សារព័ត៌មាន នគរវត្ត តែងតែនាំមុខគេជានិច្ច
ខេត្តតាកែវ ៖ ប្រជាពលរដ្ឋរស់នៅឃុំកំពង់ក្រសាំង ស្រុកបូរីជលសារបានប្រាប់ ឱ្យដឹងថា ដាយកាត់ទទឹងទន្លេចំនួន៣កន្លែង ស្ថិតក្នុងឃុំកំពង់ក្រសាំង ស្រុកបូរីជលសារ ខេត្តតាកែវ ត្រូវបានអភិបាលស្រុកក៏ដូចជាមេឃុំបានលក់អតីតដែនឡូត៍លេខ៥ទៅឱ្យជនជាតិវៀតណាមចូលមកដាក់ដាយកាត់ទទឹងទន្លេរួចប្រមូលយកត្រីគ្រប់ប្រភេទយកទៅស្រុកគេវិញរាប់សិបតោនជារៀងរាល់ថ្ងៃដោយមិនបានរំខានសមត្ថកិច្ចណាឡើយ ។
ប្រជាពលរដ្ឋបានត្អូញត្អែរថា មានការលំបាកណាស់សម្រាប់ប្រជាពលរដ្ឋខ្មែរយើងដែលនេសាទត្រីជាលក្ខណៈគ្រួសារនោះ បើទោះបីជាមានសហគមន៍នេសាទក្នុងឃុំក៏ដោយក៏មិនមានប្រយោជន៍ដែរដោយសារអាជ្ញាធរស្រុក និងឃុំបានលក់អតីតឡូត៍នេសាទនោះទៅឱ្យជនជាតិវៀតណាមឲ្យគេចូលមកដាក់ដាយសែយឿនដោយខុសច្បាប់និងដោយសេរី ។ពិសេសជារៀងរាល់ឆ្នាំដាយកាត់ទទឹងទន្លេក្នុងឃុំកំពង់ក្រសាំងចំនួន៣កន្លែងអាជ្ញាធរមូលដ្ឋានត្រូវរ៉ូវគ្នាលក់ទៅឱ្យវៀតណាមតាំងពីរដូវបិទនេសាទមករហូតដល់រដូវបើកនេសាទនេះដោយជ្រកក្រោមស្លាកសហគមន៍នេសាទតែប៉ុណ្ណោះ ។
ប្រជាពលរដ្ឋដដែលបានបន្តទៀតថា ដោយក្នុងឆ្នាំនេះទឹកទន្លេបានឡើងយឺតជាងឆ្នាំមុនៗដោយទឹកទើបតែហក់ឡើងនៅចុងខែ៨នេះតែប៉ុណ្ណោះ ហើយដាយកាត់ទទឹងទន្លេទាំង៣ខ្សែនេះជនជាតិយួនបានចូលមកដាក់ក្នុងខែ៩នេះទេ និងបានប្រមូលយកទៅស្រុកគេវិញរាប់សិបតោនទាំងថ្ងែទាំងយប់គ្មាននរណាខ្វល់ឡើយ ។
ទាក់ទិនករណីនេះ លោក សៅ កុសល ប្រធានរដ្ឋបាលជលខេត្តបានប្រាប់ភ្នាក់ងារកាសែតនគរវត្តថា ចំពោះដាយកាត់ទទឹងទន្លេទាំង៣ខ្សែនេះជារបស់សហគមន៍នេសាទឃុំកំពង់ក្រសាំង ហើយអាជ្ញាធរឱ្យសហគមន៍នេះជាអ្នកដាក់ខ្លួនគេតែបើគេលក់ទៅឱ្យឈ្មួញវៀតណាមចូលមកធ្វើការនេសាទនោះគឺខុសច្បាប់ហើយ ។ ចំណែក អភិបាលស្រុកបូរីជលសារ លោក ទុយ សុភ័ក្រ មិនអាចទាក់ទងសុំការបំភ្លឺបានទេនៅព្រឹកថ្ងៃពុធទី២ ខែតុលា ឆ្នាំ២០១៩ ម្សិលមិញនេះ ៕ ប្រាថ្នា
ផ
