ព័ត៌មានទាន់ហេតុការណ៍៖

មូលហេតុធ្វើឲ្យចិនដង្ហែក្បួនព្យុហយាត្រាធំបំផុតនៅក្នុងប្រវត្តិសាស្ត្រនៃទិវាជាតិលើកទី ៧០

ចែករំលែក៖

នៅថ្ងៃទី១ ខែតុលា ចិនបានដង្ហែក្បួនព្យុហយាត្រាទ្រង់ទ្រាយធំបំផុតក្នុងប្រវត្តិសាស្ត្រនាឱកាសនៃទីវាជាតិលើកទី​៧០ឆ្នាំ​ ។ ពិធិសង្ហែក្បួន យោធាមានរយៈពេល​៨០នាទី​ ដោយមានការចូលរួមពីកម្លាំងទាហាន ជាង​១១៥ពាន់នាក់​ ។ ក្រៅពីនេះនៅមានយន្តហោះចម្បាំង​១៦០គ្រឿង អាវុធ​៥៨០ប្រភេទ​ទំនើបៗ។

ឧត្តមសេនីយ៍​Tan Min ​អនុប្រធាន​គណៈកម្មការរៀបចំដង្ហែក្បួនព្យុហយាត្រាបានឲ្យដឹងថា​ សព្វាវុធទាំងអស់ដែលបានបង្ហាញក្នុងពិធី​ព្យុហយាត្រានេះគឺបានដាក់​ឲ្យប្រើប្រាស់នៅ​ក្នុងជួរកងទ័ព ផលិតដោយបច្ចេកវិទ្យាចិនផ្ទាល់​។

សារព័ត៌មាន​ Bloomberg ​បានផ្សាយថា នៅក្នុងពិធីដង្ហែក្បួន កាលពីថ្ងៃទី​១ខែតុលា  ជាទិវាដ៏​ពិសេស​សម្រាប់ចិន និងការដឹកនាំរបស់ ប្រធានាធិបតី ស៊ី ជីនពីង​ ដោយនេះជាខួបគម្រប់​៧០ឆ្នាំនៃការកាន់អំណាចដឹកនាំរបស់ បក្សកម្មុយនិស្តចិន ។

ការដង្ហែក្បួនយោធាលើកនេះ គឺចង់បង្ហាញឲ្យពិភពលោកបានដឹកពីកម្លាំងពិត​ប្រាកដរបស់​ចិន ដែលទទួលបាននាពេលកន្លងមក​។ ចិនកំពុងតែឆ្ពោះទៅកាន់មហាអំណាចពិភពលោក ហើយបច្ចុប្បន្នចិនបានដើរតួនាទីយ៉ាងសំខាន់នៅលើពិភពលោក ទាំង សេដ្ឋកិច្ច​យោធា និងនយោបាយ​។

​អ្វី​ជា​ការ​កត់សម្គាល់ ខួប​គម្រប់ ៧០ឆ្នាំ​នៃ​ការ​បង្កើត​សាធារណរដ្ឋប្រជាមានិត​ចិន​ឆ្នាំ​នេះ​បាន​ធ្វើ​ឡើង ក្នុង​ពេល​ដែល​ចិន​កំពុង​មាន​ជម្លោះ​ពាណិជ្ជកម្ម​ជាមួយ​អាមេរិក សេដ្ឋកិច្ច​ថមថយ និង​ការ​បន្ត​ក្បួនបាតុកម្ម​របស់​ក្រុម​អ្នក​គាំទ្រប្រជាធិបតេយ្យ​នៅ​ហុងកុង។

