សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ប្រព័ន្ធព័ត៌មានជាច្រើននាពេលកន្លងមក បានផ្សព្វផ្សាយស្តីពីឧកញ៉ា គិត ធាង ម្ចាស់ក្លិបកម្សាន្តរ៉ក់ដែលពាក់ព័ន្ធសម្រួលទីតាំងឲ្យប្រព្រឹត្តបទល្មើសជួញដូរគ្រឿងញៀនហើយត្រូវបានសមត្ថកិច្ចចាប់ឃុំខ្លួន ប៉ុន្តែជនត្រូវចោទរូបនោះ បានយកមន្ទីរពេទ្យ មិត្តភាពខ្មែរ-សូវៀតធ្វើពន្ធនាគារដេកសុខស្រួលរាប់ខែមកហើយ។ ករណីនេះសូម្បីតែខាងពន្ធនាគារ ក៏មិនមានលទ្ធភាពយកឧកញ៉ា គិត ធាង ទៅឃុំនៅពន្ធនាគារ PJនោះដែរ ។
ប្រភពព័ត៌មានមួយត្រូវបានទម្លាយចេញពីមន្ត្រីពន្ធនាគារមកថា នៅថ្ងៃចន្ទ ទី៩ កញ្ញា ឆ្នាំ២០១៩ ខាងមន្ទីរពេទ្យមិត្តភាពខ្មែរ-សូវៀត ដែលជាកន្លែងដែលលោកឧកញ៉ា គិត ធាង សម្រាកព្យាបាលជំងឺនោះមន្ទីពេទ្យបានធ្វើឯកសាររួចរាល់ហើយ ដើម្បីប្រគល់ជនត្រូវចោទឧកញ៉ា គិត ធាង ឲ្យទៅឃុំខ្លួននៅពន្ធនាគារគ្រប់គ្រងវិញ ដោយ សារឧកញ៉ា គិត ធាង គ្មានជំងឺអីធ្ងន់ធ្ងរទេ ។ បន្ទាប់ពីទទួលបានការជូនដំណឹងខាងមន្ទីរពេទ្យយ៉ាងដូច្នេះ ខាងពន្ធនាគារPJ ក៏បានត្រៀមកម្លាំងរួចជាស្រេច ដើម្បីទៅទទួលយកឧកញ៉ា គិត ធាង យកមកដាក់ក្នុងពន្ធនាគារតាមច្បាប់អ្នកត្រូវរង់ចាំទទួលទោសវិញ ។
ប៉ុន្តែបើតាមមន្ត្រីពន្ធនាគារម្នាក់ឲ្យដឹងថា ការជូនដំណឹងពីខាងមន្ទីរពេទ្យ កាលពីថ្ងៃទី៩ ខែកញ្ញា នោះ ស្រាប់តែព្រឹកថ្ងៃអង្គារ ទី១០ កញ្ញា ឆ្នាំ២០១៩ កម្លាំងនគរបាលពន្ធនាគារត្រៀមទៅទទួលជនត្រូវចោទមកដាក់ពន្ធនាគារវិញទៅហើយ មិនដឹងរឿងអីស្រាប់តែខាងមន្ទីរពេទ្យបានជូនដំណឹងទៅពន្ធនាគារវិញថា សុំផ្អាកវិញសិន។ករណីបានធ្វើឲ្យបែកធ្លាយរឿងដោយជនត្រូវចោទឧកញ៉ា គិត ធាងមិនមានភាពប្រក្រតីដោយ ត្រូវបានគេមើលឃើញថា នៅក្នុងមន្ទីរពេទ្យឧកញ៉ា គិត ធាង បានប្រើ ប្រាស់បន្ទប់១ស្នាក់នៅតែ ម្នាក់ឯង ដោយមានបំពាក់ឧបរណ៍ និងសម្ភារប្រើប្រាស់គ្រប់គ្រាន់មិនខុសពីនៅក្នុងភូមិគ្រិះផ្ទាល់ខ្លួនឡើយ ។
ប្រភពដដែលបានឲ្យដឹងទៀតថា ជាងនេះទៀត ជនត្រូវចោទឧកញ៉ា គិត ធាង ត្រូវបានគេសង្កេតឃើញប្រពន្ធនៅកំដដាំបាយដាំទឹកមើលថែ និងដេកនៅជាមួយគ្នាទាំងយប់ទាំងថ្ងៃ ខុសពីជនជាប់ចោទដទៃដែលគ្មានប្រាក់ដេកបន្ទប់ចង្អៀតមានតែកង្ហាល់ ។ ជាមួយនេះដែរក៏បែកធ្លាយថា មានអតិថិជនជាច្រើននាក់ ចេញ-ចូលហូរហែទៅជួបជនត្រូវចោទ ខុសពីភាពជាអ្នកទោសជាប់ឃុំ ដែលគ្មានសិទ្ធិសេរីភាពនោះឡើយ ។
ពាក់ព័ន្ធករណីនេះភ្នាក់ងារកាសែតនគរវត្តមិនអាចទំនាក់ទំនងនាយកមន្ទីរពេទ្យ មិត្តភាពខ្មែរ-សូវៀត ដើម្បីសុំការបញ្ជាក់ពីមូលហេតុដែលមិនត្រូវបានការអនុញ្ញាតឲ្យជនត្រូវចោទឧកញ៉ា គិត ធាង យកទៅឃុំខ្លួននៅពន្ធនាគារវិញដោយសារមូលហេតុអ្វីបានឡើយ ៕ ប្រាថ្នា
