សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យម្នាក់ បានធ្វើសកម្មភាពឆក់កាបូបស្ពាយនារីម្នាក់ កំពុងដើរក្នុងផ្សារសូរិយាម៉ល បានសម្រេចហើយព្យាយាមរត់គេចខ្លួន តែត្រូវប្រជាពលរដ្ឋ និងសមត្ថកិច្ចនាំគ្នាចាប់ក្របួចជាប់ និងដកហូតវត្ថុតាងជាក់ស្តែង ។
ករណីចោរឆក់កាបូបខាងលើនេះ បានកើតឡើងកាលពីវេលាម៉ោង៥ និង៣០នាទីព្រឹក ថ្ងៃទី១៧ ខែកញ្ញា ឆ្នាំ ២០១៩ ត្រង់ចំណុចក្នុងផ្សារសូរិយាម៉ល ផ្លូវលេខ ១៥៤ កែងផ្លូវលេខ៥១ ភូមិ ទី១១ សង្កាត់ផ្សារថ្មីទី៣ ខណ្ឌដូនពេញ ។ ជនសង្ស័យឈ្មោះ លឹម វឍ្ឍនា ភេទប្រុស អាយុ៣១ឆ្នាំ ជនជាតិខ្មែរ មុខរបរ និងទីលំនៅមិនពិតប្រាកដ ។
វត្ថុតាងចាប់យកបាន៖ កាបូបស្ពាយ ពណ៌ស្លែមួយ ដែលមានលុយចំនួន ៦០០,០០០រៀល (ជារបស់ជនរងគ្រោះ) ។
តាមប្រភពពីមន្រ្តីនគរបាលប៉ុស្តិ៍ផ្សារថ្មីទី៣ បានឲ្យដឹងថា កម្លាំងសមត្ថកិច្ចបានឃាត់ខ្លួនជនសង្ស័យម្នាក់ពីបទលួចមានស្ថានទម្ងន់ទោស (ដើរឆក់កាបូបស្ពាយ) ដោយមុនពេលកើតហេតុ គឺនារីរងគ្រោះកំពុងតែដើរតាមផ្លូវលេខ៥១ ក្នុងផ្សារសូរិយាម៉ល ស្រាប់តែលិចមុខជនសង្ស័យម្នាក់ឈ្មោះ លឹម វឍ្ឍនា បានដើរមកឆក់កាបូបរបស់ជនរងគ្រោះបានសម្រេច រួចក៏រត់គេចខ្លួនភ្លាមនោះនារីរងគ្រោះស្រែកឆោឡោផ្អើលដល់ប្រជាពលរដ្ឋនិងសមត្ថកិច្ចមូលដ្ឋានកំពុងតែជិះល្បាតមកដល់ក៏នាំគ្នាដេញចាប់បាន ហើយនាំយកមកទីស្នាក់ការប៉ុស្តិ៍ដើម្បីសាកសួរបន្ត ។
បច្ចុប្បន្នជនសង្ស័យ ត្រូវបានសមត្ថកិច្ចជំនាញធ្វើការសួរចម្លើយស្វែងរកបក្ខពួក រួមទាំងសកម្មភាព ដែលបានប្រព្រឹត្តកន្លងមក ដើម្បីកសាងសំណុំរឿង ចាត់ការតាមនីតិវិធី ៕ ស រស្មី
