សារព័ត៌មាន នគរវត្ត តែងតែនាំមុខគេជានិច្ច
ដើម្បីសេដ្ឋកិច្ចរីកចម្រើន ប្រទេសជាច្រើន ក៏បានសម្រេចបញ្ចប់ទំនាក់ទំនងជាមួយកោះតៃវ៉ាន ទៅទំនាក់ទំនងជាមួយរដ្ឋាភិបាលទីក្រុងប៉េកាំងវិញ។កោះតៃវ៉ាន់ គ្រាន់តែជាតំបន់ស្វ័យយ័តរបស់ចិនតែប៉ុណ្ណោះ។
ដោយការអំពាវនាវរបស់ចិន នៅពេលនេះ រដ្ឋាភិបាលប្រទេសកោះ Solomon បានក្លាយជាប្រទេសទី៦ហើយ បានបញ្ចប់ទំនាក់ទំនងជាមួយកោះតៃវ៉ាន់ ចាប់តាំងពីលោកស្រី Tsai Ing-wen ឡើងកាន់តំណែង ជាមេដឹកនាំកោះតៃវ៉ាន់ កាលពីអំឡុងឆ្នាំ២០១៦ ដោយមានគោលនយោបាយប្រឆាំងនឹងរដ្ឋាភិបាលទីក្រុងប៉េកាំង។
កោះតៃវ៉ាន់ និង ប្រទេសកោះ Solomon បានបញ្ចប់ទំនាក់ទំនងការទូតក្រោយរយៈពេល៣៦ឆ្នាំ បន្ទាប់ពីសភា នៃប្រទេសដែនកោះកណ្តាលសមុទ្រ ប៉ាស៊ីហ្វិកបោះឆ្នោត កាលពីថ្ងៃទី១៦ ខែកញ្ញា ឆ្នាំ២០១៩ ដើម្បីបញ្ចប់នូវទំនាក់ទំនងការទូតជាមួយកោះតៃវ៉ាន់ ហើយងាកទៅបង្កើតទំនាក់ទំនងជាមួយរដ្ឋាភិបាលទីក្រុងប៉េកាំង វិញ។ ការចាកចេញរបស់ Solomon ចេញពីកោះតៃវ៉ាន់ ហើយងាកទៅចាប់ដៃជាមួយប្រទេសចិន នោះ បានធ្វើឲ្យតៃវ៉ាន់ បាត់បង់សម្ព័ន្ធមិត្តជាបន្តបន្ទាប់។ ប៉ុន្ដែទោះជាយ៉ាងនេះក្ដី បច្ចុប្បន្ន តៃវ៉ាន់ ក៏នៅសល់ប្រទេសចំនួន១៦ ទៀត មានទំនាក់ទំនងការទូតជាមួយគ្នា។
ប្រមុខការទូតរបស់កោះតៃវ៉ាន់ លោក Joseph Wu ក៏ត្រូវបានស្នើឲ្យលាលែង ចេញពីតំណែង នៅយប់ថ្ងៃទី១៦ ខែកញ្ញា ដើម្បីទទួលខុសត្រូវ ពីការកាត់ផ្តាច់ទំនាក់ទំនងទ្វេភាគីខាងលើ។ សកម្មភាពខាងលើនេះ បានកើតឡើង រយៈពេលមួយសប្តាហ៍ប៉ុណ្ណោះ ក្រោយពេលរដ្ឋមន្ត្រីការបរទេស Sោlomon លោក Jeremiah Manele បានទៅបំពេញទស្សនកិច្ច នៅលើកោះតៃវ៉ាន ដើម្បីពិភាក្សា អំពីទំនាក់ទំនងទ្វេភាគី។
ជាមួយគ្នានេះដែរ រដ្ឋាភិបាលកោះតៃវ៉ាន់ បានបង្ហាញ ពីការសោកស្តាយយ៉ាងខ្លាំង ចំពោះការសម្រេចចិត្តរបស់ប្រទេសកោះ Solomon ។ ការផ្ដាច់ទំនាក់ទំនងការបរទេសនេះ នឹងចូលជាធរមានភ្លាមៗ ក្រោយការប្រកាសរបស់រដ្ឋាភិបាល Solomon ហើយរាល់ទំនាក់ទំនងទ្វេភាគី រវាងប្រទេសសូឡូម៉ុង និងកោះតៃវ៉ាន់ ក៏ត្រូវបានកាត់ផ្តាច់ ទាំងសេដ្ឋកិច្ច និងនយោបាយ ផងដែរ៕
