សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ នារសៀលថ្ងៃព្រហស្បតិ៍ ៧កើត ខែភទ្របទ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី០៥ ខែកញ្ញា ឆ្នាំ២០១៩នេះ លោកទេសរដ្ឋមន្ត្រី គន់ គីម អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជាក្នុងពិធីអញ្ជើញជួបសំណេះសំណាលសាកសួរសុខទុក្ខជាមួយ ពុក ម៉ែ បងប្អូន គ្រួសារអតីតយុទ្ធជន និងប្រគល់ផ្ទះដែលជាអំណោយដ៏ថ្លៃថ្លារបស់សម្តេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនមន្ទីរអង្គភាពនានា ជួយឧបត្ថម្ភគាំទ្រ ស្ថិតនៅដីសម្បទានសង្គមកិច្ចក្នុងភូមិជីកដី ឃុំអណ្តូងត្របែក ស្រុករមាសហែក ខេត្តស្វាយរៀង ។
លោក ម៉ែន វិបុល អភិបាលខេត្ត ស្វាយរៀងបានថ្លែងនូវការកោតសសើរចំពោះលោក លោកស្រីជាប្រធានមន្ទីរអង្គភាពនានាក្នុងខេត្តស្វាយរៀង ដែលបានយកចិត្តទុកក្នុងការចុះសួរសុខទុក្ខតាមផ្ទះរួមទាំងការនាំយកនូវកូនឈើហូបផ្លែ ដែលជាដំណាំផ្សេងៗមកចែកជូន និងដាំដុះជាមួយបងប្អូនប្រជាពលរដ្ឋនៅទីនេះ តាមអ្វីដែលរដ្ឋបាលខេត្តបានបែងចែក។
លោកបន្ថែមថាតាមរយៈ លោកទេសរដ្ឋមន្ដ្រី គន់ គីម បងប្អូនអតីតយុទ្ធជនដែលកំពុងរស់នៅទីនេះ បានគោរពថ្លែងនូវការដឹងគុណយ៉ាងជ្រាលជ្រៅគ្មានថ្ងៃបំភ្លេចបានចំពោះសម្តេចតេជោ ហ៊ុន សែន ដែលបានផ្តល់ដីផ្តល់ផ្ទះជូនពួកគាត់ ធ្វើឲ្យជីវភាពរបស់ពួកគាត់ដែលពីមុនមានការខ្វះខាតឥឡូវបានធូរធាមួយកំរិត និងសូមអរគុណ សម្តេច ដែលតែងតែឲ្យលោកទេសរដ្ឋមន្ដ្រី ចុះសួរសុខទុក្ខ និងដោះស្រាយការលំបាកជូនពួកគាត់បានទាន់ពេលវេលា។
ក្នុងឱកាសនោះលោក គន់ គីម បានថ្លែងថា សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត
ជានិច្ចកាលតែងតែគិតគូរ និងយកចិត្តទុកដាក់ខ្ពស់ចំពោះអតីតយុទ្ធជន ដែលជាបានរួមចំណែកយ៉ាងធំធេងក្នុងបុព្វហេតុជាតិមាតុភូមិ។
លោកបន្ថែមថា ដើម្បីជំរុញការអភិវឌ្ឍនៅតាមបន្ទាត់ព្រំដែនរាជរដ្ឋាភិបាលកម្ពុជា បាននិងកំពុងកសាងប្រព័ន្ធហេដ្ឋារចនាសម្ព័ន្ធ និងដាក់ចេញគោលនយោយបាយផ្តល់ដីសម្បទានសង្គមកិច្ចនៅតាមព្រំដែនជូនដល់កងទ័ព និងក្រុមគ្រួសារអតីតយុទ្ធជនផងដែរ៕ យឹម សុថាន