មាន​ចំណាប់អារម្មណ៍​ពីរ​សំខាន់​នៅ​ក្នុង​ពិធី​ប្រារព្ធ​ខួប​គម្រប់ ៧០ឆ្នាំ​នៃ​ការ​បង្កើត​សាធារណរដ្ឋប្រជាមានិត​ចិន ទី១ ជា​ឱកាស​ដែល​ចិន​ចង់​បង្ហាញ​ប្រាប់​ពិភពលោក​នូវ​មហិទ្ធិឫទ្ធិ ឬ​ភាព​ជា​មហាអំណាច​របស់​ខ្លួន​ដែល​មិន​ត្រូវ​មើលស្រាល និង​ទី២ គឺ​ជា​ឱកាស​សម្រាប់​គណបក្ស​កុម្មុយនិស្តចិន​ដើម្បី​បញ្ជាក់​ពី​ការ​ការ​សោយរាជ្យ​របស់​ខ្លួន​ជាមួយ​នឹង​សមិទ្ធិផល​ដែល​ថ្នាក់ដឹកនាំ​សម្រេច​បាន។ ក្បួន​ព្យុះហយាត្រា​យោធា​ចូលរួម​ដោយ​ទាហាន​ចំនួន ១៥ ០០០នាក់ រថក្រោះ​ចំនួន ៥៨០គ្រឿង គ្រាប់មីស៊ីល​បាលីស្ទិក ឧទ្ធម្ភាគចក្រ និង​យន្តហោះ​ចម្បាំង​ជា​ច្រើន​គ្រឿង។ គ្រាប់មីស៊ីល Made in China ជាមួយ​នឹង​បច្ចេកវិទ្យា​ចិន ១០០% និង​ដែល​ចិន​ទើប​បាន​បង្ហាញ​ជា​លើកទី១ គឺ​គ្រាប់មីស៊ីលនុយក្លេអ៊ែរអន្តរទ្វីប​ឈ្មោះ DF-៤១។

គ្រាប់មីស៊ីល DF-៤១ អាច​បំពាក់​ក្បាល​នុយក្លេអ៊ែរ​ចំនួន ១០គ្រាប់ និង​អាច​បាញ់​បាន​ចម្ងាយ​ដល់​ទៅ ១៤ ០០០គីឡូម៉ែត្រ ពោល​បាញ់​ទៅ​ដល់​ទឹកដី​អាមេរិកាំង។ ក្រៅ​ពី​គ្រាប់មីស៊ីល​ថ្មី ចិន​ក៏​បាន​បង្ហាញ​នូវ​គ្រឿងសព្វាវុធ​ផ្សេងៗ​ទៀត ដូច​យ៉ាង​អាវុធ​សម្រាប់​ប្រឆាំង​តប​នឹង​ប្រព័ន្ធ​ប្រឆាំង​មីស៊ីល​របស់​សត្រូវ ឬ​មួយ​ក៏​យន្តហោះ​ដ្រូន​ជា​ដើម។ « គ្មាន​អ្វី​ដែល​អាច​ធ្វើ​ឲ្យ​រង្គោះរង្គើរ​គ្រឹះ​នៃ​មហាប្រជាជាតិ​របស់​យើង​បាន​ឡើយ។ គ្មាន​អ្វី​ដែល​អាច​រារាំង​ប្រជាជាតិ និង​ប្រជាជន​របស់​យើង​ឲ្យ​ធ្វើ​ដំណើរ​ឆ្ពោះ​ទៅ​មុខ​បាន​ឡើយ » នេះ​ជា​ការ​ថ្លែង​របស់​ប្រធានាធិបតី​ចិន​លោក​ស៊ី ជីនពីង​ដែល​មាន​សំលៀកបំពាក់​ពណ៌ក្រម៉ៅ​ក្នុង​ពេល​ប្រកាស​ផ្តើម​ក្បួន​ព្យុះហយាត្រា។

គួរ​រម្លឹក​ថា គឺ​នៅ​លើ​ទីលាន​ធានអានមេន​ក្នុង​ទីក្រុង​ប៉េកាំង​ដដែល​នេះ​ដែល​អតីត​មេដឹកនាំ​ចិន​លោក​ម៉ៅ សេទុង​បាន​ប្រកាស​បង្កើត​សាធារណរដ្ឋប្រជាមានិត​ចិន​កាល​ពី​ថ្ងៃទី១ តុលា ឆ្នាំ ១៩៤៩។ គឺ​នៅ​កន្លែង​ដដែល​នេះ​ដែលមាន​ការ​វាយបង្រ្កាប​យ៉ាង​ហិង្សា​លើ​ក្រុម​បាតុករ​សិស្ស និស្សិត​ចិន​ដែល​ទាមទារ​លទ្ធិប្រជាធិបតេយ្យ​កាល​ពី ៣០ឆ្នាំ​មុន។

ក្នុងរយៈពេល​៧០ឆ្នាំ ក្រោយបង្កើតសាធារណរដ្ឋប្រជាមានិតចិន ពេលនេះចិនកំពុង​តែធ្វើដំណើរឆ្ពោះទៅមុខ ក្លាយទៅជាមហាអំណាចទីមួយ​លើពិភពលោក ជំនួសតំណែង​អាមេរិក ក្នុងពេលឆាប់ៗខាងមុខ

