ព័ត៌មានទាន់ហេតុការណ៍៖

ជប៉ុនថ្កោលទោស ការបាញ់មីស៊ីល ជាថ្មីរបស់កូរ៉េខាងជើង

ចែករំលែក៖

នាយករដ្ឋមន្ត្រីជប៉ុនបានថ្កោលទោសយ៉ាងខ្លាំង​ដល់ការបាញ់មីស៊ីល​ ជាថ្មី​របស់កូរ៉េខាងជើង​ ដោយចាត់ទុកថា​នោះជាសកម្មភាពបំពានច្បាប់របស់អង្គការសហប្រជាជាតិ​។

នាយករដ្ឋមន្ត្រីជប៉ុន លោក  Shinzo Abe ​នៅថ្ងៃទី​២ ខែតុលា បានប្រកាសថា​កូរ៉េខាងជើង  ទើបតែបាញ់មីស៊ីល ពីរគ្រាប់​ហើយបានធ្លាក់ចូលដែនសមុទ្ររបស់ជប៉ុន​ ។ កម្លំាងទា​ហាន​អាមេរិក ប្រចាំនៅកូរ៉េខាងត្បូង ក៏បានប្រកាសផងដែរថា ទទួលបានព័ត៌មានស្តី​ពីការ​បាញ់​មីស៊ីលជាថ្មី របស់កូរ៉េខាងជើង  ហើយបានតាមដានយ៉ាងយកចិត្តទុកដាក់បំផុត​ ព្រមទាំង​សហការចែករំលែកព័ត៌មានជាមួយប្រទេសជាដៃគូក្នុងតំបន់​។

ជាមួយគ្នានេះដែរ កម្លាំងយោធា​របស់ប្រទេសកូរ៉េខាងត្បូង​បាន​និយាយថា កូរ៉េខាងជើង​បានបាញ់មីស៊ីល​យ៉ាងតិច​មួយគ្រាប់​នៅឯឆ្នេរសមុទ្រ​ភាគខាងកើត​របស់ខ្លួន ក្នុងអ្វីដែល​ហាក់ដូចជាការបង្ហាញ​ពីសមត្ថភាព​យោធា​របស់កូរ៉េខាងជើង​កំពុងត្រូវបានពង្រីក នៅមុន​ពេលចាប់ផ្តើមចរចានុយក្លេអ៊ែរជាមួយសហរដ្ឋអាមេរិកនោះ ។

អគ្គសេនាធិការចម្រុះ​របស់កូរ៉េខាងត្បូង នៅថ្ងៃទី២ ខែតុលា ឆ្នាំ២០១៩នេះ មិនបាន​បញ្ជាក់​នោះទេថា តើមីស៊ីលប្រភេទអ្វី ឬក៏រយៈចម្ងាយរបស់មីស៊ីលនោះដែលហោះហើរបានក្នុង​កម្រិតណា ហើយធ្លាក់នៅ​ទីកន្លែងណានោះ ។

សូមបញ្ជាក់ថា ការបាញ់មីស៊ីលរបស់កូរ៉េខាងជើង​ថ្មីៗបំផុតនេះ បានកើតឡើង ក្រោយពី​អ្នកការទូត​កូរ៉េខាងជើង កាលពីថ្ងៃទី១ ខែតុលា ឆ្នាំ២០១៩​បានប្រកាសថា កូរ៉េខាងជើង ហើយនិងសហរដ្ឋអាមេរិក​បានយល់ព្រមបន្តកិច្ចចរចា​នុយក្លេអ៊ែរកម្រិតការងារ​នៅចុងសប្តាហ៍នេះ (ថ្ងៃទី៥ ខែតុលា) ។

កិច្ចចរចា​នុយក្លេអ៊ែរ​បានជាប់គាំង​អស់រយៈពេលជាច្រើនខែ ក្រោយពីកិច្ចពិភាក្សា​បរាជ័យ​កាលពីខែ​កុម្ភៈ ឆ្នាំ២០១៩ រវាង​មេដឹកនាំកូរ៉េខាងជើង គីម ជុងអ៊ុន និងមេដឹកនាំ​អាមេរិក​ដូណាល់ ត្រាំ ដោយសារតែការខ្វែងគំនិតគ្នា​លើបញ្ហាកាត់បន្ថយទណ្ឌកម្ម និងការ​រំសាយ​អាវុធនុយក្លេអ៊ែរ ៕


ចែករំលែក៖