ដូចជាបង្កើន ម៉ាស៊ីនចម្រើនសារធាតុបបរមាណូបន្ថែមទៀត ។
កាលពីចុងខែ សីហា កន្លងមក អ៊ីរ៉ង់បានដាក់លក្ខខណ្ឌ នាំប្រេងចេញទៅក្រៅប្រទេសចំនួន៧សែនបារ៉ែល ក្នុងមួយថ្ងៃ ហើយអាចកើងឡើងដល់ទៅ១,៥ លានបារ៉ែល ប្រសិនបើអាមេរិក និងលោកខាងលិចចង់ពិភាក្សា ស្តីពីកិច្ចព្រមព្រៀងបរមាណូជាមួយអ៊ីរ៉ង់ ។
នៅក្នុងព្រឹត្តិការណ៍មួយផ្សេងទៀតដែលពាក់ព័ន្ធនោះដែរ អង់គ្លេស មានគម្រោងបញ្ជូនយន្តហោះគ្មានមនុស្សបើក ទៅកាន់តំបន់ឈូងសមុទ្រពែក្ស ដើម្បីការពារនាវាដឹកទំនិញនានា ដែលឆ្លងកាត់ដែនសមុទ្រ ជាប់នឹងប្រទេសអ៊ីរ៉ង់ ។
កងកម្លាំងទាហានអាកាសអង់គ្លេស មានយន្តហោះគ្មានមនុស្សបើកបរ (ដ្រូន) ជាច្រើនគ្រឿង នៅក្នុងប្រទេសគុយវ៉ែត ដែកជាការត្រៀមលក្ខណៈចូលរួម នៅក្នុងសង្គ្រាម នៅក្នុងប្រទេសអ៊ីរ៉ាក់ និង ស៊ីរី ។ បើតាមសារព័ត៌មាន Sky News បានផ្សាយថា យន្តហោះគ្មានមនុស្សបើកបរទាំងនោះ នឹងបំពេញភារកិច្ច តាមដានរាល់សកម្មរបស់នាវាដឹកប្រេង ឆ្លងកាត់ដែនសមុទ្រពែក្ស ។
អ្នកនាំពាក្យកម្លាំងទាហានជើងទឹក អង់គ្លេស លោក Dean Basset បានឲ្យដឹងថា«ការគំរាមកំហែងទៅលើនាវាពាណិជ្ជកម្ម កំពុងតែកើនឡើងជារៀងរាល់ថ្ងៃ ហើយ យើងមិនឃើញអ៊ីរ៉ង់ គោរព ទៅតាម ច្បាប់អន្តរជាតិ នោះឡើយ» ។
កាលពីខែកក្កដា កន្លងមក នាវាដឹកប្រេងមួយគ្រឿងរបស់អ៊ឺរ៉ង់ ត្រូវអង់គ្លេសឃាត់ នៅតំបន់សមុទ្រ Gibraltar ។ នៅពេលនោះ អ៊ីរ៉ង់បានចោទប្រកាន់សកម្មភាពរបស់អង់គ្លេស គឺមិនខុសអ្វីពីការប្លន់នាវានោះឡើយ ។ ឆ្លើយតបទៅនឹងសកម្មភាពខាងលើ អ៊ីរ៉ង់ក៏បានចាប់នាវាដឹកទំនិញអង់គ្លេស នៅតំបន់សមុទ្រពែក្ស ផងដែរ ៕
