ព័ត៌មានទាន់ហេតុការណ៍៖

រដ្ឋបាលខណ្ឌច្បារអំពៅ បើកយុទ្ធនាការផ្សព្វផ្សាយដល់ប្រជាពលរដ្ឋបានយល់ដឹង ពីការផ្តល់សេវាសាធារណៈនៅច្រកចេញចូលតែមួយ  

ចែករំលែក៖

ភ្នំពេញ៖ រដ្ឋបាលខណ្ឌច្បារអំពៅ នាព្រឹកថ្ងៃទី២៣ ខែកញ្ញា ឆ្នាំ២០១៩ បានបើកយុទ្ធនាការផ្សព្វផ្សាយដល់ប្រជាពលរដ្ឋក្នុងមូលដ្ឋានអោយបានយល់ដឹងទូលំទូលាយពីតារាងតំលៃ និង ការផ្តល់សេវាសាធារណៈនៅក្នុងការិយាល័យច្រកចេញចូលតែមួយរបស់ខណ្ឌ។

យុទ្ធនាការផ្សព្វផ្សាយនេះបានធ្វើឡើងព្រមគ្នារវាងមូលដ្ឋានសង្កាត់ទាំង៨ ដោយក្រុមការងារតាមសង្កាត់និមួយៗបានដើរចែកតារាងតំលៃនៃសេវាកម្មតាមផ្នែកនិមួយៗ របស់ការិយាល័យច្រកចេញចូលតែមួយ។ ក្នុងនោះបានផ្តល់សេវាលើ   វិស័យចំនួន១២ រួមមាន៖ ការងារនីត្យានុកូលកម្ម, ការងារអត្រានុកូលដ្ឋាន, វិស័យសុរិយោដី, វិស័យវប្បធ៌ម និង វិចិត្រសិល្បៈ, វិស័យអប់រំ យុវជន និង កីឡា, វិស័យទេសចរណ៍,វិស័យសំណង់, វិស័យឧស្សាហកម្ម រ៉ែ និង ថាមពល, វិស័យពាណិជ្ជកម្ម, វិស័យសុខាភិបាល,វិស័យសាធារណៈការ និងដឹកជញ្ជូន, និងវិស័យកសិកម្ម។

លោកចេង មុនីរ៉ា អភិបាលខណ្ឌច្បារអំពៅ បានអោយដឹងថា៖ ក្នុងយុទ្ធនាការនេះ បានធ្វើឡើងក្នុងគោលបំណង ដើម្បីអោយប្រជាពលរដ្ឋ បានយល់ដឹងបានកាន់តែទូលំទូលាយអំពីតំលៃ នៃការផ្តល់សេវាសាធារណៈនៅច្រកចេញចូលតែមួយ នឹងចៀសវាងការពឹងពាក់អ្នករត់ការ ដែលគេយកតំលៃលើសពីនេះ។ នៅក្នុងខិតប័ណ្ណផ្សព្វផ្សាយនេះ ក៍មានដាក់លេខទូរស័ព្ទរបស់ការិយាល័យច្រកចេញចូលតែមួយរបស់ខណ្ឌ ដើម្បីអោយប្រជាពលរដ្ឋបានទំនាក់ទំនងផ្ទាល់ បើសិនជាពួកគាត់មិនយល់ ឬ ចង់ដឹងពីប្រការណាមួយនោះ។

លោកអភិបាលបានបញ្ជាក់ថា៖ រដ្ឋបាលខណ្ឌច្បារអំពៅ នឹងខិតខំ ក្នុងការអនុវត្តកំណែទំរង់រដ្ឋបាលសាធារណៈរបស់រាជរដ្ឋាភិបាលកម្ពុជា ធ្វើយ៉ាងណាដើម្បីអោយរដ្ឋបាលសាធារណៈ កាន់តែមានភាពឆ្លើយតបប្រកបដោយប្រសិទ្ធិភាព តម្លារភាព ធ្វើអោយបាន ធ្វើអោយលឿន និង ជំនឿទុកចិត្ត ហើយលើកកំពស់វប្បធ៌មសាធារណៈ ឆន្ទៈម្ចាស់ការ ភក្តីភាព មនសិការវិជ្ជាជីវៈមន្រ្តីរាជការ ដើម្បីប្រែក្លាយរដ្ឋបាលសាធារណៈទៅជាអ្នកផ្តល់សេវាសាធារណៈដ៍មានប្រសិទ្ធភាព និង បំរើប្រជាពលរដ្ឋអោយបានកាន់តែល្អប្រសើរឡើង៕ សណ្តោស


ចែករំលែក៖