សារព័ត៌មាន នគរវត្ត តែងតែនាំមុខគេជានិច្ច
សង្គ្រាមពាណិជ្ជកម្ម រវាងអាមេរិក និងចិន មានសញ្ញាឆ្ពោះទៅរកភាពល្អប្រសើរនឹងគ្នាវិញ នៅក្នុងកិច្ចពិភាក្សា នាខែតុលា ខាងមុខ ដោយពេលនេះ ទាំងអាមេរិក និងចិនបាន សម្រេច ដកថយម្នាក់មួយជំហាន នៅក្នុងសង្គ្រាមពាណិជ្ជកម្មនោះ។
កន្លងមក ទីក្រុងប៉េកាំង បានប្រកាសថា នឹងបង្កើនការទិញផលិតផលកសិកម្មពីអាមេរិក ហើយពេលនេះដែរ ប្រធានាធិបតីអាមេរិក លោក ដូណាល់ ត្រាំ បាននិយាយថា សហរដ្ឋអាមេរិកនឹងពន្យារពេលផែនការដំឡើងពន្ធ លើផលិតផលនាំចូលពីចិនមានតម្លៃ ២៥០ពាន់លានដុល្លារ ពីថ្ងៃទី០១ ខែតុលា ទៅថ្ងៃទី១៥ ខែតុលាវិញ។ ទាំងនោះជាសញ្ញាដ៏ល្អបំផុត មិនធ្លាប់មានចាប់តាំងពីសង្គ្រាមពាណិជ្ជកម្មផ្ទុះឡើយ។
នៅក្នុងសារបង្ហោះលើ Twitter នៅថ្ងៃពុធសប្ដាហ៍នេះ លោក ដូណាល់ ត្រាំ បានគូសបញ្ជាក់ដូច្នេះថា «ជាកាយវិការនៃចេតនាល្អយើងបានសម្រេចចិត្ត ពន្យារពេលការដំឡើងពន្ធពី ២៥-៣០ភាគរយ លើទំនិញនាំចូលពីចិនមានតម្លៃ ២៥០ពាន់លានដុល្លារ ពីថ្ងៃទី០១ ខែតុលា ទៅថ្ងៃទី១៥ ខែតុលាវិញ»។
លោក ត្រាំ បន្ថែមថា ការពន្យារពេលផែនការដំឡើងពន្ធនេះ ធ្វើឡើងតបតាមសំណើរបស់ ឧបនាយករដ្ឋមន្ត្រីចិន លោក លីវ ហេ (Liu He) និងដោយសារតែចិនត្រូវប្រារព្ធខួបលើកទី ៧០ នៃថ្ងៃបង្កើតសាធារណរដ្ឋប្រជាមានិតចិន នៅថ្ងៃទី០១ ខែតុលាខាងមុខនេះ។
គួរជម្រាបថា កាលពីថ្ងៃពុធកន្លងទៅ ចិនក៏បានប្រកាសលើកលែងការយកពន្ធ លើផលិតផលនាំចូលពីសហរដ្ឋអាមេរិកចំនួន ១៦មុខ ដើម្បីសម្រួលដល់កិច្ចចរចាពាណិជ្ជកម្ម រវាងក្រុមមន្ត្រីជាន់ខ្ពស់នៃប្រទេសទាំងពីរ ដែលគ្រោងនឹងប្រព្រឹត្តទៅ នៅដើមខែតុលាខាងមុខនេះក្នុងទីក្រុងវ៉ាស៊ីនតោន។
រដ្ឋាភិបាលទីក្រុងប៉េកាំង និងទីក្រុងវ៉ាស៊ីនតោន បានប្រឈមមុខដាក់គ្នា នៅក្នុងសង្គ្រាមពាណិជ្ជកម្ម អស់រយៈពេលមួយឆ្នាំមកហើយ។ មហាយក្សសេដ្ឋកិច្ចលេខ១ (អាមេរិក) បានដំឡើងពន្ធបន្ថែមទៅលើមុខទំនិញនាំចូលពីប្រទេសចិន មានតម្លៃជាង៥០០ពាន់លានដុល្លារអាមេរិក ហើយមហាសេដ្ឋកិច្ចយក្សលេខ២ (ចិន) ក៏បានដំឡើងពន្ធគយទៅលើទំនិញនាំចូលមកពីប្រទេសអាមេរិកផងដែរ។ ដោយសារតែមានការតបតដាក់គ្នាទៅវិញទៅមក មិនចេះចប់នោះ ទើបមហាអំណាចសេដ្ឋកិច្ចរបស់ពិភពលោកទាំង២នេះ នឹងចាប់ផ្ដើមមានគម្រោងចរចាគ្នាស្ដីពីពាណិជ្ជកម្ម នៅខែក្រោយនេះ៕
