សារព័ត៌មាន នគរវត្ត តែងតែនាំមុខគេជានិច្ច
ការរកឃើញថ្មីបន្ថែមទៀតនេះ ធ្វើឲ្យជំងឺប៉េស្តជ្រូកអាហ្វ្រិកកើតឡើងនៅកូរ៉េខាងត្បូងដំបូងគេចាប់ពីថ្ងៃទី១៧ ខែកញ្ញា ឆ្នាំ២០១៩ រហូតមដល់ពេលនេះ បានកើនឡើងចំនួន១៣ករណីហើយៗខណៈដែលផ្នែកពាក់ព័ន្ធបាននិងកំពុងខិតខំយ៉ាងខ្លាំងទប់ស្កាត់ការឆ្លងរាលដាលនៃជំងឺនេះ ។ ជំងឺប៉េស្តជ្រូកអាហ្វ្រិកនេះបានឆ្លងពាសពេញប្រទេសក្នុងតំបន់អាស៊ីតែម្តង ។ ប្រទេសដំបូងគេដែលផ្ទុះជំងឺនេះ គឺប្រទេសចិន កាលពីឆ្នាំ២០១៨ ។
ក្រសួងកសិកម្មរបស់កូរ៉េខាងត្បូង នៅថ្ងៃទី៣ ខែតុលា ឆ្នាំ២០១៩បានប្រកាសអំពីជំងឺប៉េស្តជ្រូកអាហ្វ្រិក ករណីទី១៣ កើតឡើងនៅក្នុងប្រទេសនេះ គឺបន្ទាប់ពីករណីថ្មី២បន្ថែមទៀតទើបតែត្រូវបានរកឃើញ ។
ជំងឺនេះឆ្លងងាប់តែសត្វជ្រូកនោះទេ មិនប៉ះពាល់ដល់មនុស្សឡើយ ហើយមកទល់ពេលនេះ ពុំទាន់មានថ្នាំសម្រាប់ព្យាបាល ឬវាក់សាំងចាក់ការពារនោះទេ ។ នៅពេលបច្ចុប្បន្ន ជំងឺប៉េស្តជ្រូកអាហ្វ្រិកត្រូវអង្គការសុខភាពសត្វពិភពលោក (OAH)អះអាងថា បានឆ្លងរាលដាលជុំវិញពិភពលោក ក្នុងប្រទេសជាង៥០ ។ សត្វជ្រូករាប់លានក្បាលត្រូវបានសម្លាប់ ។
រហូតមកដល់ពេលនេះ កូរ៉េខាងត្បូងបានចាត់វិធានការទប់ស្កាត់ជំងឺប៉េស្តជ្រូកអាហ្វ្រិក ដោយសម្លាប់សត្វជ្រូកប្រហែល ១១៥ ០០០ក្បាលហើយ ។ ការដឹកជញ្ជូននៅទូទាំងប្រទេសក៏ត្រូវបានរិតបន្តឹង ក៏ដូចយុទ្ធនាការបោសសម្អាតនៅតាមទីកន្លែងចិញ្ចឹមសត្វជ្រូក តាមកសិដ្ឋាននានាផងដែរ ។ ក្រសួងកសិកម្មកូរ៉េខាងត្បូងបានអំពាវនាវពលរដ្ឋបង្កើនវិធានការសម្អាតកសិដ្ឋានរបស់ខ្លួនបន្ថែមពីលើទម្លាប់របស់ពួកគេថែមទៀត ។
ក្រសួងកសិកម្មក៏បានត្អួញត្អេរវិធានការទប់ស្កាត់ជំងឺប៉េស្តជ្រូកអាហ្វ្រិករបស់ខ្លួនពុំមានប្រសិទ្ធភាព ដោយសារតែភ្លៀងធ្លាក់ខ្លាំងពីខ្យល់ព្យុះ Mitagបក់បោកនៅក្នុងប្រទេសនេះកាលពីយប់ថ្ងៃទី២ ខែតុលា និងនៅព្រឹកថ្ងៃទី៣ ខែតុលា ឆ្នាំ២០១៩។
កូរ៉េខាងត្បូងកំពុងតែស្វែងរកប្រភពចម្ងលនៃជំងឺនេះដំបូងគេ ។ ជំងឺប៉េស្តជ្រូកទាំងអស់បានរកឃើញនៅកសិដ្ឋានចិញ្ចឹមជ្រូកមួយកន្លែងក្បែរព្រំដែនជាមួយកូរ៉េខាងជើង ។ កូរ៉េខាងជើងផ្ទុះជំងឺប៉េស្តជ្រូកអាហ្វ្រិកដំបូងគេកាលពីខែឧសភា ឆ្នាំ២០១៩ ៕
