សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កម្លាំងអាវុធហត្ថរាជធានីភ្នំពេញ សហការជាមួយកម្លាំងអាវុធហត្ថខណ្ឌពោធិ៍សែនជ័យ បានចុះបង្ក្រាបហាងចិនចំនួន៤កន្លែង បង្កប់សេវាផ្លូវភេទឃាត់ជនជាតិចិន និងវៀតណាមចំនួន២៩នាក់ ។
ប្រតិបត្តិការណ៍នេះ បានធ្វើឡើងកាលពីយប់ថ្ងៃទី៨ ខែកញ្ញា ឆ្នាំ២០១៩ នៅចំណុចហាង៤កន្លែងជិតៗគ្នា ដែលទីតាំងទី១ មានយីហោ កន្លែងសំរាកកាយ ទី២យីហោ អេស៊ាងទីស្បាម៉ាស្សា ទី៣ យីហោ សំរាកលំហែរម៉ាស្សា ទី៤មានយីហោ ម៉ាស្សាផ្ទះក្រហម ទីតាំងទាំង៤ នៅផ្លូវលេខ១១៣k ភូមិព្រៃទា1 សង្កាត់ចោមចៅទី៣ ខណ្ឌពោធិ៍សែនជ័យ ។
តាមប្រភពព័ត៌មានពីកន្លែងកើតហេតុបានឲ្យដឹងថា ទីតាំងខាងលើជារបស់ជនជាតិចិនជួលបើកហាង យីហោខាងលើដោយមានបុគ្គលិកនារីៗជាជនជាតិចិន និងវៀតណាមជាច្រើនដោយសង្ស័យទីតាំងខាងលើបង្កបសេវាផ្លូវភេទ ។
ក្រោយពីទទួលដំណឹងពីប្រជាពលរដ្ឋកម្លាំងអាវុធហត្ថរាជធានីភ្នំពេញបានសើបអង្កេតរហូតចុះទៅបង្ក្រាបជាកស្តែងតែម្តង ។
ក្នុងប្រតិបត្តិការខាងលើនេះកម្លាំងអាវុធហត្ថឃាត់ខ្លួនមនុស្សប្រុសស្រីចំនួន២៩នាក់ ក្នុងនោះនារីចំនួន១៧នាក់ ជនជាតិចិន១៤នាក់វៀតណាម៣នាក់ និងបុរសជនជាតិចិន១២នាក់ផងដែរ ។
ក្រោយឃាត់ខ្លួនជនសង្ស័យខាងលើកម្លាំងបាននាំខ្លួនទៅទីបញ្ជាការអាវុធហត្ថរាជធានីដើម្បីកសាងសំណុំរឿងចាត់ការតាមច្បាប់ដោយឡែកទីតាំងទាំង៤ខាងលើត្រូវបានបិទបណ្តោះអាសន្ន ៕ សុខាសែនជ័យ