នេះ​ជា​សុបិន្ត និង​ការ​ចង់​បាន​របស់​ប្រធានាធិបតី​ចិន​លោក​ស៊ី ជីនពីង។ តែ​អ្វី​ដែល​គ្រប់​គ្នា​កំពុង​សម្លឹង​ឃើញ​ភ្លាមៗ​ពេល​នេះ គឺ​ការ​ដែល​លោក​ស៊ី ជីនពីង​សម្រេច​បាន​ជោគជ័យ​ក្នុង​ការ​ពង្រឹង​អំណាច​ផ្ទាល់​ខ្លួន​ជា​ប្រធានាធិបតី​អស់​មួយ​ជីវិត និង​ដែល​ត្រូវ​បាន​គេ​ចាត់​ទុក​ជា​ប្រធានាធិបតី​ដ៏​មាន​អំណាច​ខ្លាំង​ជាង​ប្រធានាធិបតី​មុនៗ​ទៀត​ផង គិត​តាំង​ពី​ក្រោយ​ការ​សោយរាជ្យ​របស់​លោក​ម៉ៅ សេទុង​ពី​ឆ្នាំ ១៩៤៩ ដល់​ឆ្នាំ ១៩៧៦។ ទន្ទឹម​នឹង​ពង្រឹង​អំណាច​ផ្ទាល់ខ្លួន លោក​ស៊ី​ក៏​បាន​ពង្រឹង​អំណាច​គណបក្សកម្មុយនិស្ត​ចិន តាំង​ពី​លោក​ឡើង​កាន់​អំណាច​នា​ដំណាច់​ឆ្នាំ ២០១២។ បន្ទាប់​ពី​ក្លាយ​ជា​មហាអំណាច​សេដ្ឋកិច្ចទី២ ក្នុង​លោក ចិន​កំពុង​សម្លឹង​កន្លែង​អាមេរិក​ជា​មហាអំណាចទី១ ក្នុង​លោក។

គួរ​បញ្ជាក់​ថា ជា​ប្រទេស​កុម្មុយនិស្ត​ក្រហមឆ្អិនឆ្អៅ​មែន តែ​ចិន​បាន​ប្រកាន់​យក​នូវ​នយោបាយ​សេដ្ឋកិច្ច​មូលធននិយម ពោល​មិនមែន​សេដ្ឋកិច្ច​ផែនការ​តាម​បែប​សង្គមនិយម​ទេ។ ចិន​ជា​ប្រទេស​ទំនើប​ទាន់​សម័យ​មិន​ចាញ់​បស្ចិមលោក​ទាំង​ក្នុង​ផ្នែក​យោធា អវកាស និង​បច្ចេកវិទ្យា។ តែ​ទោះ​ជា​យ៉ាង​នេះ​ក្តី នៅ​មាន​បញ្ហា​ប្រឈម​ជា​ច្រើន​ដែល​ចិន​ត្រូវ​ដោះស្រាយ ទាំង​នៅ​ផ្ទៃក្នុង និង​នៅ​អន្តរជាតិ។ កំណើន​សេដ្ឋកិច្ច​ថមថយ និង​គម្លាត​រវាង​អ្នកមាន និង​អ្នកក្រ​ជា​ប្រធានរឿង​អាទិភាព​ពីរ​ដែល​រដ្ឋាភិបាល​ត្រូវ​ដោះស្រាយ​ជា​បន្ទាន់។ ចំណែក​នៅ​អន្តរជាតិ​ដែល​ចិន​ត្រូវ​ដោះស្រាយ និង​ពិនិត្យ​មើល​ឡើង​វិញ​នៅ​ចំពោះ​មុខ គឺ​ជម្លោះ​ពាណិជ្ជកម្ម​ជាមួយ​អាមេរិក និង​គម្រោង​ផ្លូវ​មួយ ខ្សែក្រវ៉ាត់​មួយ​ដែល​ចិន​កំពុង​ទទួល​រង​ការ​រិះគន់​ខ្លាំង​ពី​ប្រទេស​ពាក់ព័ន្ធ​មួយ​ចំនួន៕


ចែករំលែក៖